धक्कादायक! 1500 नव्हे, तर ६४० किमी रस्ते खोदले; एमएनजीएलचे स्पष्टीकरण, महापालिकेकडे भरले ३९२ कोटी
खोदलेले रस्ते दुरूस्त करण्यासाठी महानगरपालिकेला ३९२ कोटी जमा करण्यात आले आहेत. साधारणतः प्रती मिटर पाच रूपये या दराने ही आकारणी महापालिकेने केली आहे. असा खुलासाही एमएनजीएलने केला आहे.
वैयक्तिक घरगुती जोडण्या पाइपलाइन संबंधित सोसायटीच्या आवारात पोहोचल्यानंतर नेटवर्कद्वारे देण्यात येतात, त्या प्रमुख रस्त्यांलगत टाकलेल्या मुख्य पाइपलाइनमधून थेट घेतल्या जात नाहीत. त्यामुळे प्रत्येक घरासाठी मुख्य रस्ते वारंवार खोदण्याची आवश्यकता टाळली जात असून, पाइपलाइन टाकल्यानंतर खोदलेला चर तातडीने मातीने भरून त्याचे प्राथमिक कॉम्पॅक्शन करते. रस्त्याचे कायमस्वरूपी पुनरुज्जीवन करण्याचे काम महानगरपालिकेकडून केले जाते.
गॅस पाइपलाइनची कामे संबंधित प्राधिकरणांकडून देण्यात आलेल्या परवानग्या आणि मंजुरींच्या चौकटीतच काटेकोरपणे करण्यात येत असून, भूमिगत पाइपलाइन टाकताना शक्य तितका कमी व्यत्यय निर्माण करण्याचा व शक्य असेल तेथे पाइपलाइन रस्त्याच्या कडेला किंवा मऊ मातीच्या भागातून टाकली जाते आहे. आणि डांबरी आणि पक्क्या रस्त्याचा भाग टाळला जात आहे.
रस्ता खोदणे अपरिहार्य असल्यास, अचूक पद्धतीने कटिंग केले जाते. सामान्यतः रस्त्याच्या किंवा शोल्डरच्या अगदी कडेला कटिंग करून प्रभावित क्षेत्र कमीत कमी ठेवण्याचा प्रयत्न केला आहे. गर्दीच्या ठिकाणी पृष्ठभागावरील खोदकाम आणि वाहतुकीवरील परिणाम कमी करण्यासाठी एमएनजीएल होरिजेंटल डायरेक्शन ड्रीलींग ट्रॅचलेस तंत्रज्ञानाचाही वापर करते असेही म्हटले आहे.
या रस्त्यांच्या खराब स्थितीचे कारण महाराष्ट्र नॅचरल गॅस लिमिटेड एमएनजीएलकडून पाईप्ड नॅचरल गॅसमुळे झाल्याचे म्हटले आहे. मात्र घरगुती ग्राहक, व्यावसायिक आस्थापना, उद्योग आणि वाहतूक क्षेत्राला स्वच्छ, किफायतशीर आणि पर्यावरणपूरक वायू उपलब्ध करून देण्यासाठी भूमिगत नैसर्गिक वायू पायाभूत सुविधांचा विकास अत्यावश्यक आहे. नागरिकांची गैरसोय कमीत कमी करण्यासाठी मुख्य पाइपलाइनशी जोडणी उपलब्ध होण्यापूर्वीच एमनएनजीएलने विल्होळी येथे सुविधा उभारली. ही सुविधा दक्षिण-पूर्व आशियातील सर्वांत मोठ्या सुविधांपैकी एक असून, फेब्रुवारी २०२२ मध्ये कार्यान्वित झाली. यामुळे वाहतूक क्षेत्राला लवकर तसेच औद्योगिक, व्यावसायिक आणि घरगुती ग्राहकांना गॅसपुरवठा करणे शक्य झाले. ही पाइपलाइन समृद्धी महामार्गाच्या कॉरिडॉरमार्गे नाशिकपर्यंत पोहोचली असल्याचे म्हटले आहे.
.png "Videos"){kind=small}
