“जनतेच्या आशीर्वादामुळे मुख्यमंत्री आणि आम्ही…”; OSD मंगेश चिवटेंनी सांगितला हेलिकॉप्टरच्या इमर्जन्सी लॅंडिंगचा थरार

मुख्यमंत्री एकनाथ शिंदे यांचा हा दौरा अत्यंत गोपनीय मानला जात आहे .त्यांचा नियोजित दौरा आटोपून मुंबईला जाण्यासाठी त्यांनी हेलिकॉप्टर मागवले होते.

सातारा: राज्याचे मुख्यमंत्री एकनाथ शिंदे दरे या त्यांच्या गावी एक दिवसाच्या दौऱ्याकरता आले होते. दरम्यान हेलिकॉप्टरने मुंबईकडे रवाना होत असताना खराब हवामानामुळे हेलिकॉप्टर पुन्हा दरे गावातील हेलिपॅड वर उतरवण्याची वेळ आली. मात्र तातडीच्या कामासाठी मुख्यमंत्री शिंदे मोटारीने मुंबईला रवाना झाल्याची माहिती आहे

राज्यात विधानसभा निवडणुकांची आचारसंहिता लागू झाली आहे त्यामुळे पोलिस व जिल्हा प्रशासन अलर्ट मोडवर असून निवडणुकांच्या प्रक्रियेची तयारी जोरात सुरू आहे . अशा पार्श्वभूमीवर मुख्यमंत्री एकनाथ शिंदे गुरुवारी रात्री हेलिकॉप्टरने आपल्या मूळ गावी रवाना झाले होते. आज पुन्हा मुंबईला परत जाताना ढगाळ वातावरण आणि पावसाची रिपरिप यामुळे हेलिकॉप्टर उड्डाणाला अडथळा निर्माण झाला .हेलिकॉप्टरने दरे येथील हेलिपॅड वरून उड्डाण घेतले होते मात्र खराब हवामाना असल्यामुळे हेलिकॉप्टरने पुढे जाणे अशक्य असल्याचे पायलटने सांगितले.  त्यामुळे पुन्हा हेलिकॉप्टर तातडीने माघारी वळून हेलिपॅड वर उतरवण्यात आले.

मुख्यमंत्री एकनाथ शिंदे यांचा हा दौरा अत्यंत गोपनीय मानला जात आहे .त्यांचा नियोजित दौरा आटोपून मुंबईला जाण्यासाठी त्यांनी हेलिकॉप्टर मागवले होते.  मात्र खराब हवामानामुळे हेलिकॉप्टर चे उड्डाण रद्द झाले. त्यानंतर मुख्यमंत्री एकनाथ शिंदे मोटारीने मुंबईला रवाना झाले आहेत.

मंगेश चिवटे यांनी सांगितला थरार

मुख्यमंत्री वैद्यकीय सहाय्यता कक्षाचे प्रमुख आणि ओएसडी मंगेश चिवटे यांनी याबद्दल माहिती दिली आहे. मुख्यमंत्री एकनाथ शिंदे हे त्यांचे मूळ गाव असलेल्या दरे गावातून पुण्याकडे निघाले होते. त्यावेळी माझ्यासह दोघे जण हेलिकॉप्टरमध्येच होतो. पुण्याला जाताना अचानक ढगाळ वातावरण तयार झाले. मुसळधार पाऊस सुरू झाला. त्यात हेलिकॉप्टर भरकटायला लागले. कोयना बॅकवॉटरच्या अगदी १५ फुट हेलिकॉप्टर खाली आले होते.

हेलिकॉप्टर लँड करण्यासाठी आजूबाजूला योग्य जमीन मिळत नव्हती. शेवटी आम्ही ज्या ठिकाणी टेक ऑफ केले त्याच दरे गावात लँड करावे लागले. त्यानंतर एकनाथ शिंदे हे वाहनाने पुण्याला रवाना झाले आहेत. राज्यातील १३ कोटी जनतेच्या आशीर्वादामुळे मुख्यमंत्री एकनाथ शिंदे आणि आम्ही सर्वजण सुखरूप आहोत.