Ganesh Visarjan : विसर्जन मिरवणुकीवर पोलिसांची करडी नजर! 6500 हून अधिक जवान तैनात; CCTV अन् Drone ने देखरेख

Vasai Virar Ganesh Visarjan : लाडक्या गणरायाला निरोप देण्यासाठी वसई-विरार शहर पूर्णपणे सज्ज झाले असून अनंत चतुर्दशीच्या विसर्जन सोहळ्यासाठी वसई-विरार महापालिका आणि पोलीस आयुक्तालयाकडून चोख नियोजन करण्यात आले आहे. शहरात साडेसहा हजारांहून अधिक पोलीस व पालिका कर्मचाऱ्यांचा बंदोबस्त तैनात करण्यात आला आहे.

• विसर्जनासाठी पालिका, पोलिस सज्ज
• १२८ कृत्रिम तलाव, ‘रो-रो’ सेवा
• ६५०० हून अधिक जवानांचा खडा पहारा

Vasai Virar Ganesh Visarjan : गेले बारा दिवस मनोभावे सेवा केल्यानंतर लाडक्या गणरायाला निरोप देण्यासाठी वसई-विरार शहर पूर्णपणे सज्ज झाले आहे. अनंत चतुर्दशीच्या दिवशी शहरात निघणाऱ्या विसर्जन मिरवणुका शांततेत आणि निर्विघ्नपणे पार पडाव्यात, यासाठी वसई-विरार महापालिका आणि मीरा-भाईंदर-वसई-विरार पोलिस आयुक्तालयाने चोख नियोजन केले आहे. महापालिकेचे ४ हजारांहून अधिक कर्मचारी आणि पोलिसांचा अडीच हजारांहून अधिक फौजफाटा असा साडेसहा हजारांचा बंदोबस्त शहरात तैनात करण्यात आला आहे. ( Vasai Virar Ganesh Visarjan ) 

Palghar Accident : स्टोर रुमची भिंत कोसळली… अन् होत्याचं नव्हतं झालं, तिघांचा मृत्यू

पर्यावरणपूरक विसर्जनाला प्राधान्य देत महापालिकेने शहरात १२८ कृत्रिम तलाव, १८ फिरते हौद आणि दोन खदानींच्या ठिकाणी कन्वेअर बेल्टची व्यवस्था केली आहे. मोठ्या मूर्तीच्या सुरक्षित विसर्जनासाठी ६ प्रमुख जेट्टींवर तराफे व बोटी सज्ज ठेवण्यात आल्या आहेत. विशेष म्हणजे, यंदा वसई व विरार मारंबळपाडा जेट्टी येथे ‘रो-रो’ सेवा उपलब्ध करण्यात आली असून भाविकांना मदत करण्यासाठी महापालिकेचे कर्मचारी उपस्थित राहतील. विसर्जन घाटांवर जलप्रदूषण रोखण्यासाठी जागोजागी निर्माल्य कलश बसवण्यात आले आहेत.

‘क्यूआर कोड’ची सुविधा उपलब्ध

भाविकांना विसर्जन स्थळांची अचूक माहिती सहज मिळावी म्हणून प्रशासनाने ‘क्यूआर कोड’ची सुविधा उपलब्ध करून दिली आहे. अग्निशामक दलाचे जवान, जीवरक्षक, लाइफ जॅकेट्स, रेस्क्यू बोटी आणि सीसीटीव्ही कॅमेऱ्यांच्या साहाय्याने विसर्जन स्थळांवर चोख नजर ठेवली जाईल, असे अतिरिक्त आयुक्त संजय हेरवाडे यांनी दिली.

ध्वनि प्रदूषणावर कडक नजर

मिरवणुकीत गर्दीचा गैरफायदा घेऊन होणाऱ्या चोऱ्या आणि महिलांची छेडछाड रोखण्यासाठी साध्या वेशातील गस्ती पथके कार्यरत राहतील. नियमांचे उल्लंघन रोखण्यासाठी आणि ध्वनी प्रदूषणावर नियंत्रण ठेवण्यासाठी स्वतंत्र पथके लक्ष ठेवतील. मंडळांनी भरती-ओहोटीच्या वेळा पाळून विसर्जन वेळेत पूर्ण करावे आणि वाहतूक सुरळीत राहण्यासाठी अवजड वाहनांवर घालण्यात आलेल्या निर्बंधांचे पालन करावे, असे आवाहन अतिरिक्त पोलिस आयुक्त संजय शिंत्रे यांनी केले आहे.

आयुक्तालय क्षेत्रातील तैनात फौजफाटा

आयुक्तालय क्षेत्रात ६४३ सार्वजनिक आणि ५ हजार ३३० घरगुती अशा एकूण ५ हजार ९७३ गणेशमूर्तीचे विसर्जन होणार आहे. यासाठी कायदा व सुव्यवस्था राखण्यासाठी ६ पोलिस उपायुक्त, ९ सहाय्यक पोलिस आयुक्त, २०४ अधिकारी, १ हजार ३८१ अंमलदार, ३०० होमगार्ड आणि १९२ महाराष्ट्र सुरक्षा दलाचे जवान रस्त्यावर उतरणार आहेत. याशिवाय एसआरपीएफच्या ३ प्लाटून, आरसीपीची १ प्लाटून आणि २ स्ट्रायकिंग फोर्स तैनात करण्यात आल्या आहेत.

५९७३ – मूर्तीचे होणार विसर्जन
५३३० – घरगुती मूर्ती
६४३ – सार्वजनिक मूर्ती

बंदोबस्तावरील तैनात मनुष्यबळ

पोलिस उपायुक्त ०६
सहाय्यक पोलिस आयुक्त ०९
अधिकारी २०४
अंमलदार १३८१
होमगार्ड ३००
महाराष्ट्र सुरक्षा दलाचे जवान १९२
एसआरपीएफच्या प्लाटून ०३
आरसीपीची प्लाटून ०१
स्ट्रायकिंग फोर्स ०२

Palghar PWD Scam : पीडब्ल्यूडीत 73 लाखांचा घोटाळा, बनावट दस्तऐवज तयार; ‘अभिप्राया’च्या नावाखाली FRI रोखला