Vasai Virar Heavy Rain : बाप्पाच्या स्वागताला पावसाचे विघ्न! वसई-विरारमध्ये गुडघाभर पाणी; पुढील काही दिवस…

Vasai Virar Heavy Rain : वसई-विरार, नालासोपारा आणि नायगाव परिसरात रविवारी पहाटेपासून कोसळणाऱ्या मुसळधार पावसाने मोठी दाणादाण उडवली आहे. मुसळधार पावसामुळे मुख्य रस्ते, सखल भाग आणि काही गणेशोत्सव मंडपांमध्ये पाणी शिरल्याने जनजीवन पूर्णपणे विस्कळीत झाले असून उत्सवाच्या तयारीत मोठे विघ्न निर्माण झाले आहे.

• वसई-नालासोपाऱ्यात मुसळधार पाऊस!
• रस्ते अन् रेल्वे स्थानक परिसरात साचले पाणी
• वाहतूक कोंडीमुळे चाकरमानी त्रस्त

Vasai Virar Heavy Rain : लाडक्या बाप्पाच्या आगमनाला अवघे काही तास उरले असतानाच, वसई-विरार आणि नालासोपारा पट्टयात रविवारी पहाटेपासून सुरू झालेल्या मुसळधार पावसाने पुरती दाणादाण उडवून दिली आहे. सतत कोसळणाऱ्या पावसामुळे शहरातील मुख्य रस्ते, सखल भाग आणि काही गणेशोत्सव मंडपांमध्ये पाणी शिरल्याने नागरिकांचे जनजीवन पूर्णपणे विस्कळीत झाले असून उत्सवाच्या तयारीत विघ्न निर्माण झाले आहे. त्यामुळे उत्सवाच्या सुरुवातीलाच पावसाचा ओघ वाढतोय का असा प्रश्न नागरिकांना पडला आहे. ( Vasai Virar Heavy Rain ) 

Palghar Ganeshotsav 2026 : बाप्पांच्या स्वागतासाठी पालघर जिल्हा सज्ज! 12564 मूर्तींची होणार प्रतिष्ठापना; कडेकोट पोलीस बंदोबस्त

नाले व गटारे तुडुंब

रविवारी पहाटे तीनपासून विजांच्या कडकडाटासह सुरू झालेल्या पावसाने शहरातील नाले व गटारे तुडुंब भरून वाहत आहेत. नालासोपारा पूर्वेकडील रेल्वे स्थानक परिसर, सेंट्रल पार्क, तुळींज रोड, गालानगर, विरार पश्चिमेकडील रस्ते आणि नायगाव परिसरातील अनेक भाग जलमय झाले.

प्रवाशांचे हाल, वाहतूक मंदावली

नालासोपारा रेल्वे स्थानक परिसरात गुडघाभर पाणी साचल्याने लोकल प्रवाशांना पाण्यातून कसरत करत स्थानक गाठावे लागले. दुसरीकडे विरारहून मुंबईअहमदाबाद राष्ट्रीय महामार्गाकडे जाणाऱ्या मुख्य रस्त्यावर मोठ्या प्रमाणावर पाणी साचल्याने वाहनांची गती मंदावली असून चाकरमानी आणि कोकणात जाणाऱ्या भाविकांची प्रचंड वाहतूक कोंडीत अडकून मोठी गैरसोय झाली.

सलग पावसाने पाण्याचा निचरा होण्यास अडथळा

महापालिकेच्या आपत्कालीन व्यवस्थापन विभागाने पाणी साचलेल्या ठिकाणी सक्शन पंप लावून पाण्याचा निचरा करण्याचे काम हाती घेतले आहे. तरीही पावसाचा जोर कायम असल्याने पाण्याचा निचरा होण्यास अडथळा येत आहे. सलग पडणाऱ्या पावसामुळे ऐन सणाच्या तोंडावर शहरात भीतीचे वातावरण असून नागरिकांना सतर्कतेचा इशारा देण्यात आला आहे.

नागरिक व्यापाऱ्यांची उडाली तारांबळ

गणेशोत्सवाच्या पूर्वसंध्येला खरेदीसाठी बाहेर पडलेले नागरिक आणि व्यापाऱ्यांची या अचानक आलेल्या पावसामुळे तारांबळ उडाली. अनेक मंडळांनी शनिवारीच वाजतगाजत बाप्पाच्या मूर्ती मंडपात आणल्या होत्या. मात्र, रविवारी पहाटेपासून काही गणेश मंडपांमध्ये पाणी शिरल्याने सजावटीचे साहित्य, विद्युत रोषणाई आणि देखावे सुरक्षित ठेवण्यासाठी कार्यकत्यांची एकच धावपळ उडाली. अनेक ठिकाणी कार्यकर्ते पंपांच्या साहाय्याने मंडपातील पाणी बाहेर काढताना दिसत होते.

Vasai Virar News : ED कारवाईनंतर वसई पालिकेचा मोठा दणका! 80 पुनर्विकास प्रकल्प अडचणीत! अतिरिक्त बांधकामाला स्थगिती