husband and wife upset
पुणे: उच्चशिक्षित मात्र नोकरी न करणाऱ्या पतीला पत्नीने ५० हजार रुपयांची कायमस्वरूपी पोटगी देण्याचे मान्य केले. त्यामुळे विभक्त होण्याच्या अटी ठरवून दोघांनी संमतीने दाखल केलेला घटस्फोटाचा दावा न्यायालयाने निकाली काढला. पत्नीने नोकरीबाबत खोटी साक्ष दिल्याने पतीने त्याबाबतची तक्रार दाखल केली होती. त्यानंतर पत्नीने तडजोडीची तयारी दर्शवली होती. सह दिवाणी न्यायाधीश वरिष्ठ स्तर एस. व्ही. फुलबांधे यांनी याबाबतचा निकाल दिला. पत्नीने तडजोडीची तयारी दाखवून कायमस्वरूपी पोटगी देण्याचे मंजूर केल्यानंतर पतीनेदेखील पोटगीच्या अंतरिम आदेशाबाबत दाखल केलेले अपील आणि पत्नीने खोटी साक्ष दिल्याची तक्रार मागे घेतली. पतीच्या वतीने ॲड. नरेंद्र बाबरे यांनी बाजू मांडली. अक्षय आणि सुषमा (नावे बदललेली) असे या जोडप्याचे नाव आहे. त्यांचा ऑगस्ट २०१८ मध्ये विवाह झाला होता. कौटुंबिक वाद झाल्याने ते जून २०२० पासून विभक्त राहत आहेत. अक्षय यांनी बी.टेक.चे शिक्षण घेतले आहे. सुषमा यांनी एम. टेकची पदवी मिळवली आहे. त्या एका खासगी कंपनीत नोकरी करतात.
.png "Videos"){kind=small}
