महापालिका सार्वत्रिक निवडणूक तयारीला वेग; प्रभागनिहाय मतदार याद्यांच्या विभाजनाच्या कामाची सुरुवात

पिंपरी, चिंचवड, भोसरी या तीन विधानसभा मतदारसंघांतील तसेच भोर मतदारसंघातील अंशतः भागांच्या याद्यांचा या प्रक्रियेत समावेश करण्यात आला आहे. एकूण ३२ प्रभागांसाठी स्वतंत्र मतदार याद्या तयार करण्याचे काम सुरू झाले आहे.

पिंपरी : पिंपरी चिंचवड महापालिका सार्वत्रिक निवडणुकीच्या तयारीला आता वेग आला आहे. निवडणुकीच्या दृष्टीने महत्त्वाचे ठरणारे प्रभागनिहाय मतदार यादी विभाजनाचे काम शनिवार (दि.१८) सुरू करण्यात आले. या कामासाठी नियुक्त प्रगणक, मतदान केंद्रस्तरीय अधिकारी (बीएलओ) आणि पर्यवेक्षक यांना विशेष प्रशिक्षण देण्यात आले. या प्रक्रियेसाठी नागरिकांनी सक्रिय सहकार्य करावे, असे आवाहन अतिरिक्त आयुक्त प्रदीप जांभळे पाटील यांनी केले.

चिंचवड येथील प्रा. रामकृष्ण मोरे प्रेक्षागृहात झालेल्या या प्रशिक्षण सत्रात निवडणूक विभागाचे सहाय्यक आयुक्त अविनाश शिंदे यांनी मतदार यादी विभाजनाच्या संगणकीय प्रक्रियेचे सादरीकरण करून सविस्तर मार्गदर्शन केले. यावेळी स्मार्ट सिटीचे मुख्य कार्यकारी अधिकारी किरणराज यादव, सहाय्यक आयुक्त किरणकुमार मोरे, नगररचना सहाय्यक संचालक प्रशांत शिंपी, विशेष अधिकारी किरण गायकवाड आदी अधिकारी उपस्थित होते.

अतिरिक्त आयुक्त जांभळे पाटील म्हणाले, ‘राज्य निवडणूक आयोगाच्या मार्गदर्शक सूचनांनुसार प्रभागनिहाय मतदार यादी विभाजित करण्याचे काम हाती घेण्यात आले आहे. १ जुलै २०२५ ची विधानसभा मतदार यादी यासाठी आधारभूत मानण्यात आली आहे. हे काम जबाबदारीचे असून, ठरवलेल्या वेळेत पूर्ण करणे आवश्यक आहे’. त्यांनी स्पष्ट केले की, निवडणूक कामकाजात कोणतीही कसूर झाल्यास संबंधितांविरुद्ध नियमांनुसार कारवाई होईल आणि या कालावधीत कुणालाही रजा मंजूर केली जाणार नाही.

शिंदे यांनी सांगितले की, पिंपरी, चिंचवड, भोसरी या तीन विधानसभा मतदारसंघांतील तसेच भोर मतदारसंघातील अंशतः भागांच्या याद्यांचा या प्रक्रियेत समावेश करण्यात आला आहे. एकूण ३२ प्रभागांसाठी स्वतंत्र मतदार याद्या तयार करण्याचे काम सुरू झाले आहे. प्रशिक्षण सत्रात मतदार यादी विभाजनाची प्रक्रिया, माहिती विवरणपत्र भरण्याची पद्धत आणि विविध तांत्रिक बाबींचे स्पष्टीकरण देण्यात आले. प्रशिक्षणार्थींनी विचारलेल्या शंकांचे निरसन करून संपूर्ण प्रक्रिया पारदर्शक आणि वेळेत पूर्ण करण्यावर भर देण्यात आला.