विधानसभा उपाध्यक्षपदासाठी 'या' तीन आमदारांची नावं चर्चेत; अण्णा बनसोडे यांचं नाव आघाडीवर...
मुंबई : गेल्या काही दिवसांपासून महाराष्ट्राच्या राजकारणात विविध घडामोडी घडत आहेत. भाजप-शिवसेना-राष्ट्रवादी काँग्रेस या महायुतीचे सरकार सध्या सत्तेवर आहे. असे असताना आता महाराष्ट्र विधानसभा उपाध्यक्ष निवडणुकीचा कार्यक्रम जाहीर करण्यात आला आहे. यात आमदार अण्णा बनसोडे, लातूरचे राष्ट्रवादी काँग्रेसचे आमदार आणि माजी मंत्री संजय बनसोडे, गोंदिया जिल्ह्यातील अर्जुनी मोरगाव विधानसभा मतदारसंघाचे राष्ट्रवादीचे आमदार राजकुमार बडोले या तिघांची नावं चर्चेत आहे.
उपमुख्यमंत्री अजित पवार यांचे कट्टर समर्थक आणि राष्ट्रवादी काँग्रेसचे आमदार अण्णा बनसोडे यांची विधानसभा उपाध्यक्षपदी वर्णी लागण्याची शक्यता वर्तवली जात आहे. विधानसभा अध्यक्ष राहुल नार्वेकर यांनी विधानसभा उपाध्यक्ष निवडणुकीचा कार्यक्रम जाहीर केला आहे. आज दुपारी बारा वाजेपर्यंत अर्ज दाखल करता येणार आहेत. अण्णा बनसोडे हे राष्ट्रवादी काँग्रेस पक्षाचे आमदार आहेत. ते उपमुख्यमंत्री अजित पवार यांचे कट्टर समर्थक मानले जातात.
बनसोडे हे पुणे जिल्ह्यातील पिंपरी विधानसभा मतदारसंघातून आमदारपदी निवडून आले आहेत. 2009 मध्ये ते पहिल्यांदा आमदार झाले. त्यानंतर 2019 आणि 2024 असे सलग दोनवेळा त्यांनी पुन्हा आमदारकी मिळवली. राष्ट्रवादीत पडलेल्या फुटीनंतर ते अजित पवार यांच्या पाठीशी राहिले आणि 2024 च्या विधानसभा निवडणुकीत पुन्हा निवडूनही आले. दादांचा बालेकिल्ला असलेल्या पिंपरीचे ते भक्कम शिलेदार मानले जातात.
विधानसभा विरोधी पक्षनेता अद्याप ठरेना
विधिमंडळाच्या अर्थसंकल्पीय अधिवेशनात विरोधी पक्षनेत्यांची निवड केली जाईल, अशी दाट शक्यता व्यक्त केली जात होती. पण, अधिवेशन अखेरच्या टप्प्यात असूनही अद्याप या निवडीला मुहूर्त न मिळाल्याने सोमवारी विधानसभेत याचे पडसाद उमटले. ही निवड तातडीने करावी, अशी मागणी काँग्रेसचे विधीमंडळ नेते विजय वडेट्टीवार यांनी सभागृहात केली. संख्याबळ न पाहता विधानसभेत विरोधी पक्षनेत्याची नेमणूक व्हावी, अशी मागणीही केली जात आहे.
.png "Videos"){kind=small}
