पुणे: पुण्यातील कोथरूड विधानसभा मतदारसंघातून महायुतीतील अंतर्गत कलह चव्हाट्यावर आला आहे. कोथरूडमध्ये भाजपकडून चंद्रकांत पाटील यांच्या विरोधात अमोल बालवडकर यांनीच दंड थोपटले आहेत. याठिकाणी महायुतीतच बंडखोरीचे सूर उमटू लागले आहे. त्यामुळे अमोल बालवडकर यांनी माघार घेतली नाही, तर या ठिकाणी चुरशीची लढत होण्याची शक्यता आहे.
कोथरूड विधानसभेसाठी अमोल बालवडकर इच्छुक होते. पण भाजपकडून मागील प्रमाणे चंद्रकांत पाटील यांना उमेदवारी देण्यात आली. त्यामुळे अमोल बालवडकर नाराज होते. त्यांनी बंडखोरीचा इशारा देताच प्रदेशाध्य़क्ष चंद्रशेखर बावनकुळे यांनी अमोल बालवडकर यांच्या घरी जाऊन त्यांच्या समजूत काढण्याचा प्रयत्न केला. पण हे प्रयत्नही अयशस्वी ठरले.
हेही वाचा: भाजपचा मुख्यमंत्रिपदासाठी ‘हा’ नवा फॉर्म्युला; निवडणूक जिंकली तरी एकनाथ शिंदे मुख्यमंत्री…
धक्कादायक म्हणजे काही दिवसांपूर्वी अमोल बालवडकर यांचे मेव्हणे पैलवान अभिजित कटके यांच्या वाघोलीतील घरावर आयकर विभागाने छापेमारी केली. त्याचवेळी बालवडकर यांच्यावरही अप्रत्यक्ष दबाव टाकण्याचा प्रयत्न केला जात असल्याच्या चर्चा रंगल्या होत्या. त्यानंतर आता अमोल बालवडकर हे कोथरूडमधून बंडखोरी करणार असल्याच्या चर्चा सुरू झाल्या आहेत.
पुण्यातील कोथरूड विधानसभा मतदारसंघ भाजपसाठी अगदी सरक्षित आणि बालेकिल्लाच समजला जातो. पण अमोल बालवडकर यांच्या बंडखोरीमुळे याठिकाणी मतांचे विभाजन होण्याची शक्यताही निर्माण झाली आहे. अमोल बालवडकरांनी दंड थोपटल्यास चंद्रकांत पाटील यांच्यासाठी हे मोठे आव्हान ठरणार आहे.विशेष म्हणजे कोथरूडमध्ये चौरंगी लढतही पाहायला मिळू शकते. याचे कारण म्हणजे, भाजपकडून चंद्रकांत पाटील, महाविकास आघाडीकडून ठाकरे गटाचे चंद्रकांत मोकाटे, मनसेचे किशोर शिंदे आणि आता अमोल बालवडकर हे चारजण कोथरूडमधून आपले नशीब आजमावण्यासाठी निवडणुकीच्या रिंगणात उतरणार आहे.
हेही वाचा: मुले असूनही तुमची किती प्रॉपर्टी तुम्ही दुसऱ्याच्या नावावर करू शकता? ‘हा’ नियम जाणून घ्या
दरम्यान, 2019 च्या विधानसभा निवडणुकीत भाजपचे चंद्रकांत पाटील कोथरूडमधून निवडून आले. पण चंद्रकांत पाटील हे मुळचे कोल्हापूरचे. त्यामुळे कोल्हापूर सोडून त्यांनी पुण्यातील कोथरूडमधून निवडणूक लढवल्यामुळे याठिकाणी स्थानिक विरूद्ध आयात उमेदवार या मुद्द्याभोवती ही निवडणूक फिरत राहिली. चंद्रकांत पाटील यांना उमेदवारी दिल्यानंतर अनेक स्थानिक नेत्यांनी त्याठिकाणी नाराजीही व्यक्त केली. पण चंद्रकांत पाटील यांची पाच वर्षे पूर्ण झाल्यानंतर दुसऱ्या टर्मलाही कोथरूडकर आयात चंद्रकांत पाटील यांना स्वीकारतील का, असा प्रश्न आता उपस्थित होत आहे.
2008 मध्ये शिवाजनगर विघानसभा मतदारसंघाचे विभाजन झाले आणि कोथरूड हा नवा विधानसभा मतदारसंघ अस्तित्वात आला. 2009 च्या निवडणुकीत शिवसेनेचे चंद्रकांत मोकाटे याठिकाणी निवडून आले. त्यानंतर 2014 च्या विधानसभा निवडणुकीत भाजपच्या मेधा कुलकर्णी या निवडून आल्या.त्यांनी शिवसेनेच्या मोकाटे यांचा पराभव केला. 2019 मध्ये चंद्रकांत पाटील यांना भाजपकडून उमेदवारी देण्यात आली. तर मेधा कुलकर्णी यांना मात्र तिकीट नाकारण्यात आले. पण त्यामुळे मेधा कुलकर्णीही नाराज असल्याच्या चर्चा सुरू होत्या. त्यानंतर भाजपने त्यांना राज्य सभेत पाठवून त्यांचंही पुर्नवसन केलं.
हेही वाचा: दिवाळीवर पावसाचे सावट! ‘या’ जिल्ह्यात वादळी पावसाची शक्यता, IMD कडून यलो अलर्ट
.png "Videos"){kind=small}
