Pune Traffic Update : पुणेकरांनो लक्ष द्या! शहरातील वाहतूक व्यवस्थेत मोठा बदल; ‘हे’ महत्त्वाचे रस्ते राहणार बंद

गणेश विसर्जन मिरवणुकीमुळे पुणे मध्यवर्ती शहरातील प्रमुख रस्ते बंद असणार असून, वाहतुकीसाठी वर्तुळाकार पर्यायी मार्गाची व्यवस्था करण्यात आली आहे.

पुणे : गणेश विसर्जन मिरवणुकीमुळे पुणे मध्यवर्ती शहरातील प्रमुख रस्ते बंद असणार असून, वाहतुकीसाठी वर्तुळाकार पर्यायी मार्गाची व्यवस्था करण्यात आली आहे. मध्यवर्ती येणाऱ्या प्रमुख प्रवेशमार्गावरील दहा ठिकाणी मिरवणुकीच्या स्थितीनुसार वाहतूक वळविली आहे. दांडेकर पूल, नळ स्टॉप, सेनापती बापट रस्ता, शिवाजीनगर, जुना बाजार, पुणे स्टेशन, टिंबर मार्केट, डायस प्लॉट, मार्केट यार्डमार्गे दांडेकर पूल असा हा वर्तुळाकार मार्ग असणार आहे.

पुणे शहरात आज गणेश विसर्जन मिरवणुका काढण्यात येत आहेत. शहराच्या मध्यवर्ती भागातील सर्व प्रमुख रस्ते मिरवणुकांमुळे वाहतुकीसाठी बंद ठेवण्यात येतात. मात्र, अशावेळी शहराच्या एका भागातून दुसऱ्या भागात वाहन घेऊन जाताना नागरिकांची गैरसोय होणार नाही, यासाठी वाहतूक पोलिसांनी पर्यायी मार्गाची आखणी केली आहे. जंगली महाराज रस्त्यावरील झाशी राणी चौक, शिवाजी रस्त्यावरील काकासाहेब गाडगीळ पुतळा, मुदलियार रस्त्यावरील अपोलो टॉकीज-दारुवाला पूल, लक्ष्मी रस्त्यावरील संत कबीर पोलिस चौकी, सोलापूर रस्त्यावरील ढोले चौक (सेव्हन लव्हज), सातारा रस्त्यावरील वीर बाजी पासलकर चौक (व्होल्गा चौक), बाजीराव रस्त्यावरील सावरकर पुतळा चौक, लालबहादूर शास्त्री रस्त्यावरील सेनादत्त पोलिस चौकी, कर्वे रस्त्यावरील नळ स्टॉप आणि नामदार गोपाळ कृष्ण गोखले रस्त्यावरील (फर्ग्युसन कॉलेज रस्ता) गोखले चौक या ठिकाणी शहरात येणारी वाहतूक अडविण्यात येणार आहे.

हे सुद्धा वाचा : सातारा रस्त्यावरील दुग्गड चौकातील खड्ड्यांवरून मनसे आक्रमक; प्रशासनाला दिला गंभीर इशारा

असा असणाार वर्तुळाकार मार्ग 

कर्वे रस्ता जंक्शन, नळ स्टॉप, लॉ कॉलेज रस्ता, सेनापती बापट रस्ता, गणेशखिंड रस्ता, भाऊसाहेब खुडे चौक (सिमला ऑफिस), संचेती हॉस्पिटल, सीओईपी, शाहिर अमर शेख चौक, मालधक्का, नरपतगिरी चौक, नेहरू रस्ता, संत कबीर पोलिस चौकी, ढोले चौक, वखार महामंडळ चौक, शिवनेरी रस्ता, गुलटेकडी, मार्केट यार्ड जंक्शन, सातारा रस्ता, व्होल्गा चौक, मित्रमंडळ चौक, सिंहगड रस्ता, सावरकर चौक, लालबहादूर शास्त्री रस्ता आणि सेनादत्त पोलिस चौकीमार्गे म्हात्रे पूल ते नळ स्टॉप असा हा पर्यायी वर्तुळाकार मार्ग असेल. या मार्गावर २५ सप्टेंबरपासून विसर्जन मिरवणूक संपेपर्यंत दुहेरी वाहतूक सुरू ठेवण्यात येणार आहे.