दिवाळीत ट्रॅव्हल्सवाल्यांकडून प्रवाशांची लूट! पुणे-नांदेड प्रवासासाठी 2 ते 3 हजारांचा भुर्दंड; RTO अधिकारी नेमके कुठे?

दिवाळीच्या सुट्ट्यांमुळे गावी जाणाऱ्या प्रवाशांची प्रचंड गर्दी वाढली असताना खासगी ट्रॅव्हल्स चालकांकडून तिकिटांचे दर तब्बल २ हजार ते ३ हजार रुपयांपर्यंत आकारले जात असल्याने प्रवाशांची आर्थिक लूट सुरू असल्याची भावना व्यक्त होत आहे.

• पुणे-नांदेड ट्रॅव्हल्सचे भाडे २ ते ३ हजारांवर
• निकृष्ट जेवण आणि असुरक्षित प्रवासामुळे प्रवासी त्रस्त
• विशेष रेल्वे गाड्या सुरू करण्याची मागणी

नांदेड : दिवाळीच्या सुट्ट्यांमुळे गावी जाणाऱ्या प्रवाशांची प्रचंड गर्दी वाढली असताना रेल्वेचे तत्काळ तिकीटही मिळत नसल्याने अनेक प्रवाशांना खासगी ट्रॅव्हल्सचा आधार घ्यावा लागत आहे. मात्र, प्रवाशांच्या या अगतिकतेचा फायदा घेत खासगी ट्रॅव्हल्स चालकांकडून तिकिटांचे दर तब्बल २ हजार ते ३ हजार रुपयांपर्यंत आकारले जात असल्याने प्रवाशांची आर्थिक लूट सुरू असल्याची भावना व्यक्त होत आहे. पुण्याहून नांदेडकडे येताना शिरूरच्या पुढे एका ठिकाणी ट्रॅव्हल्स थांबविण्यात येते. तेथील हॉटेलमध्ये प्रवाशांची अक्षरशः जत्राच भरते. मात्र, एवढी गर्दी असूनही जेवणाचा दर्जा अत्यंत निकृष्ट असल्याने प्रवाशांना नाईलाजानेच जेवण उरकावे लागते.

 

जादा भाडे, निकृष्ट भोजन अन् असुरक्षित प्रवास

प्रवाशांकडून भरमसाठ पैसे आकारायचे आणि त्या बदल्यात साध्या दर्जाचे जेवणही उपलब्ध करून द्यायचे नाही, असा प्रकार सुरू असल्याची नाराजी प्रवाशांनी व्यक्त केली. ट्रॅव्हल्समध्ये प्रवाशांना अक्षरशः कडबा भरल्याप्रमाणे कोंबून नेतात. प्रवाशांची संख्या, प्रवासातील सुरक्षितता आणि सुविधांपेक्षा अधिकाधिक प्रवासी वाहून नेण्याला प्राधान्य दिले जात असल्याचे दिसते. तिकिटांचे वाढीव दर, निकृष्ट भोजन आणि असुविधाजनक प्रवास अशा तिहेरी संकटाचा सामना प्रवाशांना करावा लागत आहे. प्रवाशांसमोर दुसरा पर्यायच उरलेला नाही. त्यामुळे खासगी ट्रॅव्हल्सचे अव्वाच्या सव्वा दरही स्वीकारावे लागत आहेत. पुणे-नांदेड मार्गावर किमान आठ दिवस विशेष रेल्वे गाड्या सुरू केल्या असत्या, तर प्रवाशांची एवढी गर्दी खासगी ट्रॅव्हल्सकडे वळली नसती.

हे सुद्धा वाचा : ऐन दिवाळीत छत्रपती संभाजीनगरमध्ये गुन्हेगारीचा कहर! आठ ठिकाणी चाकू, कोयते अन् लोखंडी रॉडने हल्ले

अधिकारी लक्ष देणार का ?

प्रादेशिक परिवहन विभागाचे नांदेडला चार जिल्ह्याचे कार्यालय आहे. साळी नावाचे कुणी अधिकारी आहेत. त्यांच्या दिमतीला अन्य अधिकाऱ्यांचा फौजफाटा आहे. हे अधिकारी नेमके काय करतात? त्यांची जबाबदारी काय? हे त्यांनाच माहित. प्रवाशांची मोठ्या प्रमाणावर लूट होत आहे.

भाडेवाढीचा फटका आणि त्यांची आर्थिक पिळवणूकही टळली असती. सणासुदीला गावी जाण्याचा आनंद घ्यायचा की प्रवासातील लूट आणि गैरसोयी सहन करायच्या? असा प्रश्न आता सर्वसामान्य प्रवाशांसमोर उभा राहिला आहे. रेल्वे प्रशासनाने भविष्यातील गर्दीचा अंदाज घेऊन विशेष गाड्यांचे नियोजन करावे, तसेच खासगी प्रवासी वाहतुकीतील मनमानी दर आणि सुरक्षिततेच्या प्रश्नांकडे संबंधित यंत्रणांनी लक्ष द्यावे, अशी मागणी होत आहे. सणासुदीच्या काळात प्रवाशांची होणारी गैरसोय टाळण्यासाठी रेल्वे प्रशासन आणि परिवहन विभागाने समन्वय साधून तातडीने प्रभावी उपाययोजना करणे आवश्यक आहे.