लघुशंकेसाठी थांबला अन् गांजा विक्रीचा आरोप करत लुटले! PhonePe च्या व्यवहारातून दोन आरोपी पोलिसांच्या जाळ्यात

शहानुरमिया दर्गा परिसरात दुचाकी थांबवून लघुशंकेसाठी गेलेल्या तरुणाला गांजा विक्रीच्या खोट्या आरोपाखाली धमकावत मारहाण करून लुटणाऱ्या दोघांना गुन्हे शाखेने अटक केली आहे.

• गांजा विक्रीच्या खोट्या आरोपाखाली तरुणाला मारहाण
• फोन पेवर पैसे ट्रान्सफर करून मोबाइलही लुटला
• पोलिसांनी दोघांना केली अटक

छत्रपती संभाजीनगर : शहानुरमिया दर्गा परिसरात दुचाकी थांबवून लघुशंकेसाठी गेलेल्या तरुणाला गांजा विक्रीच्या खोट्या आरोपाखाली धमकावत मारहाण करून लुटणाऱ्या दोघांना गुन्हे शाखेने अटक केली आहे. विशेष म्हणजे, फिर्यादीच्या फोन पेवरून स्वतःच्या खात्यावर पैसे वळते केल्याने आरोपी पोलिसांच्या रडारवर आले आहेत. या व्यवहाराच्या तांत्रिक तपासातून त्यांचा माग काढत पोलिसांनी दोघा आरोपींना ताब्यात घेतले आहे. त्यांच्याकडून गुन्ह्यातील दोन मोबाइलसह २० हजारांचा मुद्देमाल जप्त केला आहे.

 

विशाल रोहीदास जाधव (वय २२, रा. रमानगर, क्रांती चौक) आणि हितेश बालन्ना यादव (वय २१, रा. चौसरनगर, प्रतापनगर, उस्मानपुरा) अशी अटक आरोपींची नावे आहेत. नरेंद्र अशोक बनसोडे (रा. सुतगिरणी चौक) हे ५ नोव्हेंबर रोजी सायंकाळी शहानुरमिया दर्गा परिसरात दुचाकी थांबवून लघुशंकेसाठी गेले होते. त्यावेळी दोघांनी गांजा विक्रीचा आरोप करत त्यांना मारहाण केली. मोबाईल हिसकावल्यानंतर पासवर्डसाठी छातीत फायटरने मारले.

घाबरलेल्या बनसोडे यांच्याकडून फोन पे चा पासवर्ड घेऊन १ हजार ७०० रुपये ट्रान्सफर केले आणि १० हजारांचा मोबाईल घेऊन आरोपी पसार झाले. याप्रकरणी सातारा पोलिस ठाण्यात गुन्हा दाखल करण्यात आला होता. ही कारवाई पोलिस आयुक्त विरेंद्र मिश्र, प्रभारी उपायुक्त (गुन्हे) शर्मिष्ठा वालावलकर आणि सहायक आयुक्त पुनम पाटील यांच्या मार्गदर्शनाखाली गुन्हे शाखेचे निरीक्षक गजानन कल्याणकर, अशोक भंडारे, सहायक निरीक्षक प्रशांत गंभीरराव, हवालदार संतोष पारधे, दीपक शिंदे, मनोज विखनकर आणि विजय निकम यांच्या पथकाने केली आहे.

हे सुद्धा वाचा : पुणे शहरात 31 किमीचे दोन भुयारी मार्ग उभारण्याची तयारी; वाहतूक कोंडी फोडण्यासाठी मेगा प्लॅन

नागपुरात भांडणात मध्यस्थी करणाऱ्यावरच हल्ला

मित्रासोबत सुरू असलेल्या वादात मध्यस्थी करण्यासाठी गेलेले देवेंद्र उत्तमराव सावरकर (वय ५०, रा. न्यू पँथरनगर, नंदनवन) यांच्यावर दोघांनी हल्ला करून गंभीर जखमी केल्याची धक्कादायक घटना उघडकीस आली आहे. आधी मारहाण केली आणि नंतर लोखंडी कडा व दगडाने वार केल्याने त्यांच्या पायाचे हाड फॅक्चर झाले. याप्रकरणी नंदनवन पोलिसांनी दोघांना अटक केली आहे. अमन उत्तम मेश्राम (वय २५, रा. पडोळेनगर, वाठोडा रोड) आणि अश्लेष शिवशंकर अडिकने (वय २९) अशी आरोपींची नावे आहेत.