Baramati byelection 2026 : बारामती पोटनिवडणुकीत नवा ट्वीस्ट; सुनेत्रा पवारांविरोधात ‘इतके’ उमेदवार रिंगणात

बारामती पोटनिवडणूक राष्ट्रवादीकडून निवडणूक बिनविरोध करण्यासाठी शर्तीचे प्रयत्न करण्यात आले, त्यांच्या या प्रयत्नानुसार ३० उमेदवारी अर्ज मागे घेण्यात आले. मात्र २३ उमेदवारी अर्ज कायम राहिले आहेत,

बारामती : काँग्रेसचे प्रदेशाध्यक्ष हर्षवर्धन सपकाळ यांच्या भूमिकेमुळे बारामती विधानसभा मतदारसंघाच्या पोटनिवडणुकीमध्ये काँग्रेसकडून ॲड आकाश विजयराव मोरे यांचा दाखल केलेला अर्ज अखेर मागे घेण्यात आला. राष्ट्रवादी काँग्रेस शरदचंद्र पवार पक्षाचे आमदार रोहित पवार यांनी काँग्रेसचे प्रदेशाध्यक्ष सपकाळ यांची भेट घेऊन त्यांच्या मध्यस्थीने उमेदवारी अर्ज मागे घेण्यात आला. मात्र उमेदवारी अर्ज दाखल करण्याचा शेवटचा दिवस असल्याने राष्ट्रवादीकडून निवडणूक बिनविरोध करण्यासाठी शर्तीचे प्रयत्न करण्यात आले, त्यांच्या या प्रयत्नानुसार ३० उमेदवारी अर्ज मागे घेण्यात आले. मात्र २३ उमेदवारी अर्ज कायम राहिले आहेत, त्यामुळे उपमुख्यमंत्री सुनेत्रा पवार यांच्यासह २३ जण निवडणुकीच्या रिंगणात आहेत.

 

बारामती विधानसभा मतदार संघाच्या पोटनिवडणुकीमध्ये ओबीसी नेते प्रा. लक्ष्मण हाके हे उमेदवारी अर्ज दाखल करणार होते, मात्र उमेदवारी दाखल करण्याच्या शेवटच्या दिवशी कृषिमंत्री दत्तात्रय भरणे यांच्या मध्यस्थीने हाके यांची समजूत काढण्यात आली. उपमुख्यमंत्री सुनेत्रा पवार यांनी देखील हाके यांना फोन करून उमेदवारी अर्ज दाखल न करण्याची विनंती केली. उपमुख्यमंत्री सुनेत्रा पवार यांचा फोन व कृषिमंत्री दत्तात्रय भरणे यांनी केलेली मध्यस्थी यामुळे हाके यांनी आपला उमेदवारी अर्ज दाखल केला नाही.

दरम्यान काँग्रेसचे प्रदेशाध्यक्ष हर्षवर्धन सपकाळ यांनी काँग्रेसचे ॲड आकाश मोरे हे आपल्या पक्षाकडून निवडणूक लढवणार असल्याचे घोषित करून त्यांचा उमेदवारी अर्ज देखील दाखल झाला. कोणत्याही परिस्थितीत आम्हीही निवडणूक लढवू, अशी भूमिका सपकाळ यांनी घेतली होती. दरम्यान दिवंगत उपमुख्यमंत्री अजित पवार यांच्या संशयित अपघात प्रकरणी फिर्याद बारामती पोलिसांनी दाखल करून घेतल्यास आम्ही या निवडणुकीतून माघारी घेणार असल्याचे सपकाळ यांच्यासह काँग्रेसचे उमेदवार आकाश मोरे यांनी म्हटले होते. मात्र आज आमदार रोहित पवार यांनी हर्षवर्धन सपकाळ यांची भेट घेऊन चर्चा केली. यानंतर आकाश मोरे यांचा उमेदवारी अर्ज माघारी घेण्यात आला.

दरम्यान बारामती विधानसभा मतदारसंघाच्या नवडणुकीमध्ये उपमुख्यमंत्री सुनेत्रा पवार यांच्यासह ५३ उमेदवारांनी उमेदवारी अर्ज दाखल केले होते. या पार्श्वभूमीवर निवडणूक बिनविरोध करण्याच्या दृष्टीने राष्ट्रवादीच्या पदाधिकाऱ्यांनी मोठे प्रयत्न सुरू केले होते. खासदार पार्थ पवार, जय पवार यांच्यासह राष्ट्रवादीचे पदाधिकारी प्रयत्नात होते. उमेदवारी अर्ज माघारी घेण्याचा आज शेवटचा दिवस असल्याने ३० उमेदवारांची माघार घेण्यात राष्ट्रवादीला यश आले, मात्र २३ उमेदवारांचे अर्ज राहिल्याने, बारामती विधानसभा मतदारसंघाची पोटनिवडणूक अखेर होणार असल्याचे स्पष्ट झाले आहे. दरम्यान उपमुख्यमंत्री सुनेत्रा पवार यांच्या विरोधात करुणा मुंडे, अभिजीत बिचकुले यांच्यासह अन्य २० उमेदवार निवडणुकीच्या रिंगणात आहेत.

हे सुद्धा वाचा : भोर तालुक्यात 26 ग्रामपंचायतींमध्ये रणधुमाळी; पोटनिवडणुकीसाठी राजकीय हालचालींना वेग