गॅससाठा तपासात जिल्ह्यात एकही ‘एफआयआर’ नाही
घरगुती गॅस मिळवण्यासाठी नागरिकांना एजन्सीबाहेर रांगा
काळाबाजाराच्या चर्चांमुळे प्रशासनाने सुरू केली तपास मोहीम
पुणे: पुणे जिल्ह्यात गॅस सिलेंडरच्या तुटवड्याच्या अफवा आणि संभाव्य काळाबाजाराच्या चर्चांमुळे प्रशासनाने तपास मोहीम सुरू केली असली, तरी प्रत्यक्षात एकही एफआयआर नोंदवली गेलेली नसल्याचे समोर आले आहे. त्यामुळे पुणे जिल्ह्यात मोठ्या प्रमाणावर गॅस साठा किंवा काळाबाजार सुरू असल्याच्या दाव्यांवर प्रश्नचिन्ह निर्माण झाले आहे.
मात्र दुसरीकडे घरगुती गॅस मिळवण्यासाठी नागरिकांना एजन्स्यांबाहेर रांगा लावाव्या लागत असल्याने परिस्थितीबाबत संभ्रम निर्माण झाला आहे. गॅस सिलेंडरच्या काळाबाजारावर आळा घालण्यासाठी जिल्हा प्रशासनाने प्रत्येक तहसीलमध्ये एक तपास पथक नियुक्त केले आहे. तसेच जिल्हास्तरावर दोन विशेष पथके कार्यरत ठेवण्यात आली असून प्राप्त तक्रारींची चौकशी करून अनियमितता किंवा काळाबाजार आढळल्यास तत्काळ कारवाई करण्याचा इशारा प्रशासनाने दिला होता.
जिल्हा पुरवठा अधिकारी महेश सुधालकर यांनी सांगितले की, तपास पथके गॅस एजन्सींमधील उपलब्ध साठा तसेच ग्राहकांची प्रत्यक्ष मागणी याची पडताळणी करत आहेत. ज्या ठिकाणी गॅस सिलेंडरचा वापर संशयास्पदरीत्या अधिक दिसून येईल, त्या ठिकाणी छापे टाकण्यात येणार आहेत. नागरिकांनी अफवांवर विश्वास न ठेवता अनावश्यक सिलेंडर बुकिंग टाळावे, असे आवाहनही प्रशासनाने केले आहे.
मात्र या तपास मोहिमेनंतरही पुणे जिल्ह्यात कुठेही गॅस साठा किंवा काळाबाजार आढळून आलेला नसल्यामुळे एकही गुन्हा दाखल झालेला नाही, असे जिल्हा पुरवठा अधिकाऱ्यांकडून स्पष्ट करण्यात आले आहे. त्यामुळे अधिकृत पातळीवर सर्व काही सुरळीत असल्याचा दावा केला जात असला, तरी प्रत्यक्षात नागरिकांना घरगुती गॅस मिळवण्यासाठी एजन्स्यांबाहेर रांगा लावाव्या लागत असल्याचे चित्र दिसत आहे.
यामुळे “गॅसचा तुटवडा नाही आणि साठाही नाही, तर मग सिलेंडरसाठी रांगा कशासाठी?” असा थेट सवाल नागरिकांकडून उपस्थित केला जात आहे. प्रशासनाचे दावे आणि प्रत्यक्ष परिस्थिती यामध्ये मोठी दरी असल्याचेही नागरिकांकडून बोलले जात आहे.
.png "Videos"){kind=small}
