पुण्याच्या 'या' भागांमध्ये १० दिवस मद्यविक्रीस बंदी; जिल्हाधिकाऱ्यांचे आदेश
पुणे: पुण्याच्या मध्यभागात गणेशोत्सवाच्या काळात दारू विक्री बंद करण्यात आली आहे. पुढील १० दिवस ही विक्री बंद असणार असून, खडक, विश्रामबाग आणि फरासखाना या पोलीस ठाण्यांच्या हद्दीतील मद्यविक्री बंद करण्याचे आदेश जिल्हाधिकारी सुहास दिवसे यांनी दिले आहेत. पुणे पोलिसांनी याबाबत प्रस्ताव सादर केला होता. दरम्यान दारु विक्रीबंदीची कडक अंमलबजावणी आता पोलिसांकडून सुरू असून, या आदेशाचे उल्लंघन केल्यास कारवाई करण्याचा इशारा अतिरिक्त पोलीस आयुक्त प्रवीणकुमार पाटील यांनी दिला आहे.
गणेशोत्सव काळात मध्यभागात मोठी गर्दी होते. गर्दीत महिलांची छेडछाडीच्या घटना घडतात. तसेच काहींच्या मद्याने विनाकारण त्रास सहन करावा लागतो. त्यामुळेच उत्सवाच्या काळात खडक, फरासखाना, विश्रामबाग पोलीस ठाण्यांच्या हद्दीतील मद्य विक्री दुकाने बंद ठेवण्यात यावी, अशी सूचना मंडळांच्या पदाधिकाऱ्यांनी पोलिसांच्या बैठकीत केली होती. त्यानंतर मध्यभागातील दारू दुकाने बंद ठेवण्याबाबतचा प्रस्ताव पोलीस आयुक्त अमितेश कुमार यांनी जिल्हाधिकारी सुहास दिवसे यांना पाठविला. जिल्हाधिकारी दिवसे यांनी याबाबतचे आदेश दिले. त्यानुसार गणेशोत्सवात मद्यविक्री दुकाने बंद ठेवण्याचे आदेश दिले आहेत, असे अतिरिक्त आयुक्त प्रवीणकुमार पाटील यांनी सांगितले.
विसर्जन मिरवणुकीची सांगता झाल्यानंतर १८ सप्टेंबर रोजी मद्यविक्रीची दुकाने सुरु करण्यात येणार आहेत, असे आदेश देण्यात आले आहेत. अनंत चतुर्दशीच्या दिवशी पुणे, पिंपरी-चिंचवड आणि उर्वरित ग्रामीण भागात मद्यविक्री बंद असणार आहे. पुणे शहरातील विसर्जन मिरवणूक मार्गावरील मद्यविक्रीची दुकाने, मद्यालये विसर्जन मिरवणूक संपेपर्यंत बंद ठेवण्यात येणार आहे
गणेशोत्सवाच्या पाचव्या व सातव्या दिवशी (११ आणि १३ सप्टेंबर) गणेश विसर्जन होणाऱ्या परिसरातील मिरवणूक मार्गावरील सर्व मद्यविक्री दुकाने, मद्यालये बंद ठेवण्यात येणार आहेत. ज्या ठिकाणी सार्वजनिक गणेश विसर्जन मिरवणुका असतील, त्या ठिकाणी विसर्जन मिरवणूक मार्गावरील सर्व प्रकारची मद्यविक्री दुकाने बंद ठेवण्यात येणार आहेत, असे जिल्हाधिकाऱ्यांनी दिलेल्या आदेशात म्हटले आहे.
आदेशाचा भंग करून कोणी मद्यविक्री करत असल्याचे आढळून आल्यास पोलिसांकडून कडक कारवाई करण्यात येईल. उत्पादन शुल्क विभागाच्या भरारी पथकांनी मद्यविक्री बंदीच्या आदेशाचे पालन न केल्यास कारवाई करावी.
– प्रवीणकुमार पाटील, अतिरिक्त पोलीस आयुक्त, दक्षिण प्रादेशिक विभाग, पुणे पोलीस
.png "Videos"){kind=small}
