टाळ-मृदंगाच्या गजरात पुणे-अक्कलकोट पालखी मार्गस्थ; 750 तरुणांनी केला व्यसनमुक्तीचा संकल्प

पुणे ते अक्कलकोट पायी पालखी सोहळ्याने शुक्रवारी ( ता. १३ नोव्हेंबर) रोजी सकाळी १० च्या सुमारास नवा बुधवार पेठ येथील स्वामी समर्थ मठापासून प्रस्थान केले.

• ‘श्री स्वामी समर्थ’च्या जयघोषात पुणे-अक्कलकोट पालखीचे प्रस्थान
• ७५० तरुणांचा व्यसनमुक्तीचा संकल्प
• पुणे-अक्कलकोट पालखीला तरुणाईचा मोठा प्रतिसाद

पुणे : “भिऊ नकोस मी तुझ्या पाठीशी आहे,” असा भक्तांना अभय देणाऱ्या श्री स्वामी समर्थांच्या जयघोषात, टाळ-मृदंगाच्या निनादात आणि अतिशय भक्तिमय वातावरणात महाराष्ट्रातील मानाची पहिली पालखी म्हणून ओळखल्या जाणाऱ्या पुणे ते अक्कलकोट पायी पालखी सोहळ्याने शुक्रवारी ( ता. १३ नोव्हेंबर) रोजी सकाळी १० च्या सुमारास नवा बुधवार पेठ येथील स्वामी समर्थ मठापासून प्रस्थान केले. शिक्षण महर्षी डाॅ. पी.डी. पाटील यांच्या शुभहस्ते विधिवत पादुका पूजन आणि महाआरती झाल्यानंतर हा भव्य सोहळा अक्कलकोटच्या दिशेने मार्गस्थ झाला. या सोहळ्याचे अध्यक्ष राजेंद्र उर्फ आण्णा देशमुख  यांच्या नेतृत्वाखाली आयोजित या पदयात्रेला यंदा तरुणांचा मोठा प्रतिसाद लाभला आहे.

 

७५० तरुणांनी घातल्या माळा, व्यसनमुक्तीचा अनोखा संदेश

या पालखी सोहळ्याचे सर्वात मोठे वैशिष्ट्य म्हणजे तरुण पिढीचा सहभाग. अध्यक्ष राजेंद्र आण्णा देशमुख हे सातत्याने तरुणांना व्यसनापासून परावृत्त करून आध्यात्माचा मार्ग दाखवण्याचे मोलाचे कार्य करत आहेत. त्यांच्या या प्रेरणेतून यंदाच्या पालखी सोहळ्यात तब्बल ७५० तरुणांनीई विधिवत माळा घालून व्यसनमुक्तीचा आणि स्वामी सेवेचा संकल्प केला आहे. तरुणाईला भक्तीच्या मार्गाशी जोडणाऱ्या या उपक्रमाचे सर्वत्र कौतुक होत आहे.

मान्यवरांच्या हस्ते पूजन आणि सत्कार

प्रस्थान सोहळ्याच्या निमित्ताने शिक्षण महर्षी डॉ. पी. डी. पाटील यांच्या हस्ते पादुका पूजन संपन्न झाले. यावेळी आयोजकांच्या वतीने डॉ. पी. डी. पाटील आणि नगरसेविका स्वप्नाली पंडित यांचा विशेष सत्कार करण्यात आला. ३५ वर्षांपासून अखंडित सुरू असलेल्या या सोहळ्याच्या नियोजनात प्रतिष्ठानचे सर्व विश्वस्त आणि सेवेकरी परिश्रम घेत आहेत.

अक्कलकोट येथे २ कोटींची भव्य स्वागत कमान आणि भक्त निवासाचा संकल्प

केवळ पायी वारीपुरते मर्यादित न राहता, भाविकांच्या कायमस्वरूपी सोयीसाठी अध्यक्ष राजेंद्र आण्णा देशमुख यांनी मोठा पुढाकार घेतला आहे. त्यांच्या प्रयत्नांतून अक्कलकोट येथे तब्बल दोन कोटी रुपये खर्च करून भव्य स्वागत कमान उभारण्याचे काम सध्या वेगाने सुरू आहे. यासोबतच, अक्कलकोटला येणाऱ्या हजारो भाविकांची निवासाची उत्तम सोय व्हावी, यासाठी एक भव्य भंक्त निवास बांधण्याच्या हालचालींनाही वेग आला आहे.

हे सुद्धा वाचा : पुणे शहरात 31 किमीचे दोन भुयारी मार्ग उभारण्याची तयारी; वाहतूक कोंडी फोडण्यासाठी मेगा प्लॅन

१२ दिवस आणि ३०० किलोमीटरचा भक्तीमय प्रवास

पुणे ते अक्कलकोट हा संपूर्ण पायी प्रवास सोलापूरमार्गे सुमारे २९० ते ३१० किलोमीटरचा असून तो तब्बल १२ दिवस चालणार आहे. दररोज २० ते २५ किलोमीटरचा टप्पा पार करत हा सोहळा मंगळवार, दि. २४ नोव्हेंबर २०२६ रोजी अक्कलकोट नगरीत दाखल होणार आहे. मार्गातील प्रत्येक गावात निवासाची, न्याहारीची आणि महाप्रसादाची चोख व्यवस्था करण्यात आली असून संपूर्ण मार्ग ‘श्री स्वामी समर्थ’ नामाच्या गजराने दुमदुमून गेला आहे.

“तरुण पिढी व्यसनाच्या आहारी न जाता त्यांनी आध्यात्म आणि राष्ट्रनिर्माणाच्या मार्गावर चालावे, हाच आमचा मुख्य उद्देश आहे. यंदा ७५० तरुणांनी माळा घालून व्यसनमुक्तीचा निर्धार केला, हेच स्वामींच्या कृपेचे फळ आहे. तसेच, अक्कलकोट येथे दोन कोटींची स्वागत कमान आणि भव्य भक्त निवास उभारून भाविकांची सेवा करण्याचा आमचा संकल्प आहे.” — राजेंद्र देशमुख (अध्यक्ष, पालखी सोहळा आयोजन समिती)