Railway News : पुणे रेल्वे विभागाचा अनधिकृत विक्रेत्यांना दणका; सात हजारांहून अधिक प्रकरणे नोंद

Pune railway division : पुणे रेल्वे विभागाने अनधिकृत विक्रेते आणि पिण्याच्या पाण्याच्या बेकायदेशीर विक्रीविरोधात मोठी कारवाई केली आहे. माहितीनुसार, एप्रिल २०२५ ते मार्च २०२६ दरम्यान ७,११८ प्रकरणे नोंदवली गेली.

• पुणे रेल्वे विभागाचा अनधिकृत विक्रेत्यांना दणका
• सात हजारांहून अधिक प्रकरणे नोंद
• १४० पाण्याचे बॉक्स जप्त

Pune Railway News Marathi : चंद्रकांत कांबळे : पुणे रेल्वे विभागाकडून अनधिकृत विक्रेते आणि अनधिकृत पिण्याचे पाणी (पीडीड्ब्ल्यू) विक्री करणाऱ्यांविरोधात कारवाई करण्यात आली आहे. एप्रिल २०२५ ते १२ मार्च २०२६ या कालावधीत एकूण ७ हजार ११८ प्रकरणे नोंदवण्यात आली आहेत. ही कारवाई रेल्वेच्या व्यावसायिक विभाग आणि रेल्वे सुरक्षा दल (आरपीएफ) यांच्या संयुक्त मोहिमेतून करण्यात आली.

हे देखील वाचा : Railway News : प्रवाशांना लुटणाऱ्या विक्रेत्यांवर कारवाईचा दणका; 121 जणांवर दंडात्मक कारवाई

या कारवाईत आरपीएफ कडून ६,४०७ फेरीवाल्यांवर कारवाई करण्यात आली, तर व्यावसायिक विभागाकडून ३४८ जणांवर खटले दाखल करण्यात आले. या संपूर्ण कारवाईतून एकूण ५८ लाख ४८ हजार ३३० रुपयांचा दंड वसूल करण्यात आला आहे. एप्रिल ते ऑगस्ट दरम्यान कारवाईचे प्रमाण अधिक दिसून आले. मे आणि जून महिन्यांत अनुक्रमे ७७४ आणि ८०५ प्रकरणे नोंदवली गेली, जे या कालावधीतील उच्चांक मानले जात आहेत. ऑक्टोबर, नोव्हेंबर आणि डिसेंबर महिन्यांतही सातत्याने कारवाई सुरू ठेवण्यात आली. जानेवारी आणि फेब्रुवारी महिन्यांत अनुक्रमे ३३२ आणि ३०३ प्रकरणे समोर आली, तर १२ मार्च २०२६ पर्यंत ३० प्रकरणांची नोंद झाली आहे.
चौकट

१४० पाण्याचे बॉक्स जप्त

अनधिकृत पिण्याच्या पाण्याच्या विक्रीवरही कारवाई करण्यात आली. एकूण १,६८७ पाण्याच्या बाटल्या, म्हणजेच सुमारे १४० बॉक्स जप्त करण्यात आले. विशेष म्हणजे फेब्रुवारी महिन्यात सर्वाधिक ६२१ बाटल्या जप्त करण्यात आल्या.

मध्य रेल्वे पुणे विभागाचे जनसंपर्क अधिकारी हेमंत कुमार बेहरा यांनी प्रवाशांच्या सुरक्षिततेसाठी ही मोहीम पुढेही सुरू राहणार आहे. तसेच प्रवाशांनी फक्त अधिकृत विक्रेत्यांकडूनच अन्न व पिण्याचे पाणी खरेदी करावे असे म्हटले आहे.

आर्थिक वर्ष २०२५-२६ मध्ये करण्यात आलेली कारवाई

हे देखील वाचा : Pune Mumbai Expressway Traffic : लोणावळा घाटात पुन्हा भीषण वाहतूक कोंडी; ४-५ किमी वाहनांच्या रांगा, प्रवासी त्रस्त

डिस्क्लेमर: हे नवराष्ट्र वृत्तपत्राचे स्वयंचलित न्यूज फीड आहे. ते navarashtra.com च्या कर्मचाऱ्यांनी संपादित केलेले नाही.