दणदणाट करणाऱ्या डीजेला पुणे पोलिसांचा दणका; तब्बल 14 लाखांचा ट्रक-साउंड सिस्टीम जप्त

मोहम्मदवाडी परिसरात गणपती स्थापना मिरवणुकीदरम्यान क्षमतेपेक्षा अधिक आवाजात प्लाझ्मा साऊंड सिस्टीम वाजविणाऱ्या मंडळावर काळेपडळ पोलिसांनी कारवाई केली आहे.

पुणे : गणेशोत्सवाच्या काळात ध्वनिप्रदूषण करणाऱ्या डीजेवर पुणे पोलिसांनी कारवाईचा बडगा उगारण्यास सुरूवात केली असून, मोहम्मदवाडी परिसरात गणपती स्थापना मिरवणुकीदरम्यान क्षमतेपेक्षा अधिक आवाजात प्लाझ्मा साऊंड सिस्टीम वाजविणाऱ्या मंडळावर काळेपडळ पोलिसांनी कारवाई केली आहे. पोलिसांनी डीजे साऊंड सिस्टीमसह ती वाहून नेणारा टाटा ७०९ ट्रक असा तब्बल १४ लाख रुपयांचा मुद्देमाल जप्त केला आहे.

 

ही कारवाई १४ सप्टेंबर रोजी सायंकाळी साडेपाचच्या सुमारास मोहम्मदवाडीतील शंभू कॉलनी येथील शेल पेट्रोल पंपाजवळ करण्यात आली आहे. गणपती स्थापना मिरवणुकीत मोठ्या आवाजात डीजे वाजविला जात असल्याची माहिती पोलिसांना मिळाली होती. त्यानंतर काळेपडळ पोलिसांचे पथक तातडीने घटनास्थळी दाखल झाले. पोलिसांनी तांत्रिक तज्ज्ञाच्या मदतीने साऊंड सिस्टीमची तपासणी केली. यावेळी अधिक क्षमतेच्या प्लाझ्मा साऊंड सिस्टीमचा वापर होत असल्याचे निदर्शनास आले. त्यामुळे पोलिसांनी तत्काळ डीजे साऊंड सिस्टीम व ती वाहून नेण्यासाठी वापरण्यात येणारा ट्रक ताब्यात घेतला.

पोलिसांनी जप्त केलेल्या टाटा ७०९ ट्रकची किंमत सुमारे सात लाख रुपये, तर साऊंड सिस्टीमची किंमतही सुमारे ७ लाख रुपये आहे. जप्त केलेल्या साऊंड सिस्टीममध्ये दोन बेस, दोन टॉप, मिक्स मशीन तसेच प्लाझ्मा सिस्टीमचा समावेश आहे. अशाप्रकारे पोलिसांनी एकूण सुमारे १४ लाख रुपयांचा मुद्देमाल जप्त केला आहे.

हे सुद्धा वाचा : महावितरणच्या कर्मचाऱ्याला बुक्क्यांनी मारहाण, परतूर येथील घटनेनं खळबळ; तिघांविरोधात गुन्हा दाखल

कारवाई सुरू राहणार 

गणेशोत्सवात ध्वनिप्रदूषणाच्या नियमांचे उल्लंघन करणाऱ्यांवर कारवाई करण्याचे पोलिसांनी स्पष्ट केले असून, मोठ्या आवाजात डीजे वाजविणाऱ्यांवर यापुढेही कारवाई सुरू राहणार असल्याचे पोलिसांकडून सांगण्यात आले.

साऊंड व्यावसायिकांचा मूक मोर्चा

साऊंड, डीजे व संबंधित व्यावसायिकांवर होत असलेल्या कारवाईच्या निषेधार्थ तसेच विविध प्रलंबित मागण्यांकडे शासन व प्रशासनाचे लक्ष वेधण्यासाठी साऊंड व्यावसायिकांनी बुधवारी (दि. १६) पुण्यात मूक मोर्चा काढला. भारतरत्न डॉ. बाबासाहेब आंबेडकर स्मारक, पुणे स्टेशन येथून सुरू झालेला मोर्चा जिल्हाधिकारी कार्यालयावर नेण्यात आला. साऊंड सिस्टीम, लाईट, मंडप, जनरेटर, डीजे, इव्हेंट आणि संबंधित व्यवसायातील व्यावसायिक मोठ्या संख्येने मोर्चात सहभागी झाले होते. दुपारी १२ ते ३ या वेळेत झालेल्या या आंदोलनातून शांततापूर्ण व लोकशाही मार्गाने शासनाचे लक्ष वेधण्यात आले. साऊंड व्यावसायिकांनी कायद्याचे पालन करून तसेच प्रशासनाने घालून दिलेल्या नियम व अटींचे पालन करत व्यवसाय करण्याची तयारी दर्शविली. मात्र, नियमांचे पालन करूनही कारवाई होणे, साऊंड सिस्टीम जप्त करणे आणि व्यवसायिकांवर कारवाई होत असल्यामुळे व्यावसायिकांसमोर आर्थिक अडचणी निर्माण होत असल्याचे संघटनेने म्हटले.