New Mumbai : नवी मुंबई विमानतळावरील 'या' सुविधेत वाढ, प्रवाशांना होणार फायदा
नवी मुंबई आंतरराष्ट्रीय विमानतळाने (NMIA) (New Mumbai) मंगळवारी सांगितले की, विमानसेवा क्षेत्रातील केटरिंग कंपनी ताजसॅट्ससोबत सुरू असलेली त्यांची इन-फ्लाइट केटरिंग सुविधा हिवाळी 2026-27 वेळापत्रकापूर्वी विमान कंपन्यांच्या वाढत्या सेवांना मदत करण्यासाठी सज्ज आहे. हे वेळापत्रक 25 ऑक्टोबरपासून 27 मार्च 2027 पर्यंत असेल.
विमानतळ परिसरात असलेल्या या फ्लाइट किचनमध्ये सध्या दररोज 40 हून अधिक विमानांसाठी खाद्यपदार्थ तयार केले जातात. या किचनची दररोज 7,500 मील (जेवणाचे डबे) तयार करण्याची क्षमता आहे.
विमान कंपन्या आणि प्रवाशांची संख्या वाढल्यास या सुविधेची क्षमता वाढवून दररोज 15 हजार मील तयार करता येऊ शकतात. नवी मुंबई आंतरराष्ट्रीय विमानतळाचे मुख्य विमानतळ अधिकारी सुभाष मुरिकेंचरी म्हणाले, NMIAचे विमानसेवा नेटवर्क विस्तारत असताना त्याला पूरक पायाभूत सुविधाही त्याच वेगाने विकसित होणे आवश्यक आहे.
ते म्हणाले, ताजसॅट्सचे फ्लाइट किचन विमान कंपन्यांना वाढती मागणी पूर्ण करण्यास मदत करते आणि प्रवाशांच्या खाद्यपदार्थांशी संबंधित अनुभवात सुधारणा करते. या सुविधेमध्ये उत्पादनासाठी आवश्यक पायाभूत सुविधा, रेफ्रिजरेशन सिस्टिम आणि ऑपरेशनल प्रक्रिया यांचा समावेश आहे. विमान कंपन्यांच्या वेळापत्रकानुसार आणि मागणीत होणाऱ्या बदलांनुसार काम करता यावे, यासाठी या सुविधा विकसित करण्यात आल्या आहेत.
विमानतळ परिसरातील या किचनच्या स्थानामुळे विमानांपर्यंत खाद्यपदार्थ पोहोचवण्याची प्रक्रिया अधिक सुलभ होते. NMIAने सांगितले की, भारतातून ये-जा करणाऱ्या आंतरराष्ट्रीय विमान कंपन्यांना या सुविधेमुळे विमानतळाजवळच आणखी एका केटरिंग पर्यायाचा लाभ मिळतो.
विमानतळाच्या माहितीनुसार, भारतातून उड्डाण करणाऱ्या सुमारे ४० टक्के आंतरराष्ट्रीय विमान कंपन्या स्वतःच्या फ्लाइट किचनवरून केटरिंगची व्यवस्था करतात. NMIAची इन-फ्लाइट केटरिंग पायाभूत सुविधा ही गरज पूर्ण करण्यासोबतच देशांतर्गत विमान कंपन्यांच्या केटरिंग गरजा लक्षात घेऊन विकसित करण्यात आली आहे.
या सुविधेत देशांतर्गत आणि आंतरराष्ट्रीय अशा दोन्ही प्रकारच्या विमान कंपन्यांना केटरिंग सेवा दिली जाते. विशेष मील, अॅलर्जी लक्षात घेऊन विविध खाद्य पदार्थ तयार केले जातात.
NMIAने सांगितले की, या किचनमध्ये अन्न सुरक्षा आणि गुणवत्तेच्या मानकांचे पालन केले जाते. यात हॅझर्ड अॅनालिसिस अँड क्रिटिकल कंट्रोल पॉइंट्स (HACCP), ISO 22000 आणि भारतीय अन्न सुरक्षा व मानक प्राधिकरणाच्या (FSSAI) नियमांचा समावेश आहे.
ताजसॅट्स गेल्या चार दशकांहून अधिक काळापासून विमानसेवा केटरिंग क्षेत्रात कार्यरत आहे. मुंबईतील छत्रपती शिवाजी महाराज आंतरराष्ट्रीय विमानतळावरही कंपनीचे फ्लाइट किचन कार्यरत आहे.
विमानतळाने सांगितले की, ही सुविधा आधीपासूनच कार्यान्वित असून, भविष्यात विमानसेवा कनेक्टिव्हिटी आणि प्रवाशांची संख्या वाढल्यास तिची क्षमता आणखी वाढवता येणार आहे.
.png "Videos"){kind=small}
