चिपळूणमध्ये मतमोजणीपूर्वी तणाव! नगराध्यक्ष उमेदवारासह २६ जणांकडून EVM सुरक्षेसाठी ‘Z प्लस’ सुरक्षा आणि जॅमरची मागणी

चिपळूण नगर परिषद निवडणुकीतील ठाकरे-पवार आघाडीच्या उमेदवारांकडून EVM स्ट्रॉंग रूमला 'Z प्लस' सुरक्षा आणि नेटवर्क जॅमरची मागणी. नगराध्यक्ष उमेदवार रमेशभाई कदम यांच्यासह २६ जणांचे निवेदन.

 

• चिपळूण नगर परिषद मतमोजणी
• स्ट्रॉंग रूमला ‘झेड प्लस’ सुरक्षा
• नेटवर्क जॅमर आणि संचारबंदीची आघाडी कडून मागणी!

चिपळूण: चिपळूण नगर परिषद सार्वत्रिक निवडणुकीची प्रक्रिया ०२ डिसेंबर २०२५ रोजी पार पडली असून, मतमोजणी पूर्ण होईपर्यंत शिवसेना (उद्धव बाळासाहेब ठाकरे) आणि राष्ट्रवादी काँग्रेस (शरदचंद्र पवार) या मित्रपक्षांच्या उमेदवारांनी एकत्रितपणे निवडणूक निर्णय अधिकारी, चिपळूण यांच्याकडे एक महत्त्वाचे आणि आग्रही निवेदन सादर केले आहे. कोर्टाच्या आदेशानुसार निवडणूक कार्यक्रमात बदल झाल्याच्या पार्श्वभूमीवर, मतदान यंत्रणा (EVM) ठेवलेल्या स्ट्रॉंग रूम्सच्या सुरक्षेमध्ये वाढ, नेटवर्क जॅमर बसवणे, सीसीटीव्ही कव्हरेजची मागणी आणि मतमोजणीच्या दिवशी संचारबंदी लागू करण्याची मागणी निवेदनात करण्यात आली आहे.

आघाडीच्या नेत्यांची उपस्थिती

निवेदनावर शिक्कामोर्तब करण्यासाठी माजी आमदार आणि आघाडीचे नगराध्यक्ष पदाचे उमेदवार रमेश भाई कदम यांच्यासह प्रमुख नेते उपस्थित होते. यात शिरीष काटकर, फैसल कास्कर, मोहन शेठ मिरगल, निहार गुढेकर, तसेच राष्ट्रवादी कॉंग्रेस (शरदचंद्र पवार) पक्षाचे चिपळूण तालुका अध्यक्ष मुराद आड्रेकर, शहर अध्यक्ष रतन पवार, आणि युवक राष्ट्रवादी काँग्रेसचे रत्नागिरी जिल्हा कार्याध्यक्ष अक्षय केदारी यांचा समावेश होता.या बैठकीत उपस्थित असलेल्या दोन्ही पक्षांच्या उमेदवारांनी मतमोजणी प्रक्रियेत कोणतीही शंका न राहता पूर्ण पारदर्शकता राखली जावी, अशी मागणी केली.

हे देखील वाचा: Local Body Elections : EVM मशीनची पूजा करणं पडलं महागात; पुण्यातील महिला उमेदवारांवर गुन्हा दाखल

उमेदवारांनी निवडणूक अधिकाऱ्यांकडे केलेल्या महत्त्वाच्या मागण्या खालीलप्रमाणे आहेत:

• स्ट्रॉंग रूमला कडेकोट सुरक्षा: मतमोजणीपूर्वी मतदान यंत्रे (EVM) ठेवलेल्या स्ट्रॉंग रूमची सिक्युरिटी तातडीने ‘झेड प्लस’ (Z Plus) सुरक्षेप्रमाणे वाढवण्यात यावी.
• नेटवर्क जॅमर बसवा: स्ट्रॉंग रूम परिसरात आणि मतमोजणी केंद्रावर कोणतेही गैरप्रकार टाळण्यासाठी नेटवर्क जॅमर बसवण्यात यावे.
• मतमोजणी केंद्राजवळ संचारबंदी: मतमोजणी पूर्ण होईपर्यंत केंद्राच्या १००० मीटर परिसरामध्ये संचारबंदी (Curfew) लागू करावी, जेणेकरून शांतता राखली जाईल.
• अनाधिकृत व्यक्तींना प्रवेश बंदी: मतमोजणी केंद्राच्या १००० मीटर परिसरात कोणत्याही राजकीय पक्षाचे पदाधिकारी, कार्यकर्ते किंवा उमेदवारांनी प्रवेश करू नये. तसेच, मतमोजणीच्या दिवशी विश्रामगृह किंवा इतरत्र कोणत्याही प्रकारच्या राजकीय बैठका त्वरित थांबवण्याची मागणी करण्यात आली आहे.
• EVM पुनर्प्रशिक्षण/तपासणी: मतमोजणी प्रक्रियेतील पारदर्शकतेसाठी आवश्यक असल्यास EVM ची पुनर्प्रशिक्षण/तपासणी (Recalibration/Verification) करण्यात यावी.

या प्रमुख मागण्यांसह, नगराध्यक्ष पदाचे उमेदवार रमेशभाई कदम यांच्यासह नगरसेवक पदाचे तब्बल २६ उमेदवार (आरिफ हजवाने, इम्तियाज मुकादम, अजय भालेकर, वैशाली कदम, शैलेश टाकळे, नसरीन खडस, डॉ. नियाझ पाते, समिधा जोगळे, राहुल कांबळे, सपना पवार, राजेश केळसकर, नगमा रियाने, सुनील कुलकर्णी, साक्षी शिंदे, Adv. अजय कांबळी, नुपुर बचीम, राकेश दाते, युगंधरा शिंदे, सानिका टाकळे, मोहन मिरगल, उमा देसाई, गणेश फके, महाडीक, विकी नरळकर आणि कांचन शिंदे) यांनी स्वाक्षरी करून हे संयुक्त निवेदन निवडणूक निर्णय अधिकाऱ्यांकडे सादर केले. निष्पक्ष आणि शांततापूर्ण मतमोजणी प्रक्रियेसाठी आवश्यक उपाययोजना करण्याची आग्रही मागणी या सर्व उमेदवारांनी केली आहे.

हे देखील वाचा: Election Commission : राजकीय पक्षांपेक्षा कायदा महत्त्वाचा; टीकाकार नेत्यांना निवडणूक आयोगाचा दणका!