Chhatrapati Sambhajinagarमधील पाच रस्त्यांच्या कामासाठी १५ कोटी रूपये मंजूर; प्रारुप आराखडा प्रक्रिया सुरू

या कामांमध्ये जालना रोड, पडेगाव-दौलताबाद टी-पॉइंट, जळगाव रोड, बीड बायपास आणि पैठण रोड या महत्त्वाच्या मार्गांचा समावेश आहे.

• संभाजीनगरमधील वाढत्या वाहतूक कोंडीला उतारा नवी उपाययोजना
• स्मार्ट सिटी डेव्हलपमेंट कॉर्पोरेशनने १५ कोटी रुपयांचा निधी मंजूर
• शहरातील रस्त्यांवर अनियमित पद्धतीने वाहन उभी करण्याच्या प्रकारांवर अंकुश ठेवण्यासाठी महापालिका स्मार्ट पार्किंग धोरण

Chhatrapati Sambhajinagar Development: शहरातील वाढत्या वाहतूक कोंडीला उतारा देण्यासाठी आणि शहराच्या मुख्य प्रवेशद्वारांना नव्या रूपात साकारण्यासाठी महापालिकेने राबविलेल्या अतिक्रमण निर्मूलन मोहिमेला मोठे यश मिळाले आहे. या मोहिमेत पाच महत्त्वाच्या राष्ट्रीय व राज्य महामार्ग जोडणाऱ्या रस्त्यांवर झालेली तब्बल सहा हजारांहून अधिक मालमत्ता जमीनदोस्त करण्यात आल्या. आता या रस्त्यांचे सुशोभिकरण, रुंदीकरण, सेवा रस्ते निर्माण, पादचारी मार्ग, विद्युत प्रकाशयोजना, ड्रेनेज व्यवस्था आदींचा समावेश असलेला सविस्तर प्रकल्प आराखडा (DPR) तयार करण्याची प्रक्रिया सुरू झाली असून, त्यासाठी स्मार्ट सिटी डेव्हलपमेंट कॉर्पोरेशनने १५ कोटी रुपयांचा निधी मंजूर केल्याची माहिती बैठकीत देण्यात आली.

Maharashtra Politics: निकालासाठी 15 दिवसांची प्रतीक्षा; एका मताला 15 ते 20 हजारांचा भाव अन्…

स्मार्ट सिटीच्या संचालक मंडळाची बैठक अलीकडेच झाली. यामध्ये अध्यक्षा विनीता सिंघल, पोलिस आयुक्त प्रवीण पवार, मनपा प्रशासक व स्मार्ट सिटीचे सीईओ जी. श्रीकांत, जिल्हाधिकारी दिलीप स्वामी, संचालक भास्कर मुंडे, उल्हास गवळी, उपमुख्य कार्यकारी अधिकारी रवींद्र जोगदंड आणि वित्तीय अधिकारी उत्तम चव्हाण उपस्थित होते. महापालिकेने शहर विकास आराखड्यात नमूद मंजूर रस्त्यांवरील बेकायदा बांधकामे दूर केली. आता या पाडापाडीमुळे मोकळी झालेली जागा वापरून वाहतूक नियोजन सक्षम करण्यासाठीचा आराखडा शासनाकडे पाठविण्यात येणार आहे. तसेच केंद्र किंवा विविध वित्तपुरवठा संस्थांकडून आर्थिक सहाय्य मिळविण्यासाठीही प्रयत्न करण्यात येत आहेत.

या रस्त्यांना मिळणार नवे स्वरूप

या कामांमध्ये जालना रोड, पडेगाव-दौलताबाद टी-पॉइंट, जळगाव रोड, बीड बायपास आणि पैठण रोड या महत्त्वाच्या मार्गांचा समावेश आहे. या मार्गावर दोन्ही बाजूंना सर्व्हिस रोड, बस-बे, सिग्नल सुधारणा, तसेच वाहतूक नियंत्रणासाठी आवश्यक सुविधा उभारल्या जाणार आहेत.

स्मार्ट पार्किंग व क्लीन स्ट्रीट ॲपलाही मंजुरी

शहरातील रस्त्यांवर अनियमित पद्धतीने वाहन उभी करण्याच्या प्रकारांवर अंकुश ठेवण्यासाठी महापालिका स्मार्ट पार्किंग धोरण लागू करत आहे. त्यासाठी खास स्मार्ट पार्किंग अॅप विकसित करण्यात येणार आहे. तसेच रस्त्यांची स्वच्छता, कचरा व्यवस्थापन आणि निरीक्षण सुलभ करण्यासाठी क्लीन स्ट्रीट अॅप देखील तयार होणार असून, दोन्ही प्रस्तावांना बैठकीत हिरवा कंदील देण्यात आला.