Satara News : ग्रंथदिंडीने मराठी साहित्य संमेलनाचा शुभारंभ; पोलिस बँड पथकाच्या निनादात सातारा साहित्यनगरीत ध्वजारोहण

स्वराज्यरक्षक छत्रपती शाहू महाराज साहित्यनगरीत ग्रंथदिंडी आणि राज्य पोलिस बँडच्या निनादात ध्वजारोहण होताच 99 व्या अखिल भारतीय मराठी साहित्य संमेलनातील कार्यक्रमांचा उत्साहात प्रारंभ झाला.

• ग्रंथदिंडीने मराठी साहित्य संमेलनाचा शुभारंभ
• पोलिस बँड पथकाच्या निनादात सातारा साहित्यनगरीत ध्वजारोहण

पुणे : ऐतिहासिक साताऱ्यात नववर्षांची पहाट साहित्याच्या तेजाने उजळली. स्वराज्यरक्षक छत्रपती शाहू महाराज साहित्यनगरीत ग्रंथदिंडी आणि राज्य पोलिस बँडच्या निनादात ध्वजारोहण होताच 99 व्या अखिल भारतीय मराठी साहित्य संमेलनातील कार्यक्रमांचा उत्साहात प्रारंभ झाला.अखिल भारतीय मराठी साहित्य महामंडळाच्या 99 व्या साहित्य संमेलनाचा शुभारंभ गुरुवारी प्रा. मिलिंद जोशी यांच्या हस्ते झालेल्या ध्वजारोहणाने झाला. यावेळी सार्वजनिक बांधकाम मंत्री तथा स्वागताध्यक्ष श्रीमंत छत्रपती शिवेंद्रसिंहराजे भोसले यांची प्रमुख उपस्थिती होती. 1 ते 4 जानेवारी या कालावधीत शाहू स्टेडियम येथे महाराष्ट्र साहित्य परिषद आणि मावळा फाउंडेशन यांच्या वतीने हे संमेलन होत आहे. माजी संमेलनाध्यक्ष डॉ. तारा भवाळकर, नियोजित अध्यक्ष विश्वास पाटील, महामंडळाच्या प्रमुख कार्यवाह सुनीताराजे पवार उपस्थित होते.

कवीकट्टा बहरला

कवीकट्टथासाठी महाराष्ट्रासह बृहन्महाराष्ट्रातून उदंड प्रतिसाद मिळाला असून, 1762 कवितांमधून 450 कवितांची निवड कट्ट्यासाठी करण्यात आली आहे. त्यामध्ये बृहन्महाराष्ट्रातील 140 कविता आहेत. जपान आणि आबुधाबी येथूनही एकेक कविता आली आहे. 22 तास 22सत्रांत कवीकट्टा सुरू राहणार आहे, असे आयोजकांनी सांगितले.

वैचारिक वारसाचे घडले दर्शन

99व्या अखिल भारतीय मराठी साहित्य संमेलनाच्या निमित्ताने काढण्यात आलेल्या ग्रंथदिंडीने मराठी भाषेचा मानबिंदू जपणारी संस्कृती, संतपरंपरा आणि वैचारिक वारसा यांचे प्रभावी दर्शन घडवले. पारंपरिक वेशभूषा, सजवलेले रथ, बालगोपाळांचा उत्स्फूर्त सहभाग आणि नागरिकांचा जल्लोष यामुळे संपूर्ण शहर उत्साहात न्हाऊन निघाले, राजवाडा येथून संमेलनस्थळ असलेल्या शाहू मैदानापर्यंत निघालेल्या या ग्रंथदिंडीत लीळाचरित्र, तुकाराम गाथा, ज्ञानेश्वरी, भारताचे संविधान, ‘महासम्राट’ आणि ‘सीतायन’ या ग्रंथांच्या पालख्या आकर्षणाचे केंद्र ठरल्या.