Satara News : बावधन परिसरात खाणपट्ट्याविरोधात आमरण उपोषण सुरू

Satara News : सातारा जिल्ह्यातील बावधन परिसरात प्रस्तावित खाणपट्ट्याविरोधात ग्रामस्थांनी आमरण उपोषण सुरू केले खाणपट्ट्यामुळे परिसरातील पर्यावरण, शेती आणि स्थानिक नागरिकांवर परिणाम होण्याची भीती व्यक्त करत ग्रामस्थांनी विरोधाची भूमिका घेतली आहे. मागण्या मान्य होईपर्यंत आंदोलन सुरू ठेवण्याचा निर्धार उपोषणकर्त्यांनी व्यक्त केला आहे

Satara News : बावधन, म्हातेकरवाडी, अनपटवाडी, वाघजाईवाडी, कणूर व दरेवाडी परिसरातील ग्रामस्थांनी बावधन येथील तामखडा शिवारातील गट क्रमांक ३१६६/३ मध्ये खडी स्टोन क्रशर व गौण खनिज खाणपट्टा सुरू करण्यास दिलेल्या परवानगीच्या निषेधार्थ बुधवारपासून (दि. २) वाई तहसील कार्यालयासमोर आमरण उपोषण सुरू केले आहे.

गेल्या पाच वर्षांपासून ग्रामस्थांकडून या खाणपट्ट्यास विरोध केला जात असून, ग्रामसभांचे ठराव तसेच जिल्हाधिकारी, महसूल विभाग व पर्यावरण विभागाकडे हरकत व तक्रार अर्ज साद करण्यात आले आहेत. मात्र, ग्रामस्थांचा विरोध असतानाही खाणपट्ट्याच्या संदर्भात परवानगी व मोजणीची कार्यवाही सुरू असल्याचा आरोप आंदोलकांनी केला आहे.

GI मानांकन मिळूनही कोरेगावचा घेवडा पीक विम्यापासून वंचित! अमित भोईटेंची कृषी उपसंचालकांकडे ‘ही’ मागणी

खाण व क्रशर सुरू झाल्यास मोठ्या प्रमाणात धूळ व वायुप्रदूषण होऊन शेती, पाणी स्रोत, भूजल पातळी तसेच पर्यावरणावर विपरीत परिणाम होण्याची शक्यता आहे. तसेच परिसरातील पाझर तलाव, शेतकऱ्यांच्या विहिरी, नागेवाडी कॅनॉल, म्हातेकरवाडी येथील पिण्याच्या पाण्याची टाकी व गावठाण यांनाही धोका निर्माण होऊ शकतो, अशी ग्रामस्थांची भूमिका आहे.

पंचायत समितीच्या स्वीकृत सदस्यपदासाठी इंद्रजित भिलारे यांच्या नावाची जोरदार मागणी

दरम्यान, गट क्रमांक ३१६६/३ मधील खाणपट्ट्यास दिलेली परवानगी कायमस्वरूपी रद्द करावी, बावधन पंचक्रोशीत भविष्यात खाणपट्टा व क्रशरसाठी परवानगी देऊ नये तसेच संबंधित अधिकाऱ्यांनी केलेल्या पंचनाम्याची चौकशी करून दोषींवर कारवाई करावी, अशा प्रमुख मागण्या आंदोलकांनी केल्या आहेत.

उपोषणकर्ते गणेश रामचंद्र भोसले, निलेश यशवंत भोसले व चंद्रकांत आत्माराम सुतार असून, मागण्यांवर लेखी व समाधानकारक निर्णय होईपर्यंत उपोषण सुरूच ठेवण्याचा निर्धार ग्रामस्थांनी व्यक्त केला आहे.