पाचगणी–महाबळेश्वर हे महाराष्ट्रातील प्रसिद्ध पर्यटनस्थळ असून येथे वर्षभर मोठ्या प्रमाणावर पर्यटकांची वर्दळ असते. त्यामुळे हॉटेल आणि रेस्टॉरंट व्यवसाय हा स्थानिक अर्थव्यवस्थेचा मुख्य आधार मानला जातो. मात्र गेल्या काही दिवसांपासून कमर्शियल गॅस सिलेंडर मिळण्यात अडचणी येत असल्याने अनेक हॉटेल व्यावसायिक चिंतेत आहेत. काही ठिकाणी हॉटेल स्टाफसाठी स्वयंपाक करण्यासाठी चक्क पारंपरिक चूल पेटवण्याची वेळ आली आहे. आधुनिक स्वयंपाकघर असतानाही इंधनाअभावी चुलीचा आधार घ्यावा लागत असल्याचे चित्र दिसत आहे.
सामान्यतः धाब्यावरील चुलीवरच्या जेवणाला पर्यटक पसंती देतात; मात्र आता परिस्थिती अशी निर्माण झाली आहे की, हॉटेल व्यावसायिकांनाच चुलीचा आधार घ्यावा लागत आहे. युद्ध सुरू होऊन सुमारे १३ दिवसांचा कालावधी उलटला असून त्याचे परिणाम पाचगणी–महाबळेश्वर परिसरात जाणवू लागले आहेत. गॅसचा तुटवडा वाढल्यास पर्यटन व्यवसायावर मोठा परिणाम होण्याची भीती व्यावसायिक व्यक्त करत आहेत.
या परिस्थितीमुळे काही हॉटेल धारक पर्यटकांकडून बुकिंग घेताना जेवणाची सुविधा देण्यास असमर्थ असल्याचे स्पष्ट सांगत आहेत. त्यामुळे अनेक पर्यटक केवळ निवासासाठीच हॉटेलची निवड करण्याची शक्यता व्यक्त होत आहे. युद्धाची परिस्थिती दीर्घकाळ कायम राहिल्यास पर्यटन व्यवसाय, हॉटेल उद्योग आणि स्थानिक अर्थव्यवस्थेलाही मोठा फटका बसू शकतो, अशी चिंता व्यक्त केली जात आहे.
कमर्शियल गॅस सिलेंडरच्या तुटवड्यामुळे अनेक हॉटेलांच्या रसोईघरातील मेनूकार्डवरील काही पदार्थ हळूहळू गायब होऊ लागले आहेत. स्वयंपाकासाठी गॅस उपलब्ध नसल्याने अनेक पदार्थ तयार करणे शक्य होत नाही. त्यामुळे उद्या स्नॅक सेंटरवरील वडापावसारखे लोकप्रिय पदार्थही उपलब्ध नसल्यास नवल वाटण्यासारखे राहणार नाही, अशी चर्चा व्यावसायिकांमध्ये सुरू आहे.
घरगुती सिलेंडरला शासनाने ग्राहकांना प्राधान्य दिले असून घरगुती गॅस मिळण्यासाठी आता सुमारे ३० दिवसांची प्रतीक्षा करावी लागत आहे. पूर्वी हा कालावधी २१ दिवसांचा होता. परिणामी अनेक ठिकाणी इलेक्ट्रिक शेगडीची मागणी वाढू लागली असून स्वयंपाकासाठी कोळशालाही पुन्हा महत्त्व प्राप्त होऊ लागले आहे.
.png "Videos"){kind=small}
