Tapovan School, Methi Vegetable Controversy
मिळालेल्या माहितीनुसार, तपोवन विद्यालयाने पर्यूषण काळात विद्यार्थ्यांना डब्यात मांसाहारी पदार्थांसह कांदा, लसूण, बीट आदी खाद्यपदार्थ आणण्यास बंदी घातली होती. खास बाब म्हणजे यासंदर्भात शाळा प्रशासनाकडून विद्यार्थ्यांवर काही नियमही लादण्यात आले होते. पण एका विद्यार्थ्यांने शाळेत मेथीची बाजू नेल्याचे निदर्शनास आल्याने शाळेने संबंधित विद्यार्थ्याकडून ५० रुपये दंड आकारल्याचे समोर आले.
धक्कादायक बाब म्हणजे, संबंधित विद्यार्थ्याच्या डब्यातील मेथीच्या भाजीवर आक्षेप धेत्यानंतर त्याला कॅन्टीनमधून दुसरा खाद्यपदार्थही देण्यात आला. या प्रकाराची माहिती मिळाल्यानंतर मनसेने याबाबत महापालिकेच्या शिक्षण विभागाकडे तक्रार केली. या तक्रारीची दखल घेत शिक्षण विभागाने तपोवन विद्यालयाला कारणे दाखवा नोटीस बजावली.
विद्यार्थ्यांकडून अशा प्रकारे दंड आकारण्याचा निर्णय कोणत्या नियमांच्या आधारे घेण्यात आला, पर्यूषण काळात खाद्यपदार्थांवरील निर्बंध लादण्यासाठी कोणते निर्देश देण्यात आले होते, याबाबत महापालिका प्रशासनाने स्पष्टीकरण मागवले आहेत. महत्त्वाची बाब म्हणजे, कायद्यानुसार, शाळांमध्ये विद्यार्थ्यांच्या आहारासंदर्भात धार्मिक किंवा सांस्कृतिक नियम लागू करता येऊ शकत नाही. असे असतानाही शाळेने हे निर्बंध का लादले, असा प्रश्न आता उपस्थित होत आहे. त्यामुळे या प्रकरणात शाळेकडून काय स्पष्टीकरण दिले जाते, याकडे आता पालकांचे लक्ष लागले आहे.
तपोवन विद्यालयातील डब्याचा हा वाद नवीन नसून, पर्युषण पर्वाच्या काळात विद्यार्थ्यांच्या खाद्यपदार्थांबाबत करण्यात आलेल्या कथित नियमांमुळे यापूर्वीही वाद निर्माण झाला होता. पालकांच्या तक्रारीनुसार, विद्यार्थ्यांच्या डब्यात कांदा, बटाटा, अद्रक, बीट आणि गाजर यांसारख्या भाज्या आढळल्यास ५० रुपये दंड आकारण्यात येत असल्याचा आरोप करण्यात आला होता. या तक्रारीनंतर मीरा-भाईंदर महापालिकेच्या शिक्षण विभागाने १७ सप्टेंबर रोजी तपोवन विद्यालयाला कारणे दाखवा नोटीस बजावल्याची माहिती आहे. शाळेतील विद्यार्थ्यांच्या डब्याबाबतचे नियम, त्यांची अंमलबजावणी आणि कथित दंड आकारण्याबाबत शिक्षण विभागाकडून स्पष्टीकरण मागविण्यात आले आहे.
नव्या प्रकरणात मात्र एक महत्त्वाचा प्रश्न निर्माण झाला आहे. विद्यार्थ्याच्या मेथीच्या भाजीवर आकारण्यात आलेले २० रुपये हे दंड म्हणून आकारण्यात आले होते की विद्यार्थ्याला कॅन्टीनमधून देण्यात आलेल्या खाद्यपदार्थाचे शुल्क होते, हे अद्याप स्पष्ट झालेले नाही. विद्यार्थ्याच्या वहीत ‘बंदी असलेली मेथीची भाजी’ असा शेरा का मारण्यात आला, घरून आणलेला डबा विद्यार्थ्याला का देण्यात आला नाही आणि त्याऐवजी कॅन्टीनमधून खाद्यपदार्थ देण्याचा निर्णय कोणत्या नियमाच्या आधारे घेण्यात आला, याची स्पष्टता होणे आवश्यक आहे.
पिंपरी-चिंचवडला मुसळधार पावसाने झोडपले; उकाड्याने हैराण झालेल्या नागरिकांना दिलासा
दरम्यान, या संपूर्ण प्रकरणावर तपोवन विद्यालयाचा अधिकृत खुलासा अद्याप समोर आलेला नाही. शाळेची भूमिका जाणून घेण्यासाठी संपर्क साधण्याचा प्रयत्न करण्यात आला; मात्र प्रतिसाद मिळाला नसल्याची माहिती आहे. त्यामुळे मेथीची भाजी शाळेच्या नियमांनुसार प्रतिबंधित होती का, विद्यार्थ्याच्या वहीत तसा शेरा का मारण्यात आला, २० रुपये नेमके कोणत्या कारणासाठी आकारण्यात आले आणि विद्यार्थ्याला घरचा डबा न देता कॅन्टीनमधून खाद्यपदार्थ का देण्यात आला, याची उत्तरे अद्याप अनुत्तरित आहेत.
महापालिका शिक्षण विभागाने यापूर्वीच शाळेला कारणे दाखवा नोटीस बजावल्याच्या पार्श्वभूमीवर आता मेथीच्या भाजीसंदर्भातील नव्या दाव्याचीही दखल घेतली जाते का, याकडे पालकांचे लक्ष लागले आहे.
.png "Videos"){kind=small}
