मांडवी पाडा हा भाग दहिसर पथकर नाक्यापासून काही अंतरावर असून येथील अनेक भूखंड खाजगी मालकीचे आहेत. काही वर्षांपूर्वी या जमिनींमध्ये मोठ्या प्रमाणात दगडाच्या खदानी खोदण्यात आल्या होत्या. कालांतराने या खदानींमध्ये मोठे खड्डे तयार झाले आणि त्यामध्ये पावसाचे तसेच भूजलाचे पाणी साठू लागले. सध्या या खड्ड्यांमध्ये साठलेल्या पाण्याचा वापर करून ते पाणी विक्री करण्याचा व्यवसाय काही ठिकाणी केला जात असल्याचे स्थानिकांकडून सांगितले जाते.
दरम्यान, अशाच एका खदानीच्या तलावात मागील काही दिवसांपासून एक मगर वास्तव्यास असल्याचे समोर आले आहे. स्थानिकांनी या मगरीला तलावात पोहताना तसेच काठावर येताना पाहिल्याचा दावा केला आहे. धक्कादायक बाब म्हणजे ही मगर केवळ पाण्यातच मर्यादित न राहता कधी कधी तलावाबाहेर येऊन आसपासच्या परिसरातही फेरी मारताना दिसत असल्याचे स्थानिकांनी सांगितले. त्यामुळे या भागातून पायी ये-जा करणाऱ्या नागरिकांमध्ये मोठी भीती निर्माण झाली आहे.
विशेष म्हणजे ज्या खदानीच्या तलावात मगर दिसत आहे, त्या परिसरात अनेक वर्षांपासून स्थानिक लहान मुले पोहण्यासाठी किंवा खेळण्यासाठी जात असतात. उन्हाळ्याच्या दिवसांमध्ये या तलावात पोहणे किंवा पाण्यात खेळणे हा स्थानिक मुलांचा विरंगुळ्याचा भाग असतो. मात्र आता त्या तलावात मगर असल्याचे स्पष्ट झाल्याने मोठ्या दुर्घटनेची भीती व्यक्त केली जात आहे. जर एखादे मूल किंवा नागरिक नकळत पाण्यात उतरले तर गंभीर घटना घडू शकते, अशी भीती स्थानिकांनी व्यक्त केली आहे.
स्थानिकांच्या म्हणण्यानुसार, या तलावाकडे कोणताही नैसर्गिक नदी किंवा नाला थेट जोडलेला नाही. त्यामुळे येथे अचानक मगर कशी आली याबाबतही अनेक प्रश्न उपस्थित केले जात आहेत. काही नागरिकांच्या मते, पावसाळ्यात पाण्याच्या प्रवाहातून मगर येथे पोहोचली असावी, तर काहींच्या मते यामागे इतर काही कारण असण्याची शक्यता नाकारता येत नाही.
या संदर्भात प्राणीप्रेमी सचिन जांभळे यांनी सांगितले की, “या भागात अचानक मगर दिसत असल्याने नागरिकांमध्ये मोठी भीती निर्माण झाली आहे. परिसरात लहान मुले आणि नागरिक वारंवार ये-जा करत असतात. त्यामुळे वन विभागाने तातडीने याकडे लक्ष देऊन मगरीला सुरक्षितरित्या पकडण्याची कारवाई करणे अत्यंत गरजेचे आहे. अन्यथा कोणत्याही क्षणी मोठी दुर्घटना घडू शकते.”
दरम्यान, या घटनेची माहिती मिळताच वन विभागाकडे तक्रार करण्यात आली आहे. घोडबंदर परिक्षेत्राचे वन क्षेत्र अधिकारी बागुल यांनी सांगितले की, “मांडवी पाडा परिसरातील खदानीच्या तलावात मगर असल्याची माहिती वन विभागाला मिळाली आहे. प्राथमिक पडताळणी करण्यात येत असून ही मगर खासगी तलावात असल्यामुळे तिला पकडण्यासाठी विशेष मोहीम राबवण्याची तयारी सुरू आहे. नागरिकांनी घाबरून न जाता मात्र त्या परिसरात जाणे टाळावे.”
या घटनेमुळे मुंबईच्या वेशीवरच मगरीचा मुक्त संचार होत असल्याची बाब समोर आली असून प्रशासनाने तातडीने उपाययोजना करणे आवश्यक असल्याची मागणी स्थानिक नागरिकांकडून होत आहे. नागरिकांच्या सुरक्षेच्या दृष्टीने या परिसरात सूचना फलक लावणे, तसेच तलावाभोवती सुरक्षात्मक बंदोबस्त करण्याचीही मागणी करण्यात येत आहे.
.png "Videos"){kind=small}
