फोटो सौजन्य-गुगल
मानपाडा रोडवरील डी मार्टच्या मुख्य प्रवेशद्वारासमोरील कथित अनधिकृत रिक्षा स्टैंडवर रिक्षा चालकांकडून प्रवाशांना अवास्तव भाडे आकारले जात असून विरोध केल्यास उद्धटपणे वागणूक आणि दमदाटी केली जात असल्याचा आरोप सेफ्टी वेल्फेअर असोसिएशनचे संस्थापक अध्यक्ष विशाल वि. शेटे यांनी केला आहे. या प्रकारामुळे प्रवाशांमध्ये नाराजी असून संबंधित रिक्षा चालकांवर वाहतूक विभाग आणि आरटीओने कारवाई करावी अशी मागणी त्यांनी केली आहे.
याबाबत शेटे यांनी दिलेल्या माहितीनुसार २२ सप्टेंबर रोजी रात्री 8.30च्या सुमारास डी मार्ट ते ९० फूट रोड, कांचनगाव-ठाकुर्ली असा प्रवास करण्यासाठी त्यांनी रिक्षा केली. या मार्गासाठी मागील काही महिन्यांपासून सुमारे १५० रुपये भाडे आकारले जात असल्याचे त्यांनी सांगितले. मात्र यावेळी त्यांच्याकडून १८० रुपये भाड्याची मागणी करण्यात आली. अतिरिक्त ३० रुपये भाडे का आकारले जात आहे असा सवाल विचारल्यानंतर संबंधित रिक्षा चालकाने एवढेच भाडे द्यावे लागेल. जायचे असेल तर जा, असे उद्धटपणे सांगितले. विशेष म्हणजे परिसरातील इतर रिक्षा चालकांनाही ९० फूट परिसरात १८० रुपयांपेक्षा कमी भाड्यात प्रवासी घेऊ नयेत, असा तोरा दाखवला. त्यानंतर याबाबत जाब विचारल्यानंतर काही रिक्षा चालकांनी एकत्र येऊन मोठ्या आवाजात बोलण्यास सुरुवात केली.
डी मार्ट परिसरात ओला किंवा उबर चालक प्रवाशांना घेण्यासाठी आल्यास त्यांनाही काही रिक्षा चालकांकडून दमदाटी केली जाते असा आरोप शेटे करीत आहेत.
रिक्षा युनियनच्या पदाधिकाऱ्यांनी आपल्या सदस्यांना वाहतुकीचे नियम पाळणे, अनधिकृत ठिकाणी रिक्षा उभी न करणे, प्रवाशांकडून अवाजवी भाडे न आकारणे, भाडे नाकारणे टाळणे तसेच प्रवाशांशी सौजन्याने वागण्याच्या सूचना द्याव्यात अशी मागणी शेटे यांनी संबंधित वाहतूक पोलिस अधिकाऱ्यांकडे केली आहे.
डी मार्ट परिसरातील रिक्षा चालकांकडून होत असल्याचा आरोप असलेला हा प्रकार तातडीने थांबवण्यासाठी उपप्रादेशिक परिवहन कार्यालय, कल्याण, ठाणे शहर वाहतूक शाखा आणि कोळशेवाडी वाहतूक नियंत्रण उपशाखेने संबंधित प्रकरणाची चौकशी करून नियमभंगह आढळल्यास योग्य ती कारवाई करावी अशी मागणीही विशाल शेटे यांनी केली आहे.
याबाबत भाजपा प्रणित रिक्षा चालक मालक संघटनेचे कार्याध्यक्ष दत्ता माळेकर यांना विचारले असता त्यांनी सांगितले की, जर काही रिक्षा चालक अशा प्रकारे वागत असतील तर त्यांच्यावर कायदेशीर कारवाई केलीच पाहिजे. आम्ही युनियन म्हणून अशा लोकांना पाठीशी घालणार नाही. हा विषय आमच्याकडेही आला असून आरटीओ अधिकारी व वाहतूक पोलिस यांना याकडे लक्ष देण्यास सांगितले आहे.
(डिस्क्लेमर: हे नवराष्ट्र वृत्तपत्राचे स्वयंचलित न्यूज फीड आहे. ते navarashtra.com च्या कर्मचाऱ्यांनी संपादित केलेले नाही.)
.png "Videos"){kind=small}
