Pradeep Purnekar Case : दोन्ही शिवसेनेत जुंपली! नरेश म्हस्के यांची आदित्य ठाकरेंच्या अटकेची मागणी, दिशा सालियन प्रकरणावरून घेरलं

Pradeep Purnekar Case : ठाण्यातील शिवसेना ठाकरे गटाचे विभागप्रमुख प्रदीप पूर्णेकर यांच्या हत्या प्रकरणावरून ठाकरे आणि शिंदे गटामध्ये आरोप-प्रत्यारोप सुरू आहेत. आदित्य ठाकरे यांनी मीनाक्षी शिंदे यांच्या अटकेची मागणी केल्यानंतर खासदार नरेश म्हस्के यांनी प्रत्युत्तर दिले.

• पूर्णेकर हत्या प्रकरणावरून ठाकरे आणि शिंदे गट आमनेसामने
• आदित्य ठाकरेंचा मीनाक्षी शिंदेंवर गंभीर सवाल
• नरेश म्हस्केंचं आदित्य ठाकरेंना प्रत्युत्तर

 

ठाणे : ठाकरेंच्या शिवसेनेचे विभागप्रमुख प्रदीप पूर्णेकर यांच्या हत्या प्रकरणावरून ठाण्यातील राजकीय वातावरण चांगलेच तापले आहे. या प्रकरणात मीनाक्षी शिंदे यांच्यावर कारवाई करण्याची मागणी आदित्य ठाकरे यांनी केली. त्यानंतर शिवसेनेचे खासदार नरेश म्हस्के यांनी ठाकरेंना प्रत्युत्तर देत दिशा सालियन प्रकरणाचा उल्लेख केला. त्यामुळे दोन्ही शिवसेनांमधील आरोप-प्रत्यारोपांना आणखी धार आली आहे. (Pradeep Purnekar Case)

आदित्य ठाकरेंचा शिंदे गटाला सवाल

प्रदीप पूर्णेकर यांच्या हत्येला एक महिना पूर्ण झाल्यानंतर आदित्य ठाकरे यांनी ठाणे पोलीस आयुक्तांची भेट घेतली. यावेळी खासदार संजय राऊतही उपस्थित होते. पूर्णेकर कुटुंबीयांची भेट घेतल्यानंतर त्यांनी तपासाच्या मुद्द्यावर पोलिसांशी चर्चा केली.

या प्रकरणात शिंदे गटाच्या नगरसेविका मीनाक्षी शिंदे यांना अटक करावी, अशी मागणी आदित्य ठाकरे यांनी केली. उपमुख्यमंत्री एकनाथ शिंदे त्यांना का वाचवत आहेत, असा सवालही त्यांनी उपस्थित केला.

MLC Election 2026 : भाजप-शिंदे गटात जुंपली? भाजपच्या आरोपांवर एकनाथ शिंदे स्पष्टच बोलले, नेमकं काय म्हणाले उपमुख्यमंत्री?

नरेश म्हस्केंचं जोरदार प्रत्युत्तर

आदित्य ठाकरेंच्या आरोपांना उत्तर देताना खासदार नरेश म्हस्के यांनी त्यांच्यावरच निशाणा साधला. दिशा सालियन प्रकरणाचा उल्लेख करत आदित्य ठाकरेंना अटक करण्याची मागणी सीबीआयकडे करणार असल्याचे त्यांनी सांगितले. यासाठी केंद्रीय गृहमंत्र्यांची भेट घेण्याचाही मानस त्यांनी व्यक्त केला. सुशांत सिंह राजपूत आणि मनसुख हिरेन प्रकरणांचाही उल्लेख म्हस्के यांनी केला.

ठाण्यात तणाव, दोन्ही गटांकडून हालचाली

या राजकीय वादाच्या पार्श्वभूमीवर ठाण्यातील आनंद आश्रम परिसरात शिवसैनिकांची मोठ्या प्रमाणात गर्दी झाली. पूर्णेकर हत्या प्रकरणाच्या तपासावरून दोन्ही गटांमध्ये वातावरण तापले असून, पुढील घडामोडींकडे राजकीय वर्तुळाचे लक्ष लागले आहे.

दरम्यान, मीनाक्षी शिंदे यांनी शिवसेनेच्या महिला आघाडी प्रमुखपदाचा राजीनामा दिला आहे. पक्ष नेतृत्वाची बदनामी होऊ नये, म्हणून हा निर्णय घेतल्याचे त्यांनी स्पष्ट केले. आपला संबंध नसलेल्या प्रकरणांमध्ये नाव जोडून पक्ष नेतृत्वावर दबाव आणला जात असल्याचा आरोपही त्यांनी केला.

एकीकडे पूर्णेकर हत्या प्रकरणाच्या तपासावरून प्रश्न उपस्थित होत आहेत, तर दुसरीकडे राजकीय आरोपांची धार वाढत आहे. या प्रकरणात तपासातून काय समोर येते आणि पोलिसांकडून पुढे कोणती कारवाई होते, हे महत्त्वाचे ठरणार आहे.

Meenakshi Shinde: प्रदीप पूर्णेकर हत्या प्रकरणाला नवे वळण! मीनाक्षी शिंदे यांचा ठाणे जिल्हा महिला प्रमुखपदाचा राजीनामा