Pradeep Purnekar Murder Case: पतीची ७ वेळा चौकशी, आता थेट माजी महापौर! पूर्णेकर हत्या प्रकरणाचा तपास ऐन वळणावर

Pradeep Purnekar Murder Case: शिवसेना ठाकरे गटाचे मानपाडा विभागप्रमुख प्रदीप पूर्णेकर यांच्या हत्येप्रकरणी ठाण्यातून मोठी घडामोड समोर आली आहे! एसआयटीने माजी महापौर मीनाक्षी शिंदे यांना चौकशीसाठी पाचारण केले आहे. पतीची ७ वेळा चौकशी झाल्यानंतर आता थेट माजी महापौरांवरच चौकशीची वेळ आल्याने राजकीय वर्तुळात प्रचंड खळबळ उडाली आहे.

• एसआयटीने ठाण्याच्या माजी महापौर मीनाक्षी शिंदे यांना चौकशीसाठी बोलावले
• हत्येचा राजकीय कट रचल्याचा आरोप करत कुटुंबीयांनी पुरावा दिला
• प्रकरणात आतापर्यंत ५ आरोपी जेदप, तर पतीची ७ वेळा चौकशी

Pradeep Purnekar Murder Case: शिवसेना ठाकरे गटाचे मानपाडा विभागप्रमुख प्रदीप पूर्णेकर यांच्या निर्घृण हत्येच्या तपासात एक अत्यंत महत्त्वाची आणि मोठी घडामोड समोर आली आहे. या प्रकरणाच्या तपासासाठी स्थापन करण्यात आलेल्या विशेष तपास पथकाने (SIT) ठाण्याच्या माजी महापौर आणि शिंदे गटाच्या विद्यमान नगरसेविका मीनाक्षी शिंदे यांना चौकशीसाठी पाचारण केले आहे. आज, मंगळवारी दुपारी १२ वाजता त्यांची सखोल चौकशी केली जाणार आहे. यापूर्वी त्यांचे पती राजेंद्र शिंदे यांची एसआयटीने तब्बल सात वेळा कसून चौकशी केली असून, आता थेट माजी महापौरांनाच चौकशीच्या फेऱ्यात आणल्याने राजकीय क्षेत्रात प्रचंड खळबळ उडाली आहे.

कार्यालयातच गोळ्या झाडून आणि चॉपरने वार करून हत्या

२९ सप्टेंबर रोजी रात्री ९:३० वाजेच्या सुमारास मानपाडा येथील स्वतःच्या कार्यालयात बसलेले असताना प्रदीप पूर्णेकर यांच्यावर हल्लेखोरांनी अचानक हल्ला चढवला होता. पिस्तुलातून गोळ्या झाडत आणि चॉपरने सपासप वार करत त्यांची अतिशय क्रूरपणे हत्या करण्यात आली. या हत्येमागे राजकीय आणि सामाजिक वैमनस्य कारणीभूत असल्याचा संशय पहिल्यापासूनच व्यक्त केला जात होता.

हेही वाचा: Guwahati Shooting News: गुवाहाटीत रक्ताचा पाठोपाठ! हॉटेलमध्ये बेछुट गोळीबार; महिलांसह ६ जणांच्या हत्येने खळबळ

पूर्णेकर कुटुंबाचे गंभीर आरोप; पुरवणी जबाबात थेट नाव

प्रदीप पूर्णेकर यांचा मुलगा राम पूर्णेकर याने नोंदवलेल्या पुरवणी जबाबात मीनाक्षी शिंदे आणि त्यांचे पती राजेंद्र शिंदे यांच्या नावांचा थेट उल्लेख केला होता. हा पूर्वनियोजित राजकीय कट असल्याचे सांगत शिंदे दाम्पत्याला या हत्या प्रकरणात मुख्य आरोपी करण्याची मागणी पूर्णेकर कुटुंबीयांनी लावून धरली आहे. याबाबत पूर्णेकर कुटुंबीयांनी पत्रकार परिषद घेत हत्येच्या दीड तास आधीचा एक व्हिडीओ समोर आणला आहे, ज्यामध्ये सर्व आरोपी राजेंद्र शिंदे यांच्यासोबत दिसत असल्याचा दावा करण्यात आला आहे. मात्र, मीनाक्षी शिंदे यांनी आपल्यावरील हे सर्व आरोप पूर्णपणे फेटाळून लावले आहेत.

पाच आरोपींना बेड्या; सात वेळा झाली होती पतीची चौकशी

या गुन्ह्याचा तपास करताना एसआयटीने पूर्णेकर यांचा जुना मित्र सुभाष उर्फ पप्या शिंदे याच्यासह निखिल यादव, नितेश पवार आणि इतर दोन अशा एकूण पाच आरोपींना अटक केली असून, हे सर्व आरोपी सध्या न्यायालयीन कोठडीत आहेत. तपासाचा भाग म्हणून एसआयटीने ठाणे खंडणी विरोधी पथकाच्या कार्यालयात राजेंद्र शिंदे आणि मुख्य आरोपींना समोरासमोर बसवून चौकशी केली होती.

सात वेळा झालेल्या या चौकशीत राजेंद्र शिंदे यांनी हत्येशी कसलाही संबंध नसल्याचा दावा केला होता. अखेर आज मीनाक्षी शिंदे यांना एसआयटीने चौकशीसाठी बोलवले असून, या चौकशीतून काय समोर येते, याकडे सर्वांचे लक्ष लागले आहे.