Thane : शिवसेनेच्या नवरात्र उत्सवात हिंदू नववर्षानिमित्त भक्तीचा महासागर; उभारणार गणपतीपुळे मंदिराची प्रतिकृती

शिवसेना ठाकरे गट आणि आनंद चॅरिटेबल ट्रस्टच्या वतीने दरवर्षीप्रमाणे यंदा ही ठाण्यातील मासुंदा तलाव जवळील श्री छत्रपती शिवाजी महाराज मैदानात उद्यापासून चैत्र नवरात्र उत्सवाची धूम सुरु होणार आहे.

ठाणे / स्नेहा काकडे :  चैत्र महिना सुरु झाला की नववर्षाच्या स्वागताबरोबर सर्वांना वेध लागतात ते चैत्र नवरात्रोत्सवाचे. यंदाचे ३० वे वर्ष असून दरवर्षीप्रमाणे यंदाही ठाण्यातील मासुंदा तलाव जवळील श्री छत्रपती शिवाजी महाराज मैदानात उद्यापासून चैत्र नवरात्र उत्सवाची धूम सुरु होणार आहे. आनंद चॅरिटेबल ट्रस्टच्या यंदाच्या नवरात्र उत्सवात “गणपतीपुळे मंदिराची प्रतिकृती” उभारण्यात आली आहे. शिवसेनेच्या या नवरात्र उत्सवात हिंदू नववर्षानिमित्त भक्तीचा महासागर उसळणार असून गुढीपाडवा रविवार दि. ३० मार्च ते रामनवमी दि ६ एप्रिल पर्यंत नवकुंडात्मक सहस्रचंडी महायाग संपन्न होणार आहे.

भक्तांच्या हाकेला धावणारी व नवसाला पावणारी अशी या देवीची ख्याती महाराष्ट्रभर पसरली आहे. या देवीचा आगमन सोहळा रविवार दि. ३० मार्च २०२५ रोजी सकाळी १० वाजता कळवा येथून वाजत गाजत होणार आहे. यावेळी ३०० जणांचे लेझीम पथक जय्यत तयारीत आहे. तसेच संपूर्ण ठाणे जिल्हयातून वारकरी सांप्रदायाचे वारकरी, झांज पथक, बँड पथक, दांडपट्टा, महिलांचे व पुरुषांचे लेझीमपथक, घोडेस्वार, मावळे आगमनासाठी सज्ज झाले असल्याची माहिती शिवसेना (उद्धव बाळासाहेब ठाकरे) पक्षाचे नेते, माजी खासदार राजन विचारे यांनी आज पत्रकार परिषदेत दिली.

नवरात्र उत्सवात धार्मिक, सांस्कृतिक कार्यक्रमाची मेजवानी

आनंद चॅरिटेबल ट्रस्टच्या माध्यमातून आयोजित करण्यात आलेल्या चैत्र नवरात्रोत्सवात सुप्रसिध्द प्रधानाचार्य व यज्ञाचार्य वे.शा.सं.मुकुंदशास्ञी मुळे (नाशिक) यांच्या मार्गदर्शनाखाली भव्यदिव्य नवकुंडात्मक सहस्रचंडी महायाग संपन्न होणार आहे. या नवरात्र उत्सवात विविध सांस्कृतिक व धार्मिक कार्यक्रमांची देवी भक्तांना मेजवानी अनुभवता येणार आहे. तरी सर्व भक्तांनी उपस्थित राहून देवीचे दर्शन आणि सांस्कृतिक कार्यक्रमाचा लाभ घेण्याचे आवाहन आनंद चॅरिटेबल ट्रस्टच्या वतीने करण्यात आले आहे.

श्री क्षेत्र गणपतीपुळे मंदिराची प्रतिकृती

चैत्र नवरात्र उत्सवाच्या माध्यमातून ठाणेकरांना रत्नागिरी जिल्ह्यातील श्री क्षेत्र गणपतीपुळे मंदिराच्या प्रतिकृतीचे दर्शन घडवित आहेत. या मंदिराची उंची ७० फूट असणार आहे. देवीचा सभा मंडप २४×२४ फुटाचा असणार आहे. तसेच सजावटीचा एक भाग म्हणून १० X ४ श्री रामांची प्रतिकृती, १० X ४ श्री हनुमानाची प्रतिकृती तसेच २५X१५ आकारमानाचे श्री राम मंदिराची प्रतिकृती फुटपाथलगत श्री छत्रपती शिवाजी महाराज मैदान समोर, मासुंदा तलाव कॉर्नर, जांभळी नाका, ठाणे येथे तात्पुरत्या स्वरूपात उभे करण्यात येणार आहेत.