वारकऱ्यांसाठी पुणे जिल्हा परिषदेचे महत्त्वपूर्ण पाऊल; शौचालयांसाठी 'टॉयलेट सेवा' ॲप
पुणे : पालखी सोहळा २०२५ दरम्यान आषाढी वारीमध्ये सहभागी होणाऱ्या लाखो भाविकांना स्वच्छ व सुरक्षित सुविधा मिळाव्यात यासाठी पुणे जिल्हा परिषदेच्या वतीने यंदा विशेष ई-‘टॉयलेट सेवा’ नावाच्या मोबाईल ॲपची निर्मिती करण्यात आली आहे. आषाढी वारी मार्गावर विविध ठिकाणी फिरते शौचालय उपलब्ध करून देण्यात आली आहे.
श्री संत ज्ञानेश्वर महाराज पालखी मार्गावर १ हजार ८०० शौचालये, श्री संत तुकाराम महाराज पालखी मार्गावर १ हजार २०० शौचालये, श्री संत सोपान महाराज पालखी मार्गावर ३०० शौचालये उभारण्यात आली आहेत. या शौचालयांच्या व्यवस्थापनासाठी विशेष मोबाईल ॲप तयार करण्यात आले असून, या ॲपमध्ये शौचालयाची उभारणी व स्थिती, स्वच्छतेची माहिती व नियमित वापर, शौचालयाच्या ठिकाणी असलेली पाणी, वीज, रस्ता व साफसफाईची माहिती, शौचालयाचा वापर किती झाला याचा तपशील, नागरिकांनी त्यांच्या प्रतिक्रिया व सूचना नोंदवण्याची सुविधा सेवा उपलब्ध करुन देण्यात आली आहे.
दरम्यान, या प्रत्येक शौचालयावर क्यूआर कोड स्कॅनर लावण्यात आले असून, गुगल स्कॅनर वापरून हा क्यूआर कोड स्कॅन केल्यास संबंधित शौचालयाची माहिती मोबाईलवर तात्काळ मिळू शकते. हा ॲप गुगल प्ले स्टोअरवर उपलब्ध असून, भाविकांनी या ॲपचा वापर करून सुविधा व स्वच्छतेबाबत आपली मते नोंदवावीत, असे आवाहन जिल्हा परिषद प्रशासनाने केले आहे. जिल्हा परिषदेचा हा उपक्रम आधुनिक तंत्रज्ञानाचा योग्य वापर करत वारकऱ्यांच्या सेवेत एक महत्त्वाची भर घालणार आहे.
मोबाईलसाठी खालीलप्रमाणे लिंक उपलब्ध
Android मोबाईलसाठी लिंक https://play.google.com/store/apps/details?id=com.palsak.
ॲपल मोबाईलसाठी लिंक https://apps.apple.com/in/app/toiletseva/id1557438957
या लिंक वापरुन नागरिकांनी मोबाईल ॲपचा वापर करावा, असे जिल्हा परिषद प्रशासनातर्फे आवाहन करण्यात आलेले आहे.
.png "Videos"){kind=small}
