हत्तीची विनापरवाना वाहतूक; शेडबाळच्या संस्थेवर गुन्हा

सांगली : नांद्रे (ता. मिरज) येथे धार्मिक कार्यक्रमासाठी विनापरवाना हत्तीची वाहतूक केल्याप्रकरणी शेडबाळ (ता. कागवाड, जि. बेळगाव) येथील संस्थेवर वन्यजीव संरक्षण अधिनियमानुसार गुन्हा नोंद करण्यात आला. श्री शांतीसागर दिगंबर जैन क्षेत्राश्रम यांच्यावर गुन्हा नोंद झाल्याची माहिती वनविभागाकडून देण्यात आला.

परवानगीशिवाय नेणे कायद्याने गुन्हा
वनविभागाकडून दिलेली माहिती अशी की, हत्ती हा शेड्युल एक मधील वन्यजीव आहे. परराज्य किंवा जिल्ह्यात अन्यत्र कोठेही हत्तीला नेण्यासाठी वाहतूक परवान्याची गरज असते. त्या परवानगीशिवाय नेणे कायद्याने गुन्हा आहे. शेडबाळ येथील क्षेत्राश्रमाचा हत्ती नांद्रे येथे काल धार्मिक कार्यक्रमासाठी नेण्यात आल्याची माहिती वनविभागाच्या फिरता पथकाला मिळाली.

ट्रकमधून हत्तीची वाहतूक

त्यानुसार उपवनसंरक्षक नीता कट्टे, सहायक वनसंरक्षक डॉ. अजित साजणे यांच्या नेतृत्वाखाली वनक्षेत्रपाल महांतेश बगले यांच्या पथकने माधवनगर जकातनाका येथे सापला रचला. त्यावेळी ट्रकमधून हत्तीची वाहतूक होताना दिसून आली. याबाबत वाहतूकीची कोणतीही परवानगी नसल्याचे दिसून आले. त्यानुसार हत्तीला काल सायंकाळी सातच्या सुमारास वनविभागाने ताब्यात घेतले. आज संबंधितांवर गुन्हा नोंद करण्यात आला. वन्यजीव संरक्षण अधिनियमानुसार गुन्हा नोद करण्यात आला. कारवाईत वनपाल राजाराम तिवडे, अजितकुमार दगडे, मानद वन्यजीव रक्षक अजितकुमार पाटील, सचिन साळुंखे यांचा सहभाग होता.