Sangli District Bank Election Voting
जिल्हा मध्यवर्ती सहकारी बँकेच्या संचालक मंडळाच्या २०२६-२०३१ या पंचवार्षिक निवडणुकीसाठी रविवारी सकाळी आठ ते सायंकाळी पाच या वेळेत मतदान झाले. जत, कवठेमहांकाळ, तासगाव आणि मिरज या चार सोसायटी गटांसह अनुसूचित जाती आणि भटक्या जाती-जमाती या दोन राखीव प्रवर्गांतील जागांसाठी मतदान घेण्यात आले. जिल्ह्यातील १२ मतदान केंद्रांवर एकूण २ हजार ४४६ मतदार मतदानासाठी पात्र होते. त्यापैकी दिवसअखेर ९३.९१ टक्के मतदानाची नोंद झाली.
सकाळपासूनच मतदान केंद्रांवर मतदारांची लगबग पाहायला मिळाली. आपापल्या गटातील मतदारांनी मतदानाचा हक्क बजावावा, यासाठी उमेदवार आणि समर्थकांकडून विशेष प्रयत्न सुरू होते. सुरुवातीच्या टप्प्यात काही केंद्रांवर मतदानाचा वेग संथ होता. मात्र, जसजसा दिवस पुढे सरकत गेला तसतसा मतदानाचा वेग वाढला. दुपारनंतर अनेक केंद्रांवर मतदारांची गर्दी झाली. अखेर सायंकाळी मतदानाची प्रक्रिया पूर्ण झाली तेव्हा ९३.९९ टक्के मतदानाची नोंद झाली.
या निवडणुकीत जत सोसायटी गटात आमदार गोपीचंद पडळकर विरुद्ध विनोद पवार, तासगावमध्ये माजी खासदार संजय पाटील विरुद्ध माजी आमदार सुमन पाटील, तर कवठेमहांकाळमध्ये माजी मंत्री अजितराव घोरपडे विरुद्ध टी. व्ही. पाटील अशी प्रमुख लढत झाली. या तिन्ही लढतींमध्ये स्थानिक राजकीय नेत्यांची प्रतिष्ठा पणाला लागली आहे.
जत गटातील आमदार गोपीचंद पडळकर यांच्या उमेदवारीचा विषय न्यायालयापर्यंत पोहोचला होता. अखेर त्यांचा उमेदवारी अर्ज वैध ठरल्यानंतर निवडणुकीचा मार्ग मोकळा झाला. या गटातील निकालाकडे भाजपसह विरोधी राजकीय गटांचे लक्ष लागले आहे. तासगावमध्ये सुमन पाटील यांच्या उमेदवारीमुळे आमदार रोहित पाटील यांची प्रतिष्ठा पणाला लागली आहे. माजी खासदार संजय पाटील यांच्यासाठीही ही लढत महत्त्वाची मानली जात आहे. कवठेमहांकाळमध्ये अजितराव घोरपडे आणि टी. व्ही. पाटील यांच्यातील लढतीत कोण बाजी मारणार, याबाबत उत्सुकता आहे.
मिरज सोसायटी गटात अण्णासाहेब कोरे आणि भाजपचे अनिल शेगुणशे यांच्यात सामना झाला. या गटातील निकालाकडे खासदार विशाल पाटील यांचेही लक्ष लागले आहे. अनुसूचित जाती प्रवर्गातून के. डी. कांबळे, बाबासाहेब मधाळे आणि विलास बेले, तर भटक्या जाती-जमाती प्रवर्गातून संभाजी कचरे, शंकर माने आणि अमोल पारेकर यांच्यात लढत झाली. या दोन जागांसाठी जिल्हाभरातील मतदारांनी मतदान केले.
जत येथील मतदान केंद्रावर मतदानाच्या गोपनीयतेचा भंग झाल्याचा आरोप करीत माजी आमदार विक्रमसिंह सावंत आणि त्यांच्या समर्थकांनी आक्षेप घेतला. त्यामुळे सुमारे अर्धा तास मतदान प्रक्रिया थांबविण्यात आली होती. त्यानंतर पुन्हा मतदान सुरू करण्यात आले. या घटनेचा अपवाद वगळता जिल्ह्यातील अन्य मतदान केंद्रांवर मतदान शांततेत पार पडले.
निवडणूक निर्णय अधिकारी म्हणून जिल्हा सहकार उपनिबंधक सुनील चव्हाण यांनी काम पाहिले. जिल्हाधिकारी डॉ. मैनाक घोष यांनी मतदान आणि मतमोजणी केंद्रांच्या परिसरात प्रतिबंधात्मक आदेश लागू केले होते. मतदान केंद्रांवर प्रवेशापूर्वी मतदारांची तपासणी करण्यात येत होती. मोबाईल, कॅमेरा, इलेक्ट्रॉनिक वस्तू आणि पेन यांसह प्रतिबंधित वस्तू मतदान केंद्रात नेण्यास मनाई करण्यात आली होती.
आता सर्वांचे लक्ष मंगळवारी होणाऱ्या मतमोजणीकडे लागले आहे. सांगली कृषी उत्पन्न बाजार समितीच्या मार्केट यार्ड येथील शेतकरी भवनात सकाळी आठ वाजता मतमोजणी सुरू होणार आहे. सहा जागांच्या निकालातून जिल्हा बँकेच्या राजकारणात कोणाचे वर्चस्व निर्माण होणार, कोणाला धक्का बसणार आणि आगामी काळातील सहकार क्षेत्राची राजकीय दिशा कोण ठरवणार, याचे उत्तर मतमोजणीनंतर मिळणार आहे.
Ans: सांगली जिल्हा बँकेच्या निवडणुकीत १२ मतदान केंद्रांवर ९३.९१ टक्के मतदानाची नोंद झाली.
Ans: संचालक मंडळाच्या एकूण २१ जागांपैकी १५ जागा बिनविरोध झाल्या असून उर्वरित सहा जागांसाठी निवडणूक झाली.
Ans: मंगळवार, ३ तारखेला सकाळी ८ वाजता सांगली कृषी उत्पन्न बाजार समितीच्या मार्केट यार्ड येथील शेतकरी भवनात मतमोजणी होणार आहे
.png "Videos"){kind=small}
