Illegal Mining representative Image
Wardha News : वर्धा जिल्ह्यात गौण खनिजांच्या अवैध उत्खनन आणि विनापरवाना वाहतुकीला चाप लावण्यासाठी महसूल प्रशासनाने जोरदार कारवाई सुरू केली आहे. १ एप्रिल २०२६ ते ३१ ऑगस्ट २०२६ या पाच महिन्यांच्या कालावधीत प्रशासनाच्या कारवाईत अवैध उत्खनन आणि वाहतुकीची तब्बल ५२ प्रकरणे समोर आली आहेत.
या प्रकरणांमध्ये संबंधितांवर तब्बल १७ कोटी ९९ लाख रुपयांचा दंड ठोठावण्यात आला आहे. मात्र, ठोठावलेल्या दंडाच्या तुलनेत प्रत्यक्ष वसुलीची रक्कम कमी असून आतापर्यंत ६७ लाख ९१ हजार रुपये दंड वसूल करण्यात आला आहे.
प्रशासनाच्या कारवाईत सर्वाधिक प्रकरणे रेतीच्या अवैध उत्खनन आणि वाहतुकीशी संबंधित असल्याचं समोर आलं आहे. एकूण ५२ प्रकरणांपैकी तब्बल ४० प्रकरणे रेतीची आहेत. त्यानंतर मुरुमच्या अवैध उत्खनन आणि वाहतुकीची ११ प्रकरणे आढळली आहेत. तर दगडाच्या अवैध उत्खननाचं एक प्रकरण नोंदवण्यात आलं आहे.
Wardha News : ३२६ वनहक्कधारकांच्या सातबारावर चढणार नाव; आदिवासी-वननिवासी शेतकऱ्यांना मोठा दिलासा
या कारवाईत अवैधरित्या गौण खनिजांची वाहतूक करणारी तब्बल ४९ वाहने जप्त करण्यात आली. त्यामुळे जिल्ह्यात विनापरवाना खनिज वाहतूक करणाऱ्यांचं चांगलंच धाबं दणाणलं आहे.
अवैध उत्खनन आणि वाहतुकीच्या प्रकरणांमध्ये प्रशासनाने केवळ दंडात्मक कारवाईवर न थांबता कायदेशीर कारवाईही केली आहे. एकूण ३१ प्रकरणांत गुन्हे दाखल करण्यात आले असून २० आरोपींना अटक करण्यात आली आहे.
दरम्यान, विविध प्रकारच्या गौण खनिजांसाठी ठोठावलेल्या दंडातही मोठी तफावत आहे. रेतीसाठी ६२ लाख १० हजार ९१० रुपये, मुरुमसाठी १७ कोटी ३६ लाख २३ हजार ३६७ रुपये, तर दगडासाठी ७० हजार ४०० रुपये दंड निश्चित करण्यात आला आहे.
जिल्ह्यात अवैध उत्खनन आणि वाहतुकीला आळा घालण्यासाठी महसूल प्रशासनाची तपासणी आणि कारवाईची मोहीम पुढेही सुरू राहणार असल्याचं स्पष्ट होत आहे.
.png "Videos"){kind=small}
