Yavatmal News: झाडाखाली बसून शिक्षणाचे धडे! गडचिरोलीतील नेमडा येथील प्रकार; जीर्ण इमारतीचा फटका
Yavatmal News: सिरोंचा मुख्यालयापासून ३५ किमी अंतरावर असलेल्या जाफराबाद ग्रामपंचायत अंतर्गत येत असलेल्या नेमडा येथील जिल्हा परिषद प्राथमिक शाळेतील विद्यार्थ्यांच्या शिक्षणाची गंभीर अवस्था समोर आली आहे. शाळेची इमारत जीर्ण व धोकादायक झाल्याने जुलै महिन्यापासून इयत्ता पहिली ते चौथीतील चिमुकल्यांना चक्क झाडाखाली बसवून शिकविले जात आहे. पावसाळा, ऊन आणि बदलत्या हवामानाचा सामना करीत खुल्या मैदानात विद्यार्थी शिक्षणाचे धडे गिरवित आहेत. शाळेच्या इमारतीच्या छताला भेगा पडल्या असून अनेक ठिकाणचे प्लास्टर निघाले आहे. छतावर ओलावा, शेवाळ आणि गळतीचे डाग दिसून येतात.(फोटो सौजन्य – AI)
भिंतींचे प्लास्टर उखडले असून खिडक्यांचे लोखंडी गज गंजलेल्या अवस्थेत आहेत. त्यामुळे विद्यार्थ्यांना इमारतीत बसविणे धोकादायक होऊ शकते. त्यामुळे संभाव्य धोका लक्षात घेऊन शिक्षकांनी विद्यार्थ्यांना बाहेर बसविण्याचा निर्णय घेतला आहे. शाळेची इमारत जीर्ण झाल्याची माहिती शिक्षकांनी संबंधित शिक्षण विभागाला दिल्याचे सांगण्यात येते. इमारत निर्लेखित करण्यासाठीही पत्रव्यवहार करण्यात आला आहे. मात्र, अद्याप त्यावर ठोस निर्णय झालेला नसल्याने विद्यार्थ्यांना झाडाखालीच शिक्षण घ्यावे लागत आहे.
अचानक पाऊस आल्यास वर्ग विस्कळीत होतो, तर उन्हाळ्यात वाढत्या तापमानामुळे विद्यार्थ्यांच्या आरोग्याचा प्रश्न निर्माण होण्याची शक्यता आहे. विशेष म्हणजे, शाळेत सुरक्षित वर्गखोलीचा प्रश्न कायम असतानाच शिक्षकांची रिक्त पदेही ग्रामीण शिक्षण व्यवस्थेसमोरील दुसरे आव्हान ठरत आहे. एका बाजूला आधुनिक व डिजीटल शिक्षणाचा गाजावाजा होत असताना दुसरीकडे प्राथमिक शाळेतील विद्यार्थ्यांना सुरक्षित छतही उपलब्ध नसल्याचे वास्तव चित्र आहे. शाळेची तातडीने पाहणी करून इमारतीची तांत्रिक तपासणी करावी, विद्यार्थ्यांसाठी सुरक्षित पर्यायी व्यवस्था करावी आणि नवीन शाळा इमारतीच्या बांधकामासाठी प्रशासकीय कार्यवाही सुरू करावी, अशी मागणी पालक व ग्रामस्थांकडून होत आहे.
Ganeshotsav 2026: यवतमाळ जिल्ह्यात ढोल-ताशांच्या गजरात बाप्पांचे उत्साहात आगमन
नेमडा शाळेची इमारत जीर्ण झाल्याने विद्यार्थ्यांना जुलैपासून झाडाखाली वर्ग भरवावा लागत आहे. छताला भेगा, ओलावा आणि प्लास्टर निघाल्याने इमारतीच्या सुरक्षिततेचा प्रश्न निर्माण झाला आहे. शिक्षकांनी प्रशासनाला माहिती देऊनही इमारत निर्लेखित करण्याची प्रक्रिया अद्याप पूर्ण झालेली नसल्याचे सांगण्यात येते. पावसाळा आणि उन्हाळ्यात विद्यार्थ्यांच्या शिक्षणासह आरोग्याचाही प्रश्न निर्माण होऊ शकतो. शिक्षकांची रिक्त पदे आणि वर्गखोलीचा अभाव या दुहेरी समस्येत विद्यार्थ्यांचे शिक्षण अडकले आहे. सुरक्षित शाळा कधी मिळणार, हा सवाल आता पालक आणि ग्रामस्थ प्रशासनाला विचारत आहेत.
.png "Videos"){kind=small}
