(फोटो सौजन्य - इन्स्टाग्राम)
मराठी चित्रपटसृष्टीत सध्या नव्या विषयांची आणि फ्रेश कंटेंटची एक वेगळीच लाट पाहायला मिळत आहे. प्रेक्षकांच्या बदलत्या आवडीनिवडी लक्षात घेऊन निर्माते-दिग्दर्शकही वेगळ्या आणि वास्तवाशी जवळीक साधणाऱ्या कथा मोठ्या पडद्यावर आणत आहेत. याच पार्श्वभूमीवर विजू माने आता प्रेक्षकांसाठी मैत्री, मस्ती आणि आठवणींचा जल्लोष घेऊन येत आहेत. त्यांच्या आगामी ‘मामाच्या गोव्याला जाऊया’ या चित्रपटाचा मुहूर्त सोहळा नुकताच मोठ्या उत्साहात पार पडला आहे.
‘स्ट्रगलर साला’ या गाजलेल्या सीरिजनंतर विजू माने पुन्हा एकदा तरुणाईच्या भावविश्वाशी नाळ जोडणारा विषय घेऊन येत आहेत. ‘मामाच्या गोव्याला जाऊया’ या चित्रपटाच्या नावावरूनच मैत्री, गोव्याची ट्रिप, मित्रांची धमाल आणि नात्यांमधील मोकळीक यांचा भन्नाट मेळ प्रेक्षकांना अनुभवायला मिळणार आहे. विशेष म्हणजे फ्रेंडशिप डेच्या आठवड्यात हा चित्रपट प्रदर्शित होणार असल्याने तरुण प्रेक्षकांमध्ये या चित्रपटाबद्दल मोठी उत्सुकता निर्माण झाली आहे.
चित्रपटाची कथा आणि कलाकारांची फळी अद्याप गुप्त ठेवण्यात आली असली तरी, शीर्षकच प्रेक्षकांना त्यांच्या मित्रांच्या ग्रुपसोबतच्या आठवणींमध्ये घेऊन जातं. प्रत्येकाच्या आयुष्यात एक असा ग्रुप असतो, ज्याच्यासोबत गोव्याला जाण्याचा प्लॅन केला जातो, पण तो अनेकदा अपूर्ण राहतो. अशाच भावनेवर आधारित ही कथा असल्याचं सूचित होतं आहे.
या चित्रपटाबद्दल बोलताना विजू माने म्हणाले की, “‘स्ट्रगलर साला’ला मिळालेलं प्रेक्षकांचं प्रेम माझ्यासाठी खूप खास आहे. त्या सीरिजमधील मैत्री आणि मस्ती लोकांच्या मनाला भिडली. त्याच भावनेतून ‘मामाच्या गोव्याला जाऊया’ ही कल्पना आकारण्यात आली. या चित्रपटातून प्रेक्षकांना मनमुराद हसण्याचा, मित्रांसोबत घालवलेल्या क्षणांची आठवण करून देणारा आणि थोडासा नॉस्टॅल्जिक अनुभव देण्याचा प्रयत्न आहे. हलक्याफुलक्या शैलीत सांगितलेली ही कथा प्रत्येकाला आपलीशी वाटेल.”
विजुमेनिया प्रायव्हेट (ओपीसी) प्रायव्हेट लिमिटेड निर्मित आणि विजू माने लिखित आणि दिग्दर्शित हा चित्रपट लवकरच प्रेक्षकांच्या भेटीला येणार आहे. मैत्रीचा रंगतदार जल्लोष, गोव्याच्या पार्श्वभूमीवर उलगडणारी धमाल सफर आणि जुन्या आठवणींना उजाळा देणारा हा सिनेप्रवास प्रेक्षकांना केवळ हसवणारच नाही, तर भावनिकदृष्ट्याही जोडून ठेवणार आहे. ‘मामाच्या गोव्याला जाऊया’ या चित्रपटाच्या माध्यमातून पुन्हा एकदा मोठ्या पडद्यावर मैत्रीची मजा, तरुणाईचा उत्साह आणि आयुष्याच्या छोट्या-छोट्या आनंदांचा उत्सव अनुभवायला मिळणार आहे.
.png "Videos"){kind=small}
