अभिनेता पुष्कर श्रोत्रीच्या घरात चोरी, नक्की कुणी मारला पैसे आणि दागिन्यांवर डल्ला ?

मराठी अभिनेता पुष्कर श्रोत्रीच्या घरात 10.27 लाख रुपयांचे सोन्याचे दागिने आणि 1.20 लाख रुपयांची चोरी झाली आहे.

मुंबईः मराठी अभिनेता पुष्कर श्रोत्रीच्या (Pushkar Shrotri) संदर्भातली एक मोठी बातमी समोर आली आहे. पुष्कर श्रोत्रीच्या घरात चोरी झाली आहे. पुष्करच्या घरात काम करणाऱ्या मोलकरणीने 10 लाख 27 हजार रुपयांचे सोन्याचे दागिने आणि 1 लाख 20 हजारांची रोकड चोरली (Robbery) असल्याची माहिती मिळाली आहे. मोलकरणीने ही रक्कम तिच्या पतीकडे दिली होती. पुष्कर श्रोत्रीनं या प्रकरणी पती-पत्नीविरोधात विलेपार्ले पोलीस स्टेशनमध्ये तक्रार दाखल केली आहे. पुष्कर श्रोत्री यांनी उषा गांगुर्डे आणि भानुदास गांगुर्डे या दोन जणांविरुद्ध फसवणूक आणि विश्वासघात केल्याप्रकरणी गुन्हा दाखल केला आहे. (Fraud)

मराठी अभिनेता पुष्कर श्रोत्रीच्या घरातून एका मोलकरणीनं 10.27 लाख रुपयांचे सोन्याचे दागिने आणि 1.20 लाख रुपये रोख चोरले आहेत. पोलिसांत दाखल करण्यात आलेल्या एफआयआरनुसार, विलेपार्ले पूर्व येथे राहणाऱ्या पुष्कर श्रोत्रीकडे घरातील कामासाठी आणि त्याच्या वडिलांचा सांभाळ करण्यासाठी तीन मोलकरणी काम करत होत्या. त्यापैकी एक उषा गांगुर्डे (41) नावाच्या महिलेनं सुमारे 5 ते 6 महिने सकाळी 8 ते रात्री 8 वाजेपर्यंत काम केलं आहे. तिने श्रोत्रीच्या घरातून 1 लाख 60 हजार रुपयांचे परदेशी चलन चोरल्याची माहिती मिळाली आहे. पुष्करची पत्नी प्रांजलला 22 ऑक्टोबर रोजी उषा गांगुर्डेवर संशय आला. त्यावेळी श्रोत्री कुटुंबानं तात्काळ पोलिसांकडे तक्रार दाखल केली. पोलीस तपासादरम्यान तिनं पैसे चोरल्याचं कबुल केलं. तसेच पती भानुदास गांगुर्डे यांच्याकडे ते दिले असल्याचं सांगितलं. तिच्या पतीनंही चोरीचे पैसे मिळाल्याची कबुली दिली.

दुसरी घटना 24 ऑक्टोबर रोजी उघडकीस आली, पुष्करची पत्नी प्रांजल श्रोत्रीनं कपाटातून सोन्याचे दागिने काढले. प्रांजलला दागिन्यांमध्ये गडबड असल्याचं जाणवलं. श्रोत्री कुटुंबियांनी सोन्याचे दागिने दागिन्यांच्या दुकानात नेले असता ते दागिने बनावट असल्याचं लक्षात आलं. त्यानंतर तपासादरम्यान उषा गांगुर्डे यांनी खरे दागिने चोरून त्याऐवजी तसेच दिसणारे बनावट दागिने आणल्याचं उघड झालं. त्यामुळे पुष्कर श्रोत्री यांनी 26 ऑक्टोबर रोजी उषा गांगुर्डे आणि त्यांच्या पतीविरुद्ध भारतीय दंड संहितेच्या कलम 34, 381, 406 आणि 420 अंतर्गत विलेपार्ले पोलीस ठाण्यात गुन्हा दाखल केला.

या चोरीच्या घटनेमुळे एकच खळबळ उडाली आहे. अशा घटना जर घडत असतील तर मोलकरणींवर विश्वास ठेवायचा तरी कसा? असा प्रश्न निर्माण होतो.