शत्रुघ्न सिन्हा यांनी बॉलीवूडच्या सुपरस्टार्सवर साधला निशाणा, म्हणाले- ‘आता त्यांच्यात प्रेक्षकांना…’

शत्रुघ्न सिन्हा हे बॉलिवूडमधील अशा कलाकारांपैकी एक आहेत जे प्रत्येक महत्त्वाच्या मुद्द्यावर बोलतात. त्यासाठी त्यांनी अनेकदा टिकेचा सामना केला आहे. काही दिवसांपूर्वी शत्रुघ्न सिन्हा यांनी एका प्रकरणात KRK म्हणजेच कमाल आर खानला पाठिंबा दिला होता. तेव्हा त्यांच्यावर बरीच टीका झाली होती. मात्र शत्रुघ्न सिन्हा यांनी कधीही टीकेची पर्वा केली नाही. आता पुन्हा एकदा त्यांनी एका मुद्द्यावर आपले मत मांडले आहे. बॉलीवूडच्या बहिष्काराचा सध्याचा ट्रेंड आणि कलाकारांच्या स्टारडमवर त्यांनी भाष्य केले आहे.

शत्रुघ्न सिन्हा यांनी नुकतेच ‘ई टाइम्स’शी संवाद साधला. त्यावेळी त्यांना हिंदी चित्रपटसृष्टीची सद्यस्थिती आणि बॉक्स ऑफिसवरील चित्रपटांच्या स्थितीबद्दल काय मत आहे, असे विचारण्यात आले. या प्रश्नाला उत्तर देताना शत्रुघ्न सिन्हा म्हणाले, ‘कोरोना महामारीमुळे चित्रपटसृष्टीचे मोठे नुकसान झाले आहे. त्यामुळे स्टारडम जवळपास संपले आहे. सेलेब्स आता ‘लार्जर दॅन लाईफ’ राहिलेले नाहीत. कोरोनाच्या संकटाने सर्वांना समान पातळीवर आणले आहे. आजकाल सुपरस्टार्सचे युग संपलेले दिसते. निवडक चित्रपट आणि स्टार्सच यशस्वी होत आहेत.

शत्रुघ्न सिन्हा पुढे म्हणाले, ‘आता सिनेमात जाऊन चित्रपट पाहायचा की ओटीटीवर पाहायचा संभ्रम आहे. याशिवाय कुटुंबासह सिनेमागृहात सिनेमा पाहणेही महाग झाले आहे. प्रेक्षकांना थिएटरपर्यंत खेचण्याची ताकद आता स्टार्समध्ये नाही. त्यांची वैयक्तिक आणि सामाजिक प्रतिमाही डागाळली आहे.