Asrani: असरानी यांच्यावर का झाले त्वरीत अंतिम संस्कार, मॅनेजरने केला खुलासा; पत्नीला सांगितली होती शेवटची इच्छा

प्रसिद्ध बॉलीवूड अभिनेते आणि "शोले" चित्रपटाचे जेलर असरानी यांचे वयाच्या ८४ व्या वर्षी निधन झाले. नरक चतुर्दशीच्या दिवशी अखेरचा श्वास घेतला आणि त्याच दिवशी घाईघाईने अंत्यसंस्कार करण्यात आले.

• असरानी यांचे अंत्यविधी पूर्ण
• घाईत का करण्यात आले अंत्यसंस्कार
• असरानी यांची शेवटची इच्छा 

प्रसिद्ध ज्येष्ठ अभिनेते असरानी यांच्या निधनाने सर्वांना धक्का बसला आहे. पाच दिवसांपूर्वी पंकज धीर यांचे निधन झाले आणि आता असरानी यांचेही निधन झाले आहे. २० ऑक्टोबर रोजी दिवाळीला असरानी यांनी अखेरचा श्वास घेतला आणि त्याच संध्याकाळी अभिनेत्याचे अंतिम संस्कारदेखील करण्यात आले. इतक्या घाईघाईत असरानी यांचे अंतिम संस्कार का करण्यात आले? कोणालाही त्यांचे अंतिम दर्शनदेखील घेता आले नाही आणि याबाबत नक्की काय कारण आहे हे असरानी यांचे व्यवस्थापक बाबूभाई थिबा यांनी स्पष्ट केले आहे.

बाबूभाई थिबा यांनी नवभारत टाईम्स डॉट कॉमला सांगितले की, १५-२० दिवसांपूर्वी असरानी यांना अशक्तपणा जाणवत होता. काही दिवसांपूर्वी त्यांना श्वास घेण्यास त्रास होत होता, त्यानंतर त्यांना रुग्णालयात दाखल करण्यात आले होते. 

Govardhan Asrani Passed Away : एक-दोन नव्हे तर तीन पिढ्यांना हसवणाऱ्या असरानी यांचे निधन

नक्की काय झाले होते?

बाबूभाई यांनी स्पष्ट केले की, “१५-२० दिवसांपूर्वी असरानी यांना अशक्तपणा जाणवत होता. त्यानंतर काही दिवसांपूर्वी त्यांना श्वास घेण्यास त्रास होऊ लागला, म्हणून त्यांना चार दिवसांपूर्वीच आरोग्य निधी रुग्णालयात दाखल करण्यात आले होते आणि तिथेच त्यांचे निधन झाले. असरानी यांच्या फुफ्फुसात पाणी भरले होते” 

घाईत अंतिम संस्कार का?

बाबूभाईंनी सांगितले की, २० ऑक्टोबर रोजी पहाटे ३ ते ३:३० च्या दरम्यान असरानी यांनी शेवटचा श्वास घेतला आणि रात्री ८ वाजता त्यांच्यावर अंत्यसंस्कार करण्यात आले. अंत्यसंस्कार इतक्या घाईघाईने का करण्यात आले असे विचारले असता बाबूभाई यांनी सांगितले की,, “त्यांच्या पत्नीने मला सांगितले की ते कोणालाही सांगू इच्छित नाहीत. असरानी यांच्या शेवटच्या इच्छेप्रमाणे त्यांनी पत्नीला सांगितले होते की शेवटचे विधी कोणालाही न सांगता शांततेत पार पाडा.”

अभिनेत्री मंजू बन्सलसह लग्न 

असरानी यांचे लग्न अभिनेत्री मंजू बन्सल यांच्याशी झाले होते आणि त्यांच्यामागे पत्नीशिवाय कोणतेही कुटुंब नाही. त्यांना मूलबाळ नव्हते. असरानी आणि मंजू यांनी अनेक चित्रपटांमध्ये एकत्र काम केले. १ जानेवारी १९४१ रोजी पंजाबमधील गुरुदासपूर येथे जन्मलेल्या असरानी यांनी पुण्यातील फिल्म अँड टेलिव्हिजन इन्स्टिट्यूट ऑफ इंडियामध्ये अभिनयाचे प्रशिक्षण घेतले. असरानी यांना लहानपणापासूनच अभिनय आणि चित्रपटांची आवड होती, म्हणून ते अनेकदा चित्रपट पाहण्यासाठी घराबाहेर पळून जात असत.

Asrani Passed Away: ‘एंग्रेजो के जमाने के जेलर’ असरानी यांनी कुठून घेतले होते शिक्षण

४०० पेक्षा अधिक चित्रपटांमध्ये काम

असरानी यांच्या निधनाने संपूर्ण चित्रपटसृष्टीला धक्का बसला आहे आणि शोककळा पसरली आहे. पंकज धीर यांच्या निधनाच्या धक्क्यातून अद्याप कोणीही सावरले नव्हते आणि आता आणखी एक दुर्मिळ रत्न निघून गेले आहे. असरानी यांनी त्यांच्या कारकिर्दीत ४०० हून अधिक चित्रपटांमध्ये संस्मरणीय भूमिका साकारल्या. परंतु “शोले” मधील जेलरच्या भूमिकेसाठी लोक अजूनही त्यांना आठवतात आणि त्यांचे कौतुकही करतात.