Sweet Potato Chaat: उपवासात काहीतरी चटपटीत खायचंय? झटपट तयार करा रताळ्याची चविष्ट चाट!

नवरात्री काही तासांवर येऊन ठेपली आहे. या नऊ दिवसांत घरात एकदम वेगळं वातावरण राहतं. सगळीकडे देवीचा गजर, आरती आणि उपवास धरतात. नऊ दिवसांमध्ये देवीची नऊ रुपयांची पूजा केली जाते. तसेच बरेचजण उपवास पकडतात. उपवास म्हटला की नऊ दिवस चप्पल न घालणे, मीठ न खाणे आणि फक्त उपवासाचे पदार्थ खाणे असा नियम बऱ्याच घरात पाळला जातो. याकाळात साबुदाणा, बटाटा खाऊन कंटाळा येतो आणि वजन देखील वाढते.

मग प्रश्न पडतो की उपवासाला वेगळं आणि पोटभरीचं काय खायचं? तर त्यासाठी उत्तम पर्याय म्हणजे रताळे असते. ते शरीरासाठी सर्वात चांगले, पौष्टीक आणि भरपूर एनर्जी देणारे कंदमुळ आहे. आज आम्ही तुम्हाला रताळ्यापासून एक चटपटीत चाट कसा बनवायचा त्याची एकदम सोपी रेसिपी सांगणार आहोत. हे बनवायला केवळ 10 मिनिटांपेक्षा जास्त वेळ लागणार नाही आणि साहित्य पण घरातलंच लागेल.

लागणारे साहित्य हे चाट बनवण्यासाठी तुम्हाला जास्त काही आणायची गरज नाही. 2-3 मध्यम आकाराचे रताळे,थोडंसं पाणी, अर्धा चमचा आमचूर पावडर, अर्धा चमचा जिरे पावडर, चवीपुरतं सैंधव मीठ, म्हणजे उपवासाचं मीठ, एका लिंबाचा रस, हवी असेल तर थोडी बारीक चिरलेली कोथिंबीर आणि एक हिरवी मिरची.

बनवण्याची पद्धत सगळ्यात आधी रताळी स्वच्छ धुऊन घ्या. त्यावर खूप माती असते त्यामुळे दोन-तीन पाण्याने धुवा. आता एका कुकरमध्ये किंवा पातेल्यात पाणी गरम करायला ठेवा आणि त्यात ही रताळी उकडायला टाका. कुकरमध्ये 2-3 शिट्ट्या झाल्या की गॅस बंद करा.रताळी उकडल्यानंतर ती बाहेर काढा आणि थंड होऊ द्या. गरम असताना साल काढायला जाऊ नका, हात भाजेल. थंड झाल्यावर त्याची साल काढा आणि त्याचे छोटे-छोटे चौकोनी तुकडे करून घ्या. खूप मोठे तुकडे करू नका, नाहीतर मसाला लागणार नाही.

आता एका मोठ्या भांड्यात हे तुकडे टाका. त्यावर आमचूर पावडर, भाजलेल्या जिऱ्याची पावडर आणि सैंधव मीठ टाका. हे सगळं हातानेच हलकं मिक्स करा. चमच्याने जास्त घोटू नका, नाहीतर रताळ्याचा लगदा होईल. शेवटी त्यावर एका लिंबाचा रस पिळा. लिंबामुळे या चाटला एकदम चटपटीत टेस्ट येते. जर तुम्हाला तिखट आवडत असेल तर एक बारीक चिरलेली हिरवी मिरची पण टाकू शकता. वरून थोडी कोथिंबीर टाकली की झालं. तुमचं गरमागरम आणि चटपटीत रताळ्याचं चाट तयार आहे.

हे चाट इतकं खास का आहे?हे फक्त उपवासासाठीच नाही तर तुम्ही संध्याकाळच्या नाश्त्यासाठी पण बनवू शकता. ज्यांना डाएट करायचं आहे त्यांच्यासाठी पण हा एक हेल्दी ऑप्शन आहे. यात तेलाचा वापर अजिबात नाही, त्यामुळे वजन वाढायची भीती नाही. लहान मुलांना पण हे आवडेल.तर या नवरात्रीत तोच तो साबुदाणा खिचडी खाण्यापेक्षा हे नवीन चाट एकदा नक्की ट्राय करून बघा. घरातल्यांना पण नक्की आवडेल.