Navnath Waghmare News: मराठा समाजातील मुलींविषयी केलेल्या आक्षेपार्ह वक्तव्याप्रकरणी ओबीसी नेते नवनाथ वाघमारे यांच्याविरोधात जालन्यात गुन्हा दाखल करण्यात आला आहे. जालन्यातील कदीम पोलीस ठाण्यात एका महिलेने दिलेल्या तक्रारीनंतर हा गुन्हा दाखल करण्यात आला आहे.
नवनाथ वाघमारे यांनी मराठा समाजातील मुलींविषयी लज्जास्पद आणि अपमानास्पद शब्दांचा वापर केला. तसेच त्यांच्या वक्तव्यामुळे दोन समाजांमध्ये तेढ निर्माण होण्याची शक्यता असल्याचेही तक्रारीत नमूद करण्यात आले आहे.
“मराठा समाजातील मुलींसाठी लज्जास्पद वाटेल असे शब्द त्यांनी उच्चारले आहेत. तसेच दोन समाजांमध्ये तेढ वाढेल असे वक्तव्य केले आहे. त्यामुळे आम्ही त्यांच्या विरोधात तक्रार दिली आहे. त्यांना लवकरात लवकर अटक करण्यात यावी,” अशी मागणी तक्रारदार महिलेने केली.
या प्रकरणावर मराठा आंदोलक गंगाधर काळकुटे यांनीही प्रतिक्रीया दिली आहे. नवनाथ वाघमारे यांना महाराष्ट्रातून हद्दपार करण्याची मागणी त्यांनी केली. तसेच त्यांच्यावर कठोर कारवाई व्हावी, अशी भूमिका काळकुटे यांनी मांडली. नवनाथ वाघमारे यांच्या कथित वक्तव्यावरून दोन समाजांमध्ये तणाव निर्माण होऊ नये, यासाठी प्रशासन आणि पोलिसांकडून परिस्थितीवर लक्ष ठेवले जात आहे. या प्रकरणातील नेमके वक्तव्य, त्याची पार्श्वभूमी आणि पोलिसांच्या तपासातून पुढे काय निष्पन्न होते, याकडे लक्ष लागले आहे.
ओबीसी समाजाचे नेते नवनाथ वाघमारे यांनी मराठा समाजाच्या तरूणींबद्दल धक्कादायक विधान केले आहे. त्यांच्या या विधानाने राज्यात पुन्हा एकदा नव्या वादाची ठिगणी पडण्याची शक्यता आहे. ” ओबीसी नेत्यांची गोंडस मुले पाहून मराठा समाजाच्या तरूणी घरात घुसतात. त्यांची मुले आणि पैसा बघतात,” असं धक्कादायक विधान वाघमारे यांनी केलं आहे.
चंद्रशेखर बावनकुळे यांनी स्वत: सांगितलय की, माझी सून मराठा आहे. माझी बायको कुणबी आहे. त्यांच्या घरात सगळे सोयरे घुसले असतील. फक्त बावनकुळे यांच्याच नाही तर अनेक मंत्र्यांच्या घरात मराठ्यांच्या मुली घुसल्या आहेत. म्हणजे ओबीसी नेत्यांच्या मंत्र्यांची सुंदर मुले दिसली की, या मराठ्यांच्या मुली ओबीसी मंत्र्यांच्या घरात घुसतात. मग जर हे मंत्री मराठ्यांच्या मुलीचे ऐकून ओबीसींचं वाटोळे करणार असतील तर त्यांनी आम्हाला ओबीसींची गरज नाही असं समोर येऊन सांगावे.” असंही वाघमारे यांनी म्हटलं आहे.
वाघमारे यांच्या या वक्तव्यानंतर राज्यभरात अनेक ठिकाणी त्यांच्याविरोधात महिला आक्रमक झाल्या आहेत. अनेक महिला रस्त्यावर उतरल्या असून वाघमारेंच्या तोंडाला काळे फासणार असल्याचा इशाराही अनेकांनी दिला आहे. शिवसेना नेत्या रेखा कोंडे म्हणाल्या की,” हा फक्त मराठा नाही तर सर्व महिला वर्गाच्या सन्मानाचा विषय आहे. कोणत्याही समाजातील स्रीयांचा अपमान करणे हा खूप मोठा गुन्हा आहे. मराठा समाजातीलच मुलीच ओबीसी मुलांसोबत लग्न करतात असे नाही तर कित्येक ओबीसी समाजातील मुलीदेखील मराठी मुलांसोबत लग्न करतात.”
.png "Videos"){kind=small}
