'उद्धव ठाकरेंना मुख्यमंत्री होण्यापासून रोखण्यासाठी राऊतांनी कुभांड रचले', नरेश म्हस्केंचा गंभीर आरोप
खासदार म्हस्के यांनी संजय राऊत यांच्यावर निशाणा साधला. राज्यसभेची उमेदवारी राऊत यांना जाहीर करताना विलंब झाला होता, त्यावेळी राऊत यांनी उद्धव ठाकरे आणि रश्मी ठाकरेंना शिव्या घातल्या होत्या. उद्धव ठाकरेंविरोधात राऊत यांनी पवईतील हॉटेलात आमदारांची बैठक घेतली होती. या बैठकीत राऊत यांनी उद्धव ठाकरेंविरोधात गरळ ओकली, असा दावा खासदार म्हस्के यांनी केला.
उद्धव ठाकरे मुख्यमंत्री झाले पण स्वत:च्या भावाला मंत्रिपद दिले नाही. तसेच खासदारकीची उमेदवारी देण्यात उशीर झाल्याने राऊत हे उद्धव ठाकरेंवर चिडले होते, हे शिवसेनेला माहित आहे, असे ते म्हणाले. एकनाथ शिंदेंसोबत जाणारा पहिला जिल्हा प्रमुख मी आहे. उद्धव ठाकरेंनी फोन केला तेव्हा त्यांनाही मी वर्षा बंगल्यावर येणार नाही. एकनाथ शिंदे यांच्यावरील अन्याय दूर करा, पक्षाला त्यांची गरज आहे, असे उद्धव ठाकरेंना स्पष्ट सांगणारा मी एकमेव होतो, असे खासदार म्हस्के म्हणाले. ठाण्याचे नेतृत्व कर, असे उद्धव ठाकरे म्हणाले होते, मात्र आपण शिंदे साहेबांसोबतच जाणार, असे वर्षा बंगल्यावर ठणकावून सांगणारा मीच एकमेव होतो, असे खासदार म्हस्के म्हणाले.
सकाळचा भोंगा अशी उपमा दिल्याने राऊतांना आपल्यावर राग आहे, असे खासदार म्हस्के म्हणाले. विधान परिषदेची उमेदवारी मिळेल, असे राऊत तुम्ही अयोध्येत मला एकनाथ शिंदेंसमक्ष सांगितले होते. पण आमशा पाडवी यांना तिकिट दिले कारण नरेश म्हस्के एकनाथ शिंदेंसोबत जाईल म्हणून संधी देऊ नका, असे उद्धव ठाकरेंना कोणी सांगितले, असा सवाल खासदार म्हस्के यांनी केला. एकनाथ शिंदे यांनी जेव्हा वेगळी भूमिका घेतली तेव्हा रोज सकाळ संध्याकाळ फोन करुन तुम्ही काय काय बोलत होतात, हे तुम्हीच जाहीर करा. एकनाथ शिंदेंविरोधात तक्रारीचे एकतरी पत्र दाखवा अन्यथा तुमच्या खासदाराकीचा राजीनामा द्या, असे प्रतिआव्हान खासदार म्हस्के यांनी दिले.
राऊत यांचे ठाकरेंबाबत बेगडी प्रेम आहे. उद्धव ठाकरेंच्या डोक्यात मुख्यमंत्री होण्याचे खूळ राऊत यांनीच घातले आणि महाराष्ट्राला एक कुचकामी मुख्यमंत्री दिला. एकसंध पक्षाचे वाटोळे करण्याचे काम राऊत यांनी केले. राऊतांना पक्ष ताब्यात घ्यायचा होता आणि काँग्रेसमध्ये विलीन करायचा आहे, अशी घणाघाती टीका खासदार म्हस्के यांनी संजय राऊत यांच्यावर केली. शिवसैनिकांचे शाप तुम्हाला भोगावे लागतील, असे खासदार म्हस्के म्हणाले.
.png "Videos"){kind=small}
