Omraje Nimbalkar
मुंबई : महाराष्ट्राच्या राजकारणात सध्या दोन राष्ट्रवादी काँग्रेसच्या विलिनीकरणाची चर्चा रंगली असतानाच आता शिवसेनेच्या दोन्ही गटांच्या एकत्रीकरणाचा मुद्दाही चर्चेत आला आहे. एकनाथ शिंदे आणि उद्धव ठाकरे पुन्हा एकत्र येणार का, असा सवाल उपस्थित होत असतानाच शिंदे गटाचे खासदार ओमराजे निंबाळकर यांनी याबाबत महत्त्वाचं विधान केलं आहे. (Shivsena Merger)
एका मराठी वृत्तवाहिनीशी बोलताना ओमराजे निंबाळकर यांनी शिवसेनेच्या दोन्ही गटांच्या एकत्र येण्याबाबत आपली भूमिका मांडली. दोन्ही पक्षांचे प्रमुख सध्या वेगवेगळे असल्याने एकत्रीकरणाचा अंतिम निर्णय त्यांनाच घ्यावा लागेल, असं त्यांनी स्पष्ट केलं.
मात्र, दोन्ही शिवसेना एकत्र आल्या तर आम्हाला आनंदच होईल. सामान्य नागरिक आणि कार्यकर्त्यांचीही अशीच भावना असल्याचं ओमराजे म्हणाले. त्यामुळे त्यांच्या या विधानाची राजकीय वर्तुळात चर्चा सुरू झाली आहे.
यावेळी ओमराजे यांनी ठाकरे गट सोडून शिंदे गटात जाण्याच्या निर्णयावरही भाष्य केलं. पक्षबदलाचा निर्णय कोणीही आनंदाने घेत नसतो. त्यामागे काहीतरी परिस्थिती निर्माण झालेली असते, असं त्यांनी सांगितलं. जनतेने आरसा दाखवायला सुरुवात केली होती. नगरपालिका, जिल्हा परिषद आणि पंचायत समितीच्या निवडणुकांमध्ये पराभवाचा सामना करावा लागला होता. एकही नगरपालिका किंवा पंचायत समिती मिळू नये इतकं आमचं काम वाईट होतं का, असा सवालही त्यांनी उपस्थित केला.
दरम्यान, शिंदे गटाचे विधानपरिषदेचे आमदार चंद्रकांत रघुवंशी यांनीही याआधी शिवसेनेच्या एकत्रीकरणाबाबत विधान केलं होतं. एकनाथ शिंदे आणि उद्धव ठाकरे एकत्र आले तर ती खरी दिवाळी ठरेल, असं ते म्हणाले होते. आता ओमराजे निंबाळकर यांनीही दोन्ही शिवसेना एकत्र येण्याबाबत सकारात्मक भावना व्यक्त केल्याने या चर्चेला पुन्हा सुरुवात झाली आहे.
मात्र, राज्यातील राजकीय घडामोडी पाहता या सर्व विधानांनंतरही दोन्ही पक्षांच्या एकत्रीकरणाबाबत आता राजकीय प्रतिक्रिया येण्यास सुरुवात झाली आहे. याबाबत आता एकनाथ शिंदे आणि उद्धव ठाकरे यांची भूमिका काय असणार, याकडे राजकीय वर्तुळाचं लक्ष लागलं आहे.
दोन्ही राष्ट्रवादी एकत्र येणार? विलिनीकरणाच्या चर्चांवर उदय सामंतांचं मोठं विधान!
.png "Videos"){kind=small}
