सांगलीचा खासदार भाजपचाच असणार; आमदार गोपीचंद पडळकरांचे विशाल पाटलांना थेट आव्हान

२०२९ च्या निवडणुकीसाठी आतापासूनच कंबर कसली असून, भाजपचा विजय निश्चित करण्यासाठी आपण 'जीवाचे रान' करू आणि विरोधकांचा 'कार्यक्रम' करू, असा इशारा त्यांनी दिला.

सांगली : आगामी २०२९ च्या लोकसभा निवडणुकीत सांगलीचा खासदार भारतीय जनता पक्षाचाच असेल, असा निर्धार भाजप आमदार गोपीचंद पडळकर यांनी व्यक्त केला आहे. सांगलीत आयोजित भाजपच्या एका मेळाव्यात बोलताना पडळकरांनी विद्यमान खासदार विशाल पाटील यांना थेट आव्हान देत, “२०२९ मध्ये विशाल पाटील खासदार नसणार हे लिहून ठेवा,” असे विधान केले आहे.

पडळकर यांनी या मेळाव्यात बोलताना अत्यंत आक्रमक पवित्रा घेतला. २०२९ च्या निवडणुकीसाठी आतापासूनच कंबर कसली असून, भाजपचा विजय निश्चित करण्यासाठी आपण ‘जीवाचे रान’ करू आणि विरोधकांचा ‘कार्यक्रम’ करू, असा इशारा त्यांनी दिला. विशाल पाटील यांना उद्देशून बोलताना ते म्हणाले की, परिस्थिती काहीही असली तरी पुढील निवडणुकीत पाटील विजयी होणार नाहीत याची खात्री आपण पटवून देऊ.

पलूस-कडेगाव आणि इस्लामपूरमध्येही जोर लावणार

केवळ सांगली शहरच नव्हे, तर जिल्ह्यातील पलूस-कडेगाव आणि इस्लामपूर यांसारख्या भागांतही भाजप आता आक्रमकपणे काम करणार असल्याचे पडळकरांनी स्पष्ट केले. “भारतीय जनता पार्टीच्या नेतृत्वात आम्ही लोकांच्या मध्ये जाऊ, लोकांची कामे करू आणि मेहनत करून हा बदल घडवून आणू,” असा विश्वास त्यांनी व्यक्त केला.

पडळकरांकडून विरोधकांवर टीका

दरम्यान, या आव्हानामुळे सांगलीच्या राजकीय वर्तुळात आतापासूनच २०२९ च्या निवडणुकांचे पडघम वाजू लागल्याची चर्चा सुरू झाली आहे. नुकत्याच झालेल्या जिल्हा परिषद निवडणुकीत विशाल पाटील, जयंत पाटील आणि विश्वजीत कदम यांच्यामुळे पडळकर यांच्या हातून जिल्हा परिषद अध्यक्ष पद गेल्याने आता ते या तीन नेत्यांचे उट्टे काढण्याच्या तयारीत असल्याचे बोलले जात आहे.

९९ टक्के कुणबी जातीचे दाखले बोगस

दुसरीकडे, आमदार पडळकर यांनी काही दिवसांपूर्वीच कुणबी दाखल्यावरून गंभीर आरोप केला होता. राज्यातील तब्बल ९९ टक्के कुणबी जातीचे दाखले बोगस असल्याचा गंभीर आरोप केला. त्यांच्या या आरोपामुळे जोरदार खळबळ उडाली. आटपाडी तालुक्यातील दिघंची जिल्हा परिषद गटाचे सदस्य शिवराज (पृथ्वीराज) तानाजी पाटील यांच्या कुणबी दाखल्यावरून वाद पेटला असून, सादर करण्यात आलेल्या कागदपत्रांतील विसंगतीमुळे राजकीय वर्तुळात चर्चांना उधाण आले होते.

हेदेखील वाचा : Sangli News : ‘पीएम सूर्य घर’ योजनेची अंमलबजावणी प्रभावीपणे करा; खासदार विशाल पाटील यांचे महावितरणला निर्देश