गुरुवार, 29 ऑक्टोबर 2026
सध्याची राजकीय शांतता ही वादळापूर्वीची तर नाही ना अशी चर्चा सुरू झाली आहे. भाजपाने साताऱ्यात पक्षीय ध्येयधोरण जरी राबवले तरी खऱ्या अर्थाने आता उमेदवारी अर्ज दाखल केल्यानंतर आघाड्यांचे राजकारण सुरू झाले आहे. म्हणून 50 उमेदवारांना 50 अपक्षांनी आव्हान दिल्याने साताऱ्याचे राजकारण नक्की कोणत्या वळणावर जाणार याबाबत साशंकता निर्माण झाली आहे.
जलमंदिर येथे सातारा विकास आघाडीच्या कार्यकत्यांची तातडीची बैठक बोलवण्यात आल्याची माहिती आहे. सातारा विकास आघाडी अपक्षांना रसद पुरवण्याचा छुपा अजेंडा राबवणार तर नाही ना, याची भीती आता शिवेंद्रराजे समर्थकांना वाटत आहे. कारण उदयनराजे यांचा गनिमी कावा आणि धक्कातंत्र हे संपूर्ण सातारा शहराला ठाऊक आहे. एका रात्रीत प्रभागाची समीकरणे फिरवण्यात उदयनराजे यांचा हात कोणी धरू शकत नाही. त्यामुळे उदयनराजे यांची चुप्पी बऱ्याच राजकीय प्रश्नांना जन्म देत आहे.
साताऱ्याचा बच्चन सायलेंट मोडवर..! खासदार उदयनराजे भोसले यांना त्यांचे समर्थक आवडीने साताऱ्याचा बच्चन म्हणतात. पुष्पा चित्रपटातल्या अल्लू अर्जुन प्रमाणे झुकेगा नही साला अशी सिग्नेचर अ‍ॅक्शन करत उदयनराजे यांचा दबंग अंदाज नेहमीच पाहायला मिळतो, मात्र उदयनराजे यांच्या आवडीचा खांदा कार्यकर्ता नगराध्यक्ष पदाच्या शर्यतीतून अचानक बाहेर पडल्यापासून उदयनराजे सायलेंट मोडवर आहेत. कदाचित त्यांची नाराजी व्यक्त करायला ही वेळ नाही आणि व्यासपीठही नाही. नगरपालिका निवडणुकीची धामधूम असल्याने उदयनराजे यांनी कोणतीही अद्याप प्रतिक्रिया दिलेली नाही.
