Marathi Bhasha Din: ‘माझा मराठीची बोलू कौतुके।’ मराठी मातीचा अभिमान आणि कुसुमाग्रजांचा वारसा; वाचा ‘या’ खास दिवसाचे महत्व

Marathi Bhasha Gaurav Din: 27 फेब्रुवारी 2026 ला मराठी भाषा अभिमान दिन साजरा करण्यात येत आहे. हा दिवस प्रसिद्ध कवी विष्णू वामन शिरवाडकर, ज्यांना कुसुमाग्रज म्हणूनही ओळखले जाते, त्यांचा जन्मदिवस होता.

• कुसुमाग्रजांचा वारसा
• ऐतिहासिक मुळे
• जागतिक स्थान

Marathi Bhasha Gaurav Din 2026 : “लाभले आम्हास भाग्य बोलतो मराठी…” या ओळी कानावर पडल्या की प्रत्येक मराठी माणसाचे हृदय अभिमानाने भरून येते. आज २७ फेब्रुवारी, म्हणजेच मराठी भाषा गौरव दिन (Marathi Bhasha Gaurav Din 2026) आजच्या दिवशी अवघा महाराष्ट्र आपल्या मायबोलीचा उत्सव साजरा करत आहे. हा दिवस केवळ कॅलेंडरवरची एक तारीख नाही, तर तो आपल्या सांस्कृतिक अस्मितेचा सोहळा आहे. प्रसिद्ध कवी, नाटककार आणि ज्ञानपीठ विजेते विष्णू वामन शिरवाडकर, ज्यांना आपण प्रेमाने ‘कुसुमाग्रज’ म्हणतो, त्यांच्या जयंतीनिमित्त हा गौरव दिन साजरा केला जातो.

कुसुमाग्रज: मराठी साहित्यातील धगधगता सूर्य

वि. वा. शिरवाडकर यांनी मराठी साहित्याला एका वेगळ्या उंचीवर नेऊन ठेवले. त्यांच्या ‘नटसम्राट’ नाटकाने मराठी रंगभूमीवर इतिहास घडवला, तर ‘विशाखा’ सारख्या काव्यसंग्रहाने तरुणांच्या मनात क्रांतीची ज्योत पेटवली. कुसुमाग्रजांनी मराठीला केवळ बोलीभाषा न ठेवता ती ‘ज्ञानभाषा’ व्हावी, यासाठी आयुष्यभर प्रयत्न केले. त्यांच्या साहित्यातील ओज, माधुर्य आणि सामाजिक भान यामुळेच त्यांचा जन्मदिन हा ‘गौरव दिन’ म्हणून साजरा करण्याचा निर्णय महाराष्ट्र शासनाने घेतला.

जागतिक घडामोडी संबंधित बातम्या वाचण्यासाठी येथे क्लिक करा : PM Modi Israel Visit: ‘आम्ही फक्त तुमचे आहोत!’ इस्रायलने जगाला नाकारलं; पण भारताला दिलं ‘हे’ अपराजेय महाविनाशक शस्त्र

मराठी भाषेचा ऐतिहासिक प्रवास: १००० वर्षांचा वारसा

मराठी भाषेचा जन्म कधी झाला, हा प्रश्न अनेकांना पडतो. ऐतिहासिक पुराव्यांनुसार, मराठी भाषा ही १००० वर्षांहून अधिक प्राचीन आहे. शिलाहार राजवटीतील शिलालेख याचे जिवंत पुरावे आहेत. रायगड जिल्ह्यातील अक्षी येथील १०१२ चा शिलालेख आणि दिवे येथील १०६० च्या आसपासचा ताम्रपट मराठी भाषेच्या सुरुवातीच्या खुणा दर्शवतात. संत ज्ञानेश्वर, संत तुकाराम यांच्या अभंगांपासून सुरू झालेला हा प्रवास आज आधुनिक साहित्यापर्यंत तितक्याच दिमाखात सुरू आहे.

See more

का मना लाविला टाळा,
का एकांताशी चाळा ,
का इतक्या उंचीवरती
ठेविल्या जपाच्या माळा ? उलघाल कशाने व्हावी
का जीवज्योत तापावी
का शुभ्र देखणा पक्षी
भासावा काळा काळा रंगात भिजुनिया पात
वाऱ्यावर झोके खात
झोक्याच्या उंचीखाली
लवलवत्या भेदक ज्वाळा –शिवानी मायमराठीच्या चरणांशी… pic.twitter.com/svl2T2xnK9 — SHIVANI GOKHALE 🚩 (@shivanigokhale) February 27, 2026

credit – social media and Twitter

मराठीचे महत्त्व: ८ कोटी हृदयांची स्पंदने

आज जगात मराठी बोलणाऱ्यांची संख्या ८३ दशलक्ष (८.३ कोटी) हून अधिक आहे. भारताच्या २२ अनुसूचित भाषांपैकी एक असलेली मराठी ही केवळ महाराष्ट्राची अधिकृत भाषा नाही, तर ती एक समृद्ध जीवनशैली आहे. व्यापार, शिक्षण, चित्रपट, नाटक आणि इंटरनेटच्या युगातही मराठीने आपले स्वतंत्र स्थान टिकवून ठेवले आहे. मराठी भाषेची ही विविधता – मग ती अहिराणी असो, मालवणी असो वा वऱ्हाडी – तिचे सौंदर्य अधिक खुलवते.

जागतिक घडामोडी संबंधित बातम्या वाचण्यासाठी येथे क्लिक करा : US-Iran War: इराणच्या उंबरठ्यावर उभं अमेरिकन ‘आरमारी’ वादळ; पण जनरल डॅनने ट्रम्पना दिली ‘अशी’ अनर्थाची सावटसूचना

मराठी भाषेचा उद्देश आणि भवितव्य

मराठी भाषा गौरव दिन साजरा करण्यामागचा मुख्य उद्देश म्हणजे तरुण पिढीला आपल्या मायबोलीच्या समृद्ध वारशाची ओळख करून देणे. आजच्या डिजिटल जगात जिथे इंग्रजीचा प्रभाव वाढत आहे, तिथे आपल्या भाषेतील शब्दांची ताकद, व्याकरण आणि साहित्याचा आनंद टिकवून ठेवणे ही आपली जबाबदारी आहे. कुसुमाग्रजांनी पाहिलेले ‘मराठी ज्ञानभाषा’ होण्याचे स्वप्न पूर्ण करण्यासाठी आपण सर्वांनी प्रयत्न करणे गरजेचे आहे.