
Kho Kho Championship : महाराष्ट्राच्या खो-खोपटूंचा मैदानावर धुमाकूळ; आंध्र, हिमाचलला लोळवले
Kho Kho Championship : राष्ट्रीय खो-खोच्या मैदानावर महाराष्ट्राच्या मुला-मुलींनी एकाच दिवशी विजयाचा दुहेरी धमाका केला. पारुल विद्यापीठ, गुजरात येथे सुरू असलेल्या 45 व्या ज्युनिअर राष्ट्रीय खो-खो अजिंक्यपद स्पर्धेत महाराष्ट्राच्या दोन्ही संघांनी साखळी सामन्यांत प्रतिस्पर्ध्यांना निष्प्रभ करत दिमाखदार विजय नोंदवले.
मुलींच्या संघाने आंध्र प्रदेशचा 30-12 असा 18 गुणांनी, तर मुलांच्या संघाने हिमाचल प्रदेशचा 38-18 असा 20 गुणांनी धुव्वा उडवला. विशेष म्हणजे, दोन्ही संघांनी एक डाव राखून विजय मिळवत राष्ट्रीय स्पर्धेतील आपली ताकद दाखवून दिली.
मुलींच्या ‘अ’ गटातील सामन्यात महाराष्ट्राने आंध्र प्रदेशचा 30-12 असा एक डाव आणि 18 गुणांनी पराभव केला. नाणेफेक जिंकून प्रथम संरक्षणाचा निर्णय घेतलेल्या महाराष्ट्राच्या खेळाडूंनी सुरुवातीपासूनच सामन्यावर वर्चस्व गाजवले. आक्रमण आणि संरक्षण या दोन्ही आघाड्यांवर प्रभावी कामगिरी करत महाराष्ट्राने प्रतिस्पर्ध्याला वरचढ होण्याची संधीच दिली नाही.
महाराष्ट्राच्या विजयात श्वेता नवलेने 1 मिनिट 30 सेकंद नाबाद संरक्षणासह तब्बल 10 गुणांची कमाई करत निर्णायक भूमिका बजावली. धनश्री कंकने 3 मिनिटे 10 सेकंद संरक्षण आणि चार गुण, तर मैथिली पवारने 3 मिनिटे 10 सेकंद संरक्षण व दोन गुण मिळवत विजयाला भक्कम आधार दिला. वेदिका तामखडेने 2 मिनिटे 20 सेकंद संरक्षण, स्नेहा लामकानेने चार गुण, तर नंदिनी सिसोदियाने दोन गुण मिळवत संघाच्या विजयात मोलाची भर घातली.
महाराष्ट्राच्या खेळाडूंनी संरक्षणात तब्बल आठ बोनस गुण (ड्रीम रन) मिळवत आपली क्षमता सिद्ध केली. आंध्र प्रदेशकडून एम. डी. लक्ष्मी, एम. वाय. श्री, नेक्कलापुडी आणि ताडिथला प्रिया यांनी प्रत्येकी दोन गुण मिळवले; मात्र महाराष्ट्राच्या एकत्रित खेळापुढे त्यांचे प्रयत्न अपुरे ठरले.
मुलांच्या ‘ब’ गटातील सामन्यात महाराष्ट्राच्या संघाने हिमाचल प्रदेशवर 38-18 असा एक डाव आणि 20 गुणांनी दणदणीत विजय मिळवला. महाराष्ट्राच्या खेळाडूंनी आक्रमणात सातत्यपूर्ण गुणांची कमाई करत सामन्याची सूत्रे आपल्या हाती ठेवली.
वैयक्तिक चमकदार कामगिरीसोबतच सांघिक समन्वयाच्या जोरावर महाराष्ट्राने एकतर्फी विजय साकारला. महाराष्ट्राकडून ताबरेज खानने सर्वाधिक 10 गुण मिळवत आक्रमणात धडाका उडवला. हरदाय वसावेने 2 मिनिटे 30 सेकंद संरक्षण आणि 6 गुण, तर जितेंद्र वसावेने 2 मिनिटे 50 सेकंद व दोन मिनिटे संरक्षणासह 4 गुण मिळवत विजयात महत्त्वाची भूमिका बजावली.
पार्थ देवकतेने दोन मिनिटे संरक्षण व दोन गुण, तर समर्थ चव्हाणने एक मिनिट संरक्षण करत संघाला मोलाची साथ दिली. हिमाचल प्रदेशकडून राजीव ठाकूर आणि अरक्षित शर्मा यांनी प्रत्येकी सहा गुण, तर नमन धिमानने दोन गुण मिळवले. मात्र महाराष्ट्राच्या आक्रमक खेळासमोर हिमाचल प्रदेशचा प्रतिकार टिकू कला नाही.
Ans: ही स्पर्धा गुजरातमधील पारुल विद्यापीठ येथे सुरू आहे.
Ans: महाराष्ट्राच्या मुलींच्या संघाने आंध्र प्रदेशचा 30-12 असा 18 गुणांनी पराभव केला.
Ans: महाराष्ट्राच्या मुलांच्या संघाने हिमाचल प्रदेशचा 38-18 असा 20 गुणांनी पराभव केला.