फोटो सौजन्य - X
आशिया कप २०२५ साठी टीम इंडियाचा १५ सदस्यीय संघ जाहीर करण्यात आला आहे. यामध्ये सर्वात आश्चर्यकारक गोष्ट म्हणजे श्रेयस अय्यरला संघाबाहेर ठेवणे. त्यानंतर क्रिकेट चाहत्यांनी सोशल मिडियावर नाराजी व्यक्त केली आहे. त्याने मागिल काही मालिकांमध्ये त्याचबरोबर आयपीएल 2025 मध्ये देखील कमालीची कामगिरी केली होती. अय्यरने गेल्या १ वर्षात खूप चांगली कामगिरी केली आहे.
आयपीएल २०२५ मध्ये, त्याच्या नेतृत्वाखाली, त्याने पंजाब किंग्जला बऱ्याच काळानंतर अंतिम फेरीत नेले आणि ६०० हून अधिक धावाही केल्या, तरीही अय्यरची आशिया कप २०२५ साठी टीम इंडियाच्या संघात निवड झाली नाही. आता बीसीसीआय श्रेयस अय्यरवर मोठी जबाबदारी सोपवणार आहे.
दैनिक जागरणच्या वृत्तानुसार, बीसीसीआय शुभमन गिलऐवजी श्रेयस अय्यरला एकदिवसीय संघाचा कर्णधार बनवण्याचा विचार करत आहे. तथापि, अद्याप याबद्दल कोणतीही अधिकृत माहिती समोर आलेली नाही. अय्यरसाठी हे वर्ष खूप चांगले होते. २०२५ च्या चॅम्पियन्स ट्रॉफीमध्ये तो सर्वाधिक धावा करणारा भारतीय फलंदाज देखील होता. ज्यामध्ये त्याने २४३ धावा केल्या. ज्यामुळे त्याने एकदिवसीय सामन्यांमध्ये कर्णधारपदाचा दावा मजबूत केला. अय्यर हा टीम इंडियाचा मधल्या फळीतील सर्वात विश्वासार्ह फलंदाज आहे.
अय्यरने आतापर्यंत ७० एकदिवसीय सामने खेळले आहेत, ज्यामध्ये त्याने ४८.२२ च्या सरासरीने २८४५ धावा केल्या आहेत. यादरम्यान त्याच्या बॅटमधून ५ शतकेही निघाली आहेत. खरंतर, रोहित शर्मा सध्या एकदिवसीय संघाचा कर्णधार आहे, पण आता रोहित शर्मा २०२७ च्या एकदिवसीय विश्वचषकापर्यंत कर्णधारपद भूषवू शकेल अशी आशा फारच कमी आहे. अनेक अहवालांमध्ये असा दावा केला जात आहे की रोहित शर्मा ऑस्ट्रेलियाविरुद्धच्या एकदिवसीय मालिकेतील शेवटचा सामना खेळू शकतो.
सध्या टीम इंडियाकडे तिन्ही फॉरमॅटमध्ये वेगवेगळे कर्णधार आहेत. रोहित शर्माने कसोटी क्रिकेटमधून निवृत्ती घेतल्यानंतर शुभमन गिलला नवीन कर्णधार बनवण्यात आले. त्याच्या नेतृत्वाखाली टीम इंडियाने इंग्लंडमध्ये शानदार कामगिरी केली. त्यानंतर आता गिलला आशिया कप २०२५ साठी टीम इंडियाचा उपकर्णधार बनवण्यात आले आहे. त्यानंतर अनेक माजी क्रिकेटपटूंना असेही वाटते की बीसीसीआय आता गिलकडे सर्व फॉरमॅटमध्ये कर्णधार म्हणून पाहत आहे, परंतु आता अशी एक अपडेट समोर आली आहे ज्यामुळे अय्यरचे चाहते खूप आनंदी होतील.
.png "Videos"){kind=small}
