Cricket News: पुणे’ज कॉर्पोरेट क्लॅशमध्ये कॉग्निझंटचा विजयाचा चौकार! यूबीएस पुणेचीही विजयी घोडदौड कायम

Cricket News: यूबीएस पुणेकडून राजेश वर्माने २२ धावांत ३ बळी टिपले, तर प्रवीण सिंग व अंकित जैन यांनी प्रत्येकी १ बळी मिळवला. १३३ धावांचे लक्ष्य यूबीएस पुणे संघाने १७.२ षटकांत अवघ्या २ गड्यांच्या मोबदल्यात सहज पूर्ण केले.

• कॉग्निझंट, यूबीएस पुणेची विजयी घोडदौड कायम
• ओंकार गायकवाडची भेदक गोलंदाजी;
• प्रवीण सिंगची अष्टपैलू कामगिरी 

पुणे/Cricket News: थेरगाव येथील व्हेरॉक वेंगसरकर क्रिकेट मैदानावर सुरू असलेल्या पहिल्या ‘पुणे’ज कॉर्पोरेट क्लॅश क्रिकेट लीग २०२६’ स्पर्धेच्या साखळी फेरीत कॉग्निझंट आणि यूबीएस पुणे या संघांनी शानदार विजयांची नोंद केली. कॉग्निझंट संघाने स्पर्धेतील आपला सलग चौथा विजय साकारला, तर यूबीएस पुणे संघाने तिसरा विजय नोंदवत आगेकूच कायम ठेवली.

साखळी फेरीतील पहिल्या सामन्यात नाणेफेक जिंकून प्रथम फलंदाजी करताना केपीआयटी संघाने २० षटकांत ९ बाद १४१ धावा उभारल्या. यात शुभम झापडेकर (३७ धावा, ३६ चेंडू, २ चौकार, २ षटकार), सोमेश मर्दाने (२९ धावा) आणि मंगेश पाटील (२७ धावा) यांनी उपयुक्त योगदान दिले. कॉग्निझंटकडून ओंकार गायकवाडने अत्यंत शिस्तबद्ध व भेदक मारा करत २४ धावांत ४ बळी टिपले, तर आनंद कोंडाने २९ धावांत २ गडी बाद केले.

Cricket News: खेळायचं तर रांगड्या पद्धतीनं! ‘या’ लीगमध्ये लाइफफिट क्रिकेट अकादमीचा सलग दुसरा विजय

वामसीची आक्रमक खेळी

विजयासाठी मिळालेल्या १४२ धावांच्या आव्हानाचा पाठलाग करताना कॉग्निझंटने १९.३ षटकांत ६ बाद १४३ धावा करत सामना ४ गडी राखून जिंकला. वामसी के. याने ४० धावांची (२६ चेंडू, २ चौकार, २ षटकार) तर मानस गोकवीने ३२ धावांची (२२ चेंडू, ५ चौकार) आक्रमक खेळी केली. केपीआयटीकडून शुभम सोनावणे (२-१६) आणि आलोक नागराज (२-२३) यांनी प्रत्येकी २ बळी घेतले. भेदक गोलंदाजी करणारा ओंकार गायकवाड सामन्याचा मानकरी ठरला.

प्रवीण सिंगची अष्टपैलू चमक

दुसऱ्या लढतीत प्रथम फलंदाजी करणाऱ्या एसएसअँडसी ऍडव्हेंट संघाला २० षटकांत ७ बाद १३२ धावांपर्यंतच मजल मारता आली. त्यांच्याकडून तारिक अन्सारी (३८ धावा, २५ चेंडू, १ चौकार, ४ षटकार) आणि मनीष सुपल (३३ धावा, २६ चेंडू, ६ चौकार) यांनी लढा दिला. यूबीएस पुणेकडून राजेश वर्माने २२ धावांत ३ बळी टिपले, तर प्रवीण सिंग व अंकित जैन यांनी प्रत्येकी १ बळी मिळवला. १३३ धावांचे लक्ष्य यूबीएस पुणे संघाने १७.२ षटकांत अवघ्या २ गड्यांच्या मोबदल्यात सहज पूर्ण केले. प्रवीण सिंगने नाबाद ३७ धावांची (३१ चेंडू, ३ चौकार, २ षटकार) संयमी खेळी केली, तर त्याला अंकित जैनने ३३ धावांची (३३ चेंडू, १ चौकार, २ षटकार) उत्तम साथ दिली. अष्टपैलू कामगिरी करणाऱ्या प्रवीण सिंगला सामनावीर पुरस्काराने गौरविण्यात आले.

Cricket News: पुणे कॉर्पोरेट क्लॅशमध्ये TCS चा चौकार! सलग चौथ्या विजयासह स्पर्धेत दबदबा कायम

संक्षिप्त धावफलक

सामना १
केपीआयटी : २० षटकांत ९ बाद १४१ धावा (शुभम झापडेकर ३७, सोमेश मर्दाने २९, मंगेश पाटील २७, सुधीर काळे १५, आलोक नागराज १३; ओंकार गायकवाड ४-२४, आनंद कोंडा २-२९)
कॉग्निझंट : १९.३ षटकांत ६ बाद १४३ धावा (वामसी के. ४०, मानस गोकवी ३२, अजय झावरे १८, प्रियांशु बांग १७, मृदुल म्हात्रे १४; शुभम सोनावणे २-१६, आलोक नागराज २-२३)
निकाल : कॉग्निझंट ४ गडी राखून विजयी.
सामनावीर : ओंकार गायकवाड.