रविवार, 8 नोव्हेंबर 2026
Maharashtra Open : बॅडमिंटनचा राज्यस्तरीय थरार! १२ नोव्हेंबरपासून बॉम्बे जिमखान्यावर महाराष्ट्र ओपन स्पर्धा, सौजन्य : सोशल मीडिया
महाराष्ट्रातील उदयोन्मुख आणि अनुभवी बॅडमिंटनपटूंना लवकरचं आपले कौशल्य दाखविण्याची संधी मिळणार आहे. बॉम्बे जिमखाना येथे 12 ते 15 नोव्हेंबरदरम्यान योनेक्स-सनराईज महाराष्ट्र ओपन (Maharashtra Open) राज्यस्तरीय बॅडमिंटन स्पर्धेचे आयोजन करण्यात आले आहे. 4 दिवस चालणाऱ्या या स्पर्धेत संपूर्ण महाराष्ट्रातून 350 हून अधिक खेळाडू सहभागी होणार आहेत.
स्पर्धेत ज्युनियर आणि ओपन अशा दोन प्रमुख गटांमध्ये एकूण 12 प्रकारांत सामने खेळवले जातील. ज्युनियर गटात 17 आणि 19 वर्षांखालील मुला-मुलींच्या एकेरी व दुहेरी स्पर्धांचा समावेश आहे. तर ओपन गटात पुरुष एकेरी, महिला एकेरी, पुरुष दुहेरी आणि मिश्र दुहेरीचे सामने रंगणार आहेत. त्यामुळे युवा खेळाडूंसह अनुभवी खेळाडूंच्या कामगिरीकडेही क्रीडाप्रेमींचे लक्ष असेल.
ग्रेटर मुंबई बॅडमिंटन असोसिएशन (GMBA) आणि महाराष्ट्र बॅडमिंटन असोसिएशन (MBA) यांच्या मार्गदर्शनाखाली बॉम्बे जिमखानाकडून या स्पर्धेचे आयोजन करण्यात येत आहे. योनेक्स आणि सनराईज हे स्पर्धेचे उपकरण भागीदार असून, बॅडमिंटन गुरुकुल इव्हेंट प्रमोटर म्हणून काम पाहत आहे.
स्पर्धेबाबत बोलताना बॉम्बे जिमखानाचे मानद सचिव शैलेश डागा म्हणाले, बॉम्बे जिमखाना येथे महाराष्ट्र ओपन राज्यस्तरीय बॅडमिंटन स्पर्धेचे आयोजन करताना आम्हाला आनंद होत आहे. ज्युनियर आणि ओपन अशा दोन्ही गटांतील खेळाडूंचा सहभाग बॅडमिंटनबद्दलचा उत्साह दर्शवतो. खेळाडूंना स्पर्धात्मक अनुभव मिळविण्याची आणि आपली क्षमता सिद्ध करण्याची ही उत्तम संधी आहे. सर्व खेळाडू आणि अधिकाऱ्यांचे स्वागत करण्यास आम्ही उत्सुक आहोत.
IND Vs PAK : पोरांनी अखेरपर्यंत झुंज दिली, पण सामना हातचा गेला! पॉईंट टेबलमध्येही भारताची पिछेहाट
बॉम्बे जिमखानाचे अध्यक्ष संजीव सरन यांनीही या स्पर्धेबाबत विश्वास व्यक्त केला. क्रीडा हा बॉम्बे जिमखानाच्या वारशाचा अविभाज्य भाग आहे. राज्यस्तरीय स्पर्धेच्या आयोजनातून बॅडमिंटनच्या विकासाला हातभार लागेल आणि युवा खेळाडूंना स्पर्धात्मक दृष्टिकोनातून या खेळाकडे पाहण्याची प्रेरणा मिळेल. महाराष्ट्रभरातील खेळाडूंचे स्वागत करताना आनंद होत असून, ही स्पर्धा यशस्वी होईल, असा विश्वास त्यांनी व्यक्त केला.
