७७ वर्षांची प्रतीक्षा संपली! गावात पहिल्यांदाच पोहोचली सरकारी बस, गावकऱ्यांचा आनंद गगनात मावेना; Video Viral
अलिकडे सोशल मिडियावर राजस्थानच्या केकडी जिल्ह्यातील भवानी गावातील एक घटना शेअर करण्यात आली आहे.दाव्यानुसार, ७७ वर्षांपासून गावात सरकारी बस व्यवस्था नव्हती, अशात पहिल्यांदाच सरकारी बस गावात दाखल होताच गावकऱ्यांना वेगळाच आनंद मिळाला. बसला येताना पाहून लहान मुलांसह मोठही खुश झाले आणि सर्वांनी आनंद साजरा करायला सुरुवात केली. ही घटना सध्या सोशल मिडियावर व्हायरल होत असून बससाठी गावकऱ्यांनी व्यक्त केलेला आनंद पाहून अनेकांचा ऊर भरुन आला आहे.
व्हिडिओत काय दिसलं?
व्हिडिओच्या सुरुवातीलाच रस्त्याच्या कडेला लहान आणि मोठी अशी बरीच मंडळी एकत्रित जमा झाल्याचे दिसते. काही वेळाने आपल्याला समोरुन एक सरकारी बस येताना दिसते. गावात पहिल्यांदाच सरकारी बस आल्याने गावकरी भारीच खुश झाले. तरुणांनी आपल्या स्मार्टफोन बाहेर काढला आणि बसचे दृष्य आपल्या फोनच्या कॅमेरात कैद करण्यास सुरुवात केली. सांगितले जात आहे की, १९४७ मध्ये भारताला स्वातंत्र्य मिळाल्यापासून कोणतीही नियमित सरकारी रोडवेज बस थेट या गावात पोहोचली नव्हती. अनेक दशकांपासून, येथील रहिवाशांना वैद्यकीय उपचार, शिक्षण किंवा कामासाठी शहरात जाण्याकरिता मैलोमैल चालावे लागत होते किंवा खाजगी वाहनांवर अवलंबून राहावे लागत होते.
राजस्थान राज्य रस्ते वाहतूक महामंडळाची बस जेव्हा गावात दाखल झाली तेव्हा गावकऱ्यांचा आनंद गगनात मावेनासा झाला. लोकांनी राष्ट्रीय उत्सवाप्रमाणे बसच्या आगमणाचा आनंद साजरा केला. बसला फुलांनी सजवण्यात आले, ड्रायव्हार-कंडक्टरचे थाटात स्वागत करण्यात आले. कोणी विशेष अतिथी गावात आलाय अशाप्रकारे गावकरी बसच्या आगमणाची वाट पाहत राहिले आणि बस येताच मोठ्या आनंदाने तिचे स्वागत त्यांनी केले.
हा व्हिडिओ @foofaji नावाच्या इंस्टाग्राम अकाऊंटवर शेअर करण्यात आला आहे. या घटनेवर सोशल मिडिया यूजर्सने आपल्या प्रतिक्रिया व्हिडिओच्या कमेंट सेक्शनमध्ये व्यक्त केल्या आहेत. एका यूजरने म्हटले की, “गावात व्यवस्था नाही आणि भारत चौथी सर्वात मोठी अर्थव्यवस्था?”, दुसऱ्या युजरने लिहिले आहे, “पूर्वी ही बस चालत होती, आता पुन्हा तिला सुरु करण्यात आलं आहे, आणखी एका यूजरने लिहिले आहे, “आमच्या गावातही बस अजून आली नाही आणि असे अनेक गाव आहेत”.
टीप – हे व्हिडिओ सोशल मीडियावर व्हायरल झाले असून आम्ही वाचकांना काय योग्य आणि काय अयोग्य हे दाखविण्यासाठी लेख देत असतो. कोणत्याही प्रकारे अशा व्हिडिओबाबत आमचे मत आम्ही मांडत नाही वा आमचा कोणताही दावा नाही.
.png "Videos"){kind=small}
